Ana Akumanyilila?

Ana mundaŵi jakala ŵandu ŵajigalaga catuli moto kwawula nawo kumalo kwine?

NGANI ja m’Baibulo jajikusimanikwa pa Genesis 22:6 jikusasala kuti, Abulahamu paŵakosecelaga kuja kupeleka mbopesi kumalo kwakutalika, ‘ŵajigele sasu syakuja kutinicisya mbopesi ni ŵamtwicile mwanagwe Isaki. Kaneko jwalakwe ŵajigele moto ni cipula m’miyala mwakwe, ni ŵaŵiliwo ŵawutandite ulendo.’

Malemba gangasala ya litala lyaŵakamulicisyaga masengo ŵandu pakolesya moto mundaŵi jakala. Pangani ja Abulahamu, mundu jwine ŵasasile kuti, ‘yaliji yangakomboleka kujigala moto wakolela ni kwenda nawo ulendo welewu uli mkolelape.’ M’yoyo komboleka kuti Abulahamu ŵajigele yindu yakolecesya moto.

Nambope, ŵandu ŵane akusasala kuti ndaŵi jakala yaliji yakusawusya mnope kuti mundu akolesye moto. Yaŵayiwonaga kuŵa yangasawusya yaliji kwamba kuja kupala makala gamoto kwa ŵandu ŵane m’malo mwakolesya jika. Ŵandu ŵane ŵalijiganye ya Baibulo akusakulupilila kuti Abulahamu ŵajigele kaciŵiga kakola lukonji lwa ceni ali aŵisilemo makala gamoto. (Yes. 30:14) Moto waŵawujigalaga m’litala lyeleli waliji wangasawusya kuwukolesya pamalo galigose mwitala, mwakuŵika tusasu twaŵanaŵana.