Masalimo
ל [Lamed]
10 Wawo Yehofa, ligongo chichi akwima kutali ni une?
Ligongo chichi akulisisa pandaŵi jangusimana ni yipwetesi?
2 Mundu jwakusakala, mwakulikwesya akusamkuyakuya mundu jwakusoŵa ŵakumkamuchisya.
Nambo jwalakwejo chachitanjila m’mapulani gakwe gachabego.
3 Mundu jwakusakala akusaŵecheta mwakulikwesya pakwamba yakumbila yakwe yakulinonyela.*
Soni akusampaga upile mundu jwakutunduka.*
נ [Nun]
Jwalakwejo ngakusamchimbichisya Yehofa.
4 Ligongo lyakulikwesya, mundu jwakusakala ngakusasaka kuwungunya yakwamba Mlungu.
Nganisyo syakwe sikusaŵa syakuti, “Kwangali Mlungu.”
5 Yiliyose yakusatenda jwalakwejo yikusamjendela chenene,
Nambo nganaŵa apikanichisye yakusati pakwelusya wawojo Mlungu.
Jwalakwe akusiŵanyosya adani* ŵakwe wosope.
6 Mumtima mwakwe jwalakwe akusaŵecheta kuti, “Une ngasindenganyika,
Pakuŵa ku mibado* josope,
Une ngasisimana ni yakupweteka.”
פ [Pe]
7 Mkamwa mwakwe mugumbele maloŵe gakutembelela, unami soni yakwajogoya ŵane.
Pa lulumi lwakwe pana yipwetesi soni yakwawulasya ŵane.
8 Jwalakwe akusatenda yachiwembu mwakuŵandikana ni kwakusatama ŵandu.
Kutyochela pamalo gajuŵile, akusamwulaga mundu jwangalemwa.
ע [Ayin]
Jwalakwe akusaŵa mesope kuti amwone mundu jwampaka amwulaje.
9 Jwalakwe akusamjuŵilila mundu mpela mwalikusatendela lisimba.
Jwalakwe akusalindilila kuti amkamule mundu jwangali jwakumkamuchisya.
Jwalakwe akusamkamula mundu jwangali jwakumkamuchisya mwakumtanjisya mu lwawu lwakwe.
10 Mundu jwamkamwilejo akusamtendela yangasa soni kumgwisya.
Ŵandu ŵangali machiliwo akusagwilila mmyala mwakwe.
11 Mumtima mwakwe jwalakwejo akusati, “Mlungu aliŵalile.
Jwalakwejo alolite kumbali.
Jwalakwejo nganaŵa amanyilile yeleyi.”
ק [Qoph]
12 Anyakuche wawo Yehofa. Wawo Mlungu, akwesye mkono wawo.
Akaliŵalila ŵandu ŵangali ŵakwakamuchisya.
13 Ligongo chichi mundu jwakusakala ngakumchimbichisya Mlungu?
Mumtima mwakwe jwalakwejo akusati, “Nganaŵa anjimbile magambo pa yindu yangutendayi.”
ר [Resh]
14 Nambo wawojo akusiŵawona ŵandu ŵakusatendekasya yakusawusya soni yipwetesi.
Wawojo akusayiwona yosope soni chachitendapo kandu.
Mundu jwakusoŵa chikamuchisyo akusatilila kwa wawojo.
Wawojo akusamkamuchisya mwanache jwamasije.*
ש [Shin]
15 Atemangule mkono wa mundu jwakusakala soni jwachabe,
Ni chakulinga chakuti wawojo pakumwungunya jwalakwejo,
Amsimane kuti ngakutendasoni yakusakala.
16 Yehofa ali Mwenye mpaka kalakala.
Mitundu ja ŵandu jimasile pachilambo chapasi.
ת [Taw]
17 Nambo kuŵenda kwa mundu jwakufasa* wawojo chachikupikana, wawo Yehofa.
Wawojo chachijilimbisya mitima jawo soni chachitejela liwiwi kuti ŵapikanile jemanjajo.
18 Wawojo chachilamula mwachilungamo magambo ga mwanache jwamasije soni ga ŵandu ŵatendeledwe yangasa.
Chachitenda yeleyi ni chakulinga chakuti mundu jwakutama pachilambo chapasi akasiŵajogoyasoni jemanjaji.