Ana Mpaka Alosye Catuli Kuyamicila Mtuka Waŵatupele Mlungu?

MTUKA WAMBONE MNOPE mpaka utulimbikasye kuyamicila. Yesu jwagombelecesye yeleyi paŵaposisye ŵandu 10 ŵaŵalwalaga ulwele wa matana, wele pandaŵijo waliji wangali mtela. Pa ŵandu 10 ŵala, jumope “jwawujilile ali mkumlumba Mlungu mwakwesya maloŵe.” Yesu jwawusisye kuti, “Ŵandu ŵakwana 10 ni ŵaposile, ngaŵa m’yoyo? Sambano ŵane 9 ŵala ali kwapi?” (Luka 17:12-17) Ana tukulijiganya cici? Tukulijiganya kuti yili yangasawusya kuliŵalila yindu yambone yatutendele ŵane.

Mtuka wa ciwombolo wuli wangalandana ni wine wuliwose. Mtukawu wuli wapenani mnope. Sambano, ana mpaka alosye catuli kuyamicila yaŵatendele Mlunguyi?

• Alijiganye soni kummanyilila juŵapelece mtukawu. Jwalijose akusosekwa kutendapo kandu kuti capocele umi wangamala kupitila mu ciwombolo. Yesu jwapopesile kuti, “Umi wangamala caciwupata pakulijiganya ni kumanyilila ya ŵalakwe, Mlungu jwakuwona, soni ya Yesu Klistu jwele wawojo ŵamtumile.” (Yohane 17:3) Naga jwine jwakwe ŵasalile kuti mundu jwine jwakulupwisye umi wawo paŵaliji mwanace, ana nganaŵa asacilile kummanyilila mundujo, soni ligongo lyakwe ŵakulupwisye? Yehofa Mlungu ni juŵatukulupwisye kupitila mu mtuka wa ciwombolo. Jwalakwe akusaka tummanyilile soni kuti tuŵe najo paunasi. Baibulo jikusatulimbikasya kuti, “Am’ŵandicile Mlungu, soni jwalakwe tacaŵandicila.”—Yakobo 4:8.

• 

  Akulupilileje mbopesi ja ciwombolo. “Jwalijose jwakumkulupilila Mwanacejo akwete umi wangamala.” (Yohane 3:36) Ana kulosya cikulupi kukusagopolela cici? Kukusagopolela yitendo. M’yoyosoni mpaka tulosye kuti tukusakulupilila mbopesi ja ciwombolo kupitila mu yitendo yetu. (Yakobo 2:17) Ana yitendo yakwe mpaka yiŵe yapi? Mtuka ukusaŵa wetu naga tupocele ni kuwusamala. Ni mwayiŵelelesoni ni mtuka wa mbopesi ja ciwombolo. Mwatuli? Alijiganyeje yakusaka Mlungu kuti atendeje mwakamulana ni yeleyo.a Am’ŵendeje Mlungu kuti ŵakululucileje yakulemwa yawo, soni kuti akole cikumbumtima ceswela. Pakupopela kwa Mlungu akulupilileje ni mtima wosope kuti, kupitila mu mbopesi ja ciwombolo, tacikola umi wambone soni wamtendele.—Ahebeli 11:1.

• 

  Asimanikweje pa Cikumbucilo ca ciwa ca Yesu. Yesu jwatamilikasisye cakutendekwa ca pacaka kuti tukumbucileje mbopesi ja ciwombolo. Pakusala ya cakutendekwaci, jwalakwe jwatite, “Mtendeje yeleyi kuti mungumbucileje.” (Luka 22:19) Caka acino Ŵamboni sya Yehofa catende cikumbucilo ca ciwa ca Yesu Lyaŵili, pa April 11, 2017, lyuŵa lili likapile. Yosope yicijigala ciŵandika awala jimo. Kucipagwa ngani jajicilondesya cenene kusosekwa kwa ciwa ca Yesu, soni yindu yambone yatukusapata apano ni yatucipata msogolo ligongo lya ciwaco. Caka cimasile, ŵandu 20,000,000 pacilambo cosope ŵasimanikwe pa cikumbucilo. Tukwaŵilanjila kuti casongane yimpepe ni m’weji kuti calosye kuyamicila mtuka wekulungwa watupele Mlungu.