Mlungu Chamasye Yipwetesi Yosope Pachangakaŵapa

“Wawo Yehofa, ana chinjililila chikamuchisyo chawo mpaka chakachi wawo ngambikanila? Ana chinjiŵenda chikamuchisyo chawo mpaka chakachi wawo ngatendapo kandu?” (Habakuku 1:2, 3) Maloŵe gelega jwaŵechete Habakuku, mundu juŵatendaga yindu yakumsangalasya Mlungu. Ana yaŵaŵecheteyi yikulosya kuti nganakola chikulupi? Iyayi, ligongo Mlungu ŵamsimichisye Habakuku kuti chamasye yipwetesi yosope pandaŵi jakwe.—Habakuku 2:2, 3.

Naga wawojo kapena mjawo akusimana ni yipwetesi yili yangasawusya kusala kuti Mlungu akuchelewa kutendapo kandu. Kusala yisyene, Baibulo jikusatusimichisya kuti, “Yehofa ngakuchelewa kukwanilisya yilanga yakwe mpela mwakusaŵechetela ŵandu ŵane, nambo ali jwakuwusimana mtima ni m’weji ligongo ngakusaka kuti jwalijose ajonasiche nambo ŵandu wosope apitikuche mtima.”—2 Petulo 3:9.

ANA MLUNGU CHACHIMASYA YIPWETESI CHAKACHI?

Yipwetesi chiyimale pachangakaŵapa. Yesu jwasasile kuti mpago wine uchilola yakutendekwa yakulekanganalekangana yakulosya kuti tuli m’masiku gambesi ga “ndaŵi ajino.” (Mateyu 24:3-42) Kwanilichikwa kwa maloŵe gaŵaŵechete Yesuga kukulosya kuti Mlungu chamasye yipwetesi yakusimana nayo ŵandu pachangakaŵapa.a

Nambo ana Mlungu chachimasya chamtuli yipwetesi yosopeyi? Yesu paŵaliji pachilambo chapasi ŵalosisye machili ga Mlungu gakumasya yipwetesi ya ŵandu. Kwende tulole yindu yine yaŵatesile.

Ngosi Syachilengedwe. Yesu ni ŵandumetume ŵakwe paŵaliji pa nyasa ja Galileya, chatesile chimbungo chachasigele panandi kutiŵisya liboti lyawo. Nambope Yesu ŵalosisye kuti jwalakwe ni Atatigwe mpaka amasye ngosi syachilengedwe. (Akolose 1:15, 16) Yesu jwagambile kuŵecheta kuti, “Mjile jii! Mtende bata!” Ana yakuyichisya yakwe yaliji yamtuli? “Kaneko chimbungocho chatondweŵe mwamti panyasapo patesile bata.”—Maliko 4:35-39.

Yilwele. Yesu jwamanyiche ligongo lyakusachilila kwaposya ŵandu ŵangalola, ŵalemale, ŵaulwele wakugwa, ŵamatana nambosoni yilwele yine ya mtundu wuliwose. “Jwalakwe ŵaposisye ŵandu wosope ŵaŵalagaga ni yilwele.”—Mateyu 4:23, 24; 8:16; 11:2-5.

Sala. Yesu ŵakamulichisye masengo machili gaŵampele Atatigwe pakutupiya yakulya yamnono. Baibulo jikusasala kuti kaŵilikose, jwalakwe jwalisisye ŵandu ŵajinji.—Mateyu 14:14-21; 15:32-38.

Chiwa. Yayalembedwe pakwamba yaŵatesile Yesu pakwimusya ŵandu ŵatatu ŵaŵawile, yikulosya chenene kuti Yehofa akwete machili gakumasya chiwa. Mundu jumo mwa ŵandu ŵeleŵa, ŵamjimwisye pali pamasile masiku mcheche.—Maliko 5:35-42; Luka 7:11-16; Yohane 11:3-44.