Masalimo
Nyimbo ja Daudi jakuti ŵandu ajikumbuchileje.
38 Wawo Yehofa, akanjamuka ali atumbile,
Kapena kunjongolela ali apile mtima.
2 Pakuŵa mipamba jawo jisomile une mpaka mkati,
Soni mkono wawo ukusitopa pa une.
3 Chilu changu chosope chikulwala* ligongo lya ukali wawo.
M’mawupa mwangu mwangali mtendele ligongo lya ulemwa wangu.
4 Yakulemwa yangu yitupile mnope mpaka kupunda mtwe wangu.
Ngulepela kuyitwichila mpela katundu jwausito.
5 Maŵanga gangu gawosile
Soni gakununga ligongo lyakuloŵela kwangu.
6 Ngulagasika mnope nganisyo soni njineme ligongo lya chanasa.
Ngusajendaga lisiku lyosope ndili jwachanasa.
7 Mkati mwa chilu changu mukocha moto.*
Chilu changu chosope chikulwala.
8 Ndesile mandilindili, mwamti chilu changu ngachikupikana chilichose soni machili gamalile.
Nguwuwula mnope ligongo lyakupweteka kwa mtima wangu.
9 Wawo Yehofa, wawojo akumanyilila yakumbila yosope ya mtima wangu,
Soni wawojo akusapikana kupumasika kwangu.
10 Mtima wangu ukuwutukawutuka, soni machili gangu gamasile.
M’meso mwangu mutesile chipi.
11 Ŵandu ŵangusinanonyela soni achimjangu akuŵambala une ligongo lya mlili wawungwilile,
Soni ŵandu ŵakumanyigana nawo akundila.
12 Ŵandu ŵakuwusosasosa umi wangu andejele yitega.
Ŵandu ŵakulingalinga kuti anjonanje akuŵecheta yakuti chambulasye.
Lisiku lililyose jemanjajo akusatenda mapulani gakusaka kulambusya une.
13 Nambo mwakulandana ni mundu jwangapikana, une jwangapikana yakuŵecheta yawo.
Mwakulandana ni mundu jwangaŵecheta, ngusagamba kutama ngaŵecheta chilichose.
14 Mbele mpela mundu jwangakombola kupikana,
Soni mpela mundu jwanganakola yakuŵecheta pakulichenjela.
15 Pakuŵa une najembecheye pa wawojo Yehofa,
Soni wawojo ŵanjanjile, wawo Yehofa Mlungu jwangu.
16 Pakuŵa une natite, “Akakunda kuti jemanjajo asangalale ligongo lya yakusawusya yangusimana nayo.
Kapena kwakunda kuti alikwesye ligongo lyakuti lusajo* lwangu lutelesye.”
17 Pakuŵa nasigele panandi kugwa,
Soni ndaŵi syosope naliji mkupikana kupweteka.
18 Une nawulwile yakulemwa yangu.
Soni nalagasikaga ni ulemwa wangu.
19 Nambo adani* ŵangu ali chiŵela* soni ali ŵamachili,
Ŵandu ŵakuŵengana ni une pali pangali ligongo atupile mnope.
20 Jemanjajo akusambuchisyaga yindu yachabe pa yindu yambone yangusatendaga.
Jemanjajo ŵaliji mkundekasya kuti ngapitilisya kutenda yindu yambone.
21 Wawo Yehofa, akandeka jika une.
Wawo Mlungu jwangu, akandalichila une chonde.
22 Ayiche mwachitema kuti angamuchisye.
Wawo Yehofa, chikulupusyo changu.