Mtuka Wakupunda Wine Wuliwose

Kacindu kakuwoneka mpela kasitima kaŵapocele Jordan mpaka tukawone kuŵa kangali mate. Nambo kwa Jordan kali kakusosekwa. Jwalakwe jwatite, “Ndili jwacinandipile, mundu jwine jwacikulile lina lyakwe Russell, juŵakamulanaga mnope ni anganga, soni baba ni mama ni juŵambele kacinduka.” Nambo Russell paŵajasice, Jordan ŵayimanyi kuti jwalakwe jwalimbikasyaga angangagwe soni acinangolo ŵakwe paŵasimanaga ni yakusawusya. Kaneko Jordan jwatite, “Apano ngumanyilila yejinji yakwamba Russell. Kacindu kaŵambeleka sambano ngukawona kuŵa kakusosekwa mnope.”

Yatusasile penanipa yikulosya kuti ŵandu ŵane komboleka kuwuwona mtuka wapocele kuŵa ŵangasosekwa mnope kapena ŵangali mate. Nambo kwa mundu jwakwete mtima wakuyamicila mpaka awuwone mtuka kuŵa wakusosekwa. Baibulo pakusala ya mtuka wine wakwe wapenani jikusati, “Mlungu ŵacinonyele mnope cilambo capasi mwati ŵapelece Mwanagwe jwakupagwa jika, kuti jwalijose jwakulupilila mwa jwalakwe akajonasika nambo akole umi wangamala.”—Yohane 3:16.

Mundu jwapocele mtuka welewu cacipata umi wangamala. Pangalisoni mtuka wine wakulandana ni welewu. Ŵandu ŵane ngakusawuwona mtukawu kuŵa wakusosekwa, nambo Aklistu ŵasyesyene akusawuwona kuŵa “wapenani.” (Salimo 49:8; 1 Petulo 1:18, 19) Ligongo cici Mlungu ŵapelece umi wa Mwanace jwakwe mpela mtuka ku cilambo capasi?

Ndumetume Paulo jwasasile ligongo lyakwe m’maloŵe gakuyicisyaga, “Ulemwa wajinjile m’cilambo kupitila mwa mundu jumo, soni ciwa kupitila mu ulemwa, m’yoyo ciwa cawandile kwa ŵandu wosope.” (Aloma 5:12) Mundu jwandanda, Adamu, jwalemwisye mwamele. Jwalakwe nganampikanila Mlungu mwati jwapocele cilango ca ciwa. Ligongo lyakuti wosopewe twatyocele kwa Adamu, m’yoyo ciwa cawandile kwa ŵandu wosope.

“Malipilo ga ulemwa gali ciwa, nambo mtuka wakusapeleka Mlungu uli umi wangamala kupitila mwa Klistu Yesu Ambuje ŵetu.” (Aloma 6:23) Kuti Mlungu ŵakulupusye ŵandu ku cilango ca ciwa, jwamtumisye Mwanace jwakwe, Yesu Klistu pacilambo capasi, kukupeleka umi wakwe wamlama. Kupitila mu ciwa cakwe cacikusakolanjikwa kuti “mbopesi ja ciwombolo,” wosope ŵakusamkulupilila Yesu cacipata umi wangamala.—Aloma 3:24.

Pakwamba ya majali gosope gakusapeleka Mlungu kwa ŵakulambila ŵakwe, kupitila mwa Yesu Klistu, Paulo jwatite, “Tukuyamicila Mlungu ligongo lya mtuka wakwe walulele, wanganituŵa tuwukombwele kuwulondesya.” (2 Akolinto 9:15) Kusala yisyene, mtuka wa mbopesi ja ciwombolo wuli wambone mnope wanganituŵa tuwukombwele kuwulondesya. Nambo ligongo cici mtuka welewu wuli wapajika kupunda mituka josope japelece Mlungu kwa ŵandu? Ana mtukawu wuli wakulekangana catuli ni mituka jine josope?a Soni ana mpaka tutende yatuli pakuyamicila mtukawu? Baibulo jikwete kwanga kwa yiwusyo yeleyi. Tukwaŵenda kuti aŵalanje ngani siŵili syakuyicisyasi kuti apate kwanga kwakwe.