Yayatendece Pasikati pa Yoswa ni Agibiyoni

Ngani jajatendece ku Yeliko japikanice ku mitundu jine ja ku Kanani. Mayimwene ga mitunduji gakamulene yakuputa ngondo ni Ayisalayeli. Nambo Agibiyoni ŵakwete nganisyo sine. Ŵawete yiwisa ni kwawula kwa Yoswa ni ŵatite, ‘Tukutyocela ku cilambo ca kwakutalika. Twapikene yakwamba Yehofa soni yosope yiŵatesile kwa jemanja ku Iguputo soni ku Mowabu. Atusimicisye kuti ngasatujonanga, ni m’weji tuciŵa acikapolo ŵawo.’

Yoswa ŵakulupilile jemanjajo ni ŵajiticisye kuti ngasiŵajonanga. Panyuma pamasiku gatatu, ŵamanyilile kuti nganatyocela kucilambo ca kwakutalika. Ŵatyocelaga m’cilambo ca Kanani. Yoswa ŵawusisye Agibiyoniwo kuti, ‘Ligongo cici atulambwisye?’ Jemanjajo ŵajanjile kuti, ‘Watukamwile woga. Tukumanyilila kuti Yehofa Mlungu jwawo akwaputila ngondo. Conde akatuwulaga.’ Yoswa ŵasunjile cilanga cakuti ngasiŵawulaga.

Mkanipapite ndaŵi, mayimwene msano ga ku Kanani ni asilikali ŵawo ŵatandite kwajogoya Agibiyoni. Yoswa ni asilikali ŵakwe ŵajesile cilo cosope kuti ŵakulupusye jemanjajo. Ngondojo jatandite kundaŵi kwa lisiku lyakuyicisya. Akanani ŵatandite kutilila mbali syosope. Kulikose kuŵatililaga, Yehofa ŵagwicisyaga matalila gekulungwakulungwa. Kaneko Yoswa ŵam’ŵendile Yehofa kuti ajimice lyuŵa. Ana ligongo cici Yoswa ŵam’ŵendile Yehofa kuti ajimice lyuŵa atamose kuti lyuŵa nganilijimeje citandilile? Ŵatesile yeleyi ligongo lyakuti Yoswa ŵamkulupililaga Yehofa. Kwa lisiku lyosope lyuŵa nganilitiŵila mpaka Ayisalayeli piŵagomece mayimwene ga ku Kanani ni asilikali ŵawo.