Masalimo
BUKU JAŴILI
Kwa jwakulongolela nyimbo. Nyimbo ja ŵanache ŵa Kola. Masikili.*
42 Mpela mwajikusasachilila mbaŵala kumwa mesi m’lusulo,
Unesoni ngusachilila kwatumichila wawojo Mlungu.
2 Mpela mwakusasachilila mesi mundu jwajimkwete njota, ngusachilila kumtumichila Mlungu jwaumi.
Ana chinjijawula chakachi kukuwonechela pameso pa Mlungu?
3 Misosi jangu jiŵele mpela yakulya yangu musi ni chilo.
Ŵandu akutamila kunyosya une lisiku lililyose. Akuŵechetaga kuti, “Mlungu jwenu ali kwapi?”
4 Ngusalagasika mumtima mwangu pangumbuchile
Ndaŵi janajawulaga ku nyumba ja Mlungu pampepe ni gulu ja ŵandu.
Najendaga mwapanandipanandi pasogolo pa gulu ja ŵanduwo,
Kwineku gulujo jili mkwimba mwakusangalala soni kumyamichila Mlungu
Pandaŵi ja chisangalalo.
5 Ligongo chichi ngusoŵa pakamula?
Ligongo chichi ngulagasika mumtima mwangu?
Chinamjembecheye Mlungu,
Pakuŵa une chinjimchimbichisyasoni Mkulupusyo Jwangu Jwamkulungwa.
6 Wawo Mlungu, une soŵile pakamula.
Ni ligongo lyakwe nakumbuchile wawojo
Pandili mudela ja Yolodani soni penani pa Litumbi lya Helimoni,
Pandili pa Litumbi lya Misa.*
7 Ngupikana mkokomo wa mesi.
Uli mkokomo wa kugwa kwa mesi gawo kutyochela penani.
Yakusawusya yinganganiche mpela matumbela gawo gamachili.
8 Musi Yehofa chachilosya une chinonyelo chakwe chakulupichika,
Soni chilo chinjimjimbila jwalakwejo nyimbo, jajili lipopelo lyakwawula kwa Mlungu jwa umi wangu.
9 Une chinjimsalila Mlungu jwangu, jwali lwala lwangu kuti:
“Ligongo chichi andiŵalile une?
Ligongo chichi akundile kuti njendeje ndili jwachanasa ligongo lya adani* ŵangu ŵakundagasya?”
10 Adani ŵangu ŵakwete nganisyo syakumbulaga* akunyosya une.
Jemanjajo akutamila kunyosya une lisiku lililyose. Akuŵechetaga kuti, “Mlungu jwenujo ali kwapi?”
11 Ligongo chichi ngusoŵa pakamula?
Ligongo chichi ngulagasika mumtima mwangu?
Chinamjembecheye Mlungu,
Pakuŵa une chinjimchimbichisyasoni Mkulupusyo Jwangu Jwamkulungwa soni Mlungu jwangu.