Yiwusyo Yakutyocela Kwa Ŵakuŵalanga

Ana yili yakuŵajilwa kuti Mklistu akole uti pakusaka kuti alicenjeleje najo kwa ŵandu ŵane?

Songa sya m’Baibulosi sikusalosya kuti Mklistu ngakusosekwa kola cida mpela uti pakusaka kulicenjela kwa ŵandu ŵane. Kwende tuganicisye songa syakuyicisyasi:

M’meso mwa Yehofa, umi wa mundu uli wakusosekwa mnope. Jwamalumbo Daudi ŵamanyililaga kuti Yehofa “ali cisima ca umi.” (Sal. 36:9) M’yoyo, naga Mklistu akusaka kulicenjela msyene kapena yindu yakwe, akusosekwa kutenda yiliyose yampaka akombole kuti akawulaga mundu pakusaka kuŵambala kola magambo ga miyasi.—Deut. 22:8; Sal. 51:14.

Kamulicisya masengo yida yakulekanganalekangana pakusaka kulicenjela mpaka kutendekasye kuti ukole magambo ga miyasi. Nambope, uti mpaka jitendekasye kuti uwulaje mwacitema, cinga mwangosi kapena mwakutenda kosecela.a Nambosoni, jwakulimbana nawejo akusaŵa kuti akwete woga, ni naga ayiweni kuti tukwete uti mpaka yitendekasye kuti yindu yiyice pakusakala mnope mwamti yakuyicisya yakwe jumo pamalopo mpaka awulajidwe.

Pandaŵi jele Yesu ŵasalile ŵakumkuya ŵakwe kuti ajigale maupanga cilo cakumalisya ca umi wakwe pacilambo capasi, jwalakwe nganatenda yeleyi ni nganisyo syakusaka kuti akalicenjele. (Luk. 22:36, 38) M’malo mwakwe, Yesu ŵasalile jemanjaji kuti ajigale upanga pakusaka kwajiganya cindu cakusosekwa mnope cakuti nganasosekwaga kuwucisya, atamose ali asimene ni likuga lyalikwete maupanga. (Luk. 22:52) Panyuma pakuti Petulo aswekwile upanga wakwe ni kata liwiwi lya jwakutumicila jwa jwamkulungwa jwa ŵambopesi, Yesu ŵamsalile Petulo kuti, “Ucisyani upangawo m’malo mwakwe.” Kaneko, Yesu ŵasasile songa jakusosekwa mnope jajiŵele jili mkwalongolela ŵakumkuya ŵakwe mpaka apano. Songa jakwe jili jakuti, “Jwalijose jwakusajigala upanga caciwulajidwa ni upanga.”—Mat. 26:51, 52.

Mwakamulana ni lilemba lya Mika 4:3, ŵandu ŵa Mlungu ‘asyanile mawupanga gawo kuti gaŵe majela ni mikondo jawo kuti jiŵe yikwakwa.’ Aklistu ŵasyesyene akusatenda yindu mwakamulana ni maloŵe ga Paulo gakuti, “Akasawucisya cakusakala pa cakusakala.  . . Naga yili yakomboleka, aŵeje pamtendele ni ŵandu wosope mwampaka akombolele.” (Alo. 12:17, 18) Atamose kuti Paulo ŵasimene ni yakusawusya yejinji, kupwatikapo “yakogoya kutyocela kwa ŵaciswamba,” nambo jwalakwe ŵatesile yindu mwakamulana ni maloŵe gakwe. Jwalakwe nganakasaga songa sya m’Malemba pakusaka kulicenjela. (2 Akoli. 11:26) M’malo mwakwe, Paulo ŵamkulupililaga Mlungu soni ŵamanyililaga kuti lunda lwalukusasimanikwa m’Maloŵe Gakwe luli “ lwambone kupundana ni yida yakuputila ngondo.”—Mlal. 9:18.

Aklistu akusawuwona umi kuŵa wakusosekwa mnope kupunda yindu yakucilu. Tukusamanyilila kuti “umi [wa mundu] wangatyocela mu yindu yakwete.” (Luk. 12:15) M’yoyo, naga tuŵecetene mwaucimbicimbi ni jwawiyi jwakwete uti, nambo jwalakwejo ngakusaka kuleka kulimbana nawe, Aklistu ŵalunda akusakamulicisya masengo songa jajikusimanikwa m’maloŵe ga Yesu jakuti, “Akasalimbana ni mundu jwakusakala.” Yeleyi yikugopolela kuti mpaka tusosekwe kumleka jwawijo kuti ajigale cilicose cakusaka. (Mat. 5:39, 40; Luk. 6: 29)b Cindu cakusosekwa mnope cili kuŵambala yindu yampaka yitendekasye kuti ŵawiyi atusawusyeje. Mwambone, tukusosekwa kuŵambala ‘kulilosya ni yindu yatukwete,’ soni tumanyiceje mumkuli watukusatama kuti tuli ŵandu ŵamtendele.—1 Yoh. 2:16; Miy. 18:10.

Aklistu akusacimbicisya cikumbumtima ca ŵane. (Alo. 14:21) Abale ni alongo mpaka asimonje mnope kapenasoni kutenguka naga ayimanyi kuti Mklistu jwine akwete uti pakusaka kulicenjela kwa ŵandu ŵane. Atamose kuti m’cilambo mpaka mupagwe lilamusi lyakuti mundu komboleka kola uti, nambo ligongo lyakwanonyela Aklistu acimjetu, tuciŵika yakusaka yawo pasogolo.—1 Akoli. 10:32, 33; 13:4, 5.

Aklistu akusalingalinga kuŵa cisyasyo cambone. Naga Mklistu akwendelecela kusunga uti pakusaka kulicenjela kwa ŵandu ŵane panyuma pakuti ampele camuko ca m’Malemba, jwalakwe nganaŵa aŵele cisyasyo cambone. Ngakusasosekwa kola ukumu wuliwose kapena maundumetume gapajika mumpingo. Yeleyi yikamulasoni masengo kwa Mklistu jwakwendelecela kamula masengo gakunyakula uti. Mpaka yiŵe cenene kuti jwalakwe apate masengo gane.c

Yakusatenda Mklistu pakusaka kulicenjela msyene, liŵasa lyakwe, yindu yakwe, kapena kusagula masengo yili yakusagula ya jika. Nambo yakusagula yakwe yikusasosekwa kuti yikamulaneje ni songa sya m’Baibulo. Yehofa ŵatupele songasi ligongo lyakuti akusatunonyela. Pakuya songa syelesi, Aklistu ŵakomangale mwausimu, akusasagula kuti akakola uti jakuti alicenjeleje najo kwa ŵandu ŵane. Jemanjaji akusamanyilila kuti citeteyo cisyesyene cikusayika kwa mundu jwakusamkulupilila Mlungu soni kutenda yindu mwakamulana ni songa sya m’Baibulo.—Sal. 97:10; Miy. 1:33; 2:6, 7.