Genesesi
13 Abulamu ŵakopweche m’chilambo cha Iguputo ni kwawulaga cha ku Negebu. Jwalakwe ŵaliji yimpepe ni ŵamkwakwe soni Loti nambosoni yindu yosope yaŵakwete. 2 Abulamu jwasichile mnope. Jwalakwe jwakwete yilango, silifa soni golide. 3 Jwalakwe paŵatyokaga ku Negebu kwawula ku Beteli jwatamilaga kukunga matenti m’malo gakulekanganalekangana, soni jwatendaga yeleyi mpaka pajwayiche pamalo gaŵakunjile tenti jakwe pandanda, pasikati pa msinda wa Beteli ni msinda wa Ai. 4 Pamalo pelepa ni paŵataŵilesoni malo gakupelechela mbopesi pandanda pala. Ali kweleko, Abulamu ŵaŵilanjilesoni pa lina lya Yehofa.
5 Sambano Loti juŵajendaga ni Abulamu jula, nombenajo ŵakwetesoni ngondolo, ng’ombe soni matenti. 6 Myoyo, jemanjaji malo gatandite kwanandipila ligongo ŵakwete yindu yejinji mnope mwamti yaliji yangakomboleka kuti wosope atameje pampepe. 7 Yeleyi yatendekasisye kuti paŵe kukangana pasikati pa ŵakulisya yilango ya Abulamu ni ŵakulisya yilango ya Loti. (Pandaŵiji Akanani ni Apelesi ŵaliji mkutama m’chilambomo.) 8 Myoyo Abulamu ŵamsalile Loti kuti, “Pakapagwa kangana pasikati pa mmwejo ni une soni pasikati pa ŵakulisya yilango yangu ni ŵakulisya yilango yenu ligongo mmwejo ni une tuli paulongo. 9 Mkwetetu upile wakutama palipose pamkusaka m’chilambochi. Kwende tulekangane. Naga mmwejo mkwawula mbali ja kumchiji nikuti une chinjawule mbali ja kumlyo. Nambo naga mkwawula mbali ja kumlyo, une chinjawule mbali ja kumchiji.” 10 Loti paŵalolite dela josope ja Yolodani ŵajiweni kuti delajo jili jakubiliŵitila chenene. Ndaŵi jeleji, Yehofa ŵaliji mkanajonanje msinda wa Sodomu ni Gomola. Delaji jaliji mpela mgunda wa Yehofa soni jaliji mpela muchaŵelele chilambo cha Iguputo mpaka kuja kwika ku Sowali. 11 Myoyo, Loti ŵasagwile dela josope ja Yolodani mwamti ŵasamisye tenti jakwe ni kwawula chakungopokolyuŵa. Pelepo, Abulamu ni Loti ŵalekangene. 12 Abulamu ŵatemi m’chilambo cha Kanani nambo Loti ŵatemi chiŵandika ni misinda ja mudela ja Yolodani. Pambesi pakwe, Loti ŵataŵile tenti jakwe mwakuŵandichila msinda wa Sodomu. 13 Nambo ŵandu ŵa mumsinda wa Sodomu ŵaliji ŵakusakala soni ŵatendaga yakulemwa yekulungwa mnope pameso pa Yehofa.
14 Abulamu paŵalekangene ni Loti, Yehofa ŵamsalile Abulamujo kuti, “Kutyochela pamlipo, mlole mbali ja kumpoto, kummwela, kungopokolyuŵa soni kungapililolyuŵa. 15 Chilambo chosope chamkuchiwonachi chinjichipeleka kwa mmwejo soni kwa ŵanache* ŵenu kuti chiŵe chenu mpaka kalakala. 16 Chinjitendekasya ŵanache ŵenu kuŵa ŵajinji mpela mchenga wa pachilambo chapasi. Mwamti naga mundu mpaka akombole kuŵalanga mchenga wa pachilambo chapasi, nikutisoni ŵanache ŵenu chachiŵa ŵakomboleka kwaŵalanga. 17 Mnyakuche, mjende m’chilewu soni m’chijipi mwachilambochi, ligongo une chinjichipeleka chilambo chelechi kwa mmwejo. 18 Myoyo Abulamu ŵapitilisye kutama m’matenti. Kaneko jwalakwe ŵapite kutama pa yitela yekulungwakulungwa ya ku Mamule m’chilambo cha Hebuloni. Kweleko Abulamu ŵataŵilesoni malo gakupelechela mbopesi kwa Yehofa.