MTUNDU WASAMBANO WA CAKULYA

ANA mpaka ayimanyilile yakulokotanya ŵandu pasiyo? Yikuwoneka mpela utandi weswela. Cili cakulya.

Pagambile kumala ciŵandika mwesi umo cityocele Ayisalayeli ku Eguputo. Sambano ali mcipululu. Mcipululumu mwangamela yakulya yejinji, sambano ŵandu akudandawula, acitiji: ‘Yikaliji cenene, Yehofa akatuwulaje ku Eguputo pekula. Ligongo bolaga mwelemo twakwete yakulya yosope yatwasakaga.’

Sambano Yehofa akuŵeceta kuti: ‘Cindendekasye cakulya kugwa kutyocela kumawunde.’ Yehofa akutenda yeleyi. Kuca kwa lisiku line Ayisalayeli pakuyiwona yindu yeswela yayigwile, akuwusyana kuti: ‘Ana celeci cici?’

Musa akuŵeceta kuti: ‘Celeci cili cakulya capelece Yehofa kwa jemanja kuti mlyeje.’ Ŵanduwo akucikolanga cakulyaco kuti MANA. Cikunong’a mpela makeke gakupanganya kutyocela ku uci.

Musa akwasalila ŵandu ŵala kuti: ‘Jwalijose akusosekwa alokoteje yampaka akombole kulya.’ Kundaŵi kulikose akuŵa mkulokotanya. Kaneko, lyuŵa palikutanda koca, mana gagasigalile pasi gala gakunyelenyenduka.

Musa akuŵecetasoni kuti: ‘Pangali jwalijose jwakusosekwa kusunga mana mpaka lisiku lyakuyicisya.’ Nambo ŵane ngakupikanila yeleyi. Ana akumanyilila yayikutendekwa? Kundaŵi kwakuyicisya mana gasunjile gala gakugumbala mbisu, soni gakutanda kununga!

Wiki jilijose pana lisiku limo lyakwasalila Yehofa ŵandu kuti alokoteje mana gejinji kuwilisya kaŵili. Lisikuli lili lya msano ni cimo. Yehofa akusala kuti asunjeje mana gane kuti alyeje lisiku lyakuyicisya, ligongo ngagwisyaga mana galigose palisiku lya msano ni yiŵili. Ŵandu pakugasunga mpaka pa lisiku lya msano ni yiŵili, mana gala ngagakukola mbisu, soni ngagakununga! Celeci cili cakusimonjesya cine!

Yaka yosope yali Ayisalayeli mcipululu, Yehofa akwalisya mana.