Tuli Ŵakwe ŵa Yehofa
“Wakusangalala uli mtundu wele Mlungu jwawo ali Yehofa, ŵandu ŵasagulidwe kuŵa ŵakwe.”—SAL. 33:12.
1. Ligongo cici mpaka tujile kuti Yehofa ali msyene yindu yosope? (Alole ciwulili cacili penanipa.)
YINDU yosope yili ya Yehofa! Jwalakwe ali msyene “kwinani ni yindu yosope yayili kweleko, soni cilambo ni yosope yayili mwelemo.” (Deut. 10:14; Ciu. 4:11) Wosopewe tuli cipanje ca Yehofa ligongo ni juŵatupanganyisye. (Sal. 100:3) Nambo mu mbili josope ja ŵandu, Mlungu aŵele ali mkusagula mitundu ja ŵandu kuti jiŵe japajika.
2. Ana ŵani ŵaŵele ali mkukolanjidwa m’Baibulo kuti ali cipanje capajika?
2 Mwambone, Salimo 135 jikusasala ya Yisalayeli jwakala kuŵa “cipanje cakwe capajika.” (Sal. 135:4) Buku ja Hoseya jasasile mkanipaŵe kuti ŵandu ŵane ŵanganaŵa Ayisalayeli caciŵa ŵandu ŵa Yehofa. (Hos. 2:23) Yaŵasasile Hoseya yakwanilicikwe paŵasagwile Yehofa ŵandu ŵane ŵanganaŵa Ayuda kuti akalamulile yalumo ni Klistu kwinani. (Mase. 10:45; Alo. 9:23-26) Ŵandu ŵeleŵa akusakolanjidwa kuti “mtundu weswela” ligongo lyakuti ŵasagulidwe ni msimu weswela, mwamti ali “cipanje capajika.” (1 Pet. 2:9, 10) Nambi wuli ya Aklistu ŵajinji ŵakulupicika ŵakwete cembeceyo cakutama ni umi pacilambo capasi? Yehofa akusiŵakolanga kuti “ŵandu ŵakwe” soni ali “ŵasagulwe ŵakwe.”—Yes. 65:22.
3. (a) Ana ŵani ŵali paunasi wapajika ni Yehofa masiku agano? (b) Ana mungani ajino citutagulilane ya cici?
3 Masiku agano “kakuga kangondolo,” soni “ŵangondolo sine” akusapanganya “likuga limo” lyele Yehofa akusaliwona kuŵa lyakusosekwa mnope. (Luk. 12:32; Yoh. 10:16) Tukusosekwa kumlosya Yehofa kuyamicila kwetu ligongo lyakuŵa paunasi wapajika ni jwalakwe. Ngani ajino cijisale matala gakulekanganalekangana gampaka tulocesye kuyamicila kwetu ligongo lyakutucimbicisya kweleku.
TWALIPELECE ACIMSYEWE KWA YEHOFA
4. Ana mpaka tum’yamicile camtuli Yehofa ligongo lyakutukunda kuŵa paunasi ni jwalakwe, soni ana Yesu ŵalosisye camtuli yeleyi?
4 Tukusalosya kuyamicila mwakulipeleka kwa Yehofa ni mtima wosope. Kubatiswa kwetu m’mesi kukusalosya pelanga kuti tuli ŵa Yehofa soni kuti twalipelece kwa jwalakwe. (Ahe. 12:9) Yesu jwatesile yakulandana ni yeleyi mwakubatiswa. Jwalakwe ŵamsalile Yehofa kuti, “Ngusasangalalaga kutenda lisosa lyawo, wawo Mlungu jwangu.” (Sal. 40:7, 8) Jwalakwe jwalipelece jika kwa Yehofa atamose kuti ŵapagwile mu msinda wa ŵandu ŵaŵatendaga lisosa lya Yehofa.
5, 6. (a) Ana Yehofa jwapikene wuli mumtima Yesu ali abatiswe? (b) Apelece cisyasyo cakulosya kuti Yehofa akusayamicila kulipeleka kwetu atamose kuti yindu yosope yili yakwe.
5 Ana Yehofa jwapikene wuli mumtima Yesu ali abatiswe? Baibulo jikusasala kuti, “Ali abatiswe, Yesu ndaŵi jijojo ŵacuwice m’mesimo, pelepo kwinani kwawugwice, ni Yohane ŵawuweni msimu wa Mlungu wakuwoneka mpela ngunda uli mkutuluka ni kutula pa jwalakwe. Kaneko papikanice maloŵe kutyocela kwinani gacitiji, ‘Aju ali Mwanangu jwakunonyelwa, jwangusasangalala najo.’” (Mat. 3:16, 17) Atamose kuti Yesu jwaliji mwanace jwa Yehofa, nambope Yehofa jwasangalele kum’wona Yesujo ali mkupeleka umi wakwe kuti amtumicileje. Yehofa akusapocela ucimbicimbi naga tuli tupelece umi wetu kwa jwalakwe kuti tumtumicileje soni akusatupa majali.—Sal. 149:4.
6 Tuwanicisye kuti Mtati ampele bisiketi mwanagwe jwamkongwe. Kaneko mwanacejo akwagaŵila Atatigwewo bisiketijo. Atamose kuti bisiketijo jaliji kala ja babagwewo, nambo mpaka am’yamicile mwanacejo ligongo lyakwagaŵila. Mtatiju mpaka aŵe jwakusangalala mnope. Mwakulandana ni yeleyi, Yehofa akusaŵa jwakusangalala mnope naga tukulipeleka kwa jwalakwe ni mtima wosope atamose kuti tuli kala ŵakwe.—Eks. 34:14.
7. Ana Malaki jwalembile yamtuli pakwamba mwakusapikanila Yehofa mumtima kwa ŵandu ŵakusasacilila kumtumicila jwalakwe?
7 Aŵalanje Malaki 3:16. Naga wawojo nganaŵe kulipeleka soni kubatiswa, akusosekwa aganicisye cenene ya nganiji. Kusala yisyene, paŵagambile kupagwa, ndaŵi jijojo ŵaŵele jwa Yehofa mpela muŵaŵelele ŵandu ŵane. Nambo aganicisye mwampaka yipelecele ucimbicimbi kwa Yehofa naga alipelece jika mwakubatiswa kuti atendeje lisosa lyakwe. (Miy. 23:15) Yehofa akusiŵamanyilila ŵandu ŵakusamtumicila jwalakwe mwakusacilila soni mena gawo akusagalemba mu “buku ja cikumbucilo.”
8, 9. Ana Yehofa akusasaka kuti ŵandu ŵalembedwe mena gawo mu “buku ja cikumbucilo” atendeje cici?
8 Tukusosekwa kutenda yindu yine yakwe kuti Yehofa ajendelecele kusunga lina lyetu mu “buku ja cikumbucilo.” Kuti yeleyi yikombolece, Malaki jwaŵecete kuti tukusosekwa ‘kogopa Yehofa, ni kuganicisyaga ya lina lyakwe.’ Naga tukulambila mundu jwine kapena cindu cine cilicose, yicitendekasya kuti lina lyetu alityosye mu buku ja umi.—Eks. 32:33; Sal. 69:28.
9 Kulipeleka kwetu kwa Yehofa kukusasaka yejinji kupunda kwamba kusimicisya kuti tucitenda lisosa lya jwalakwe mwa kubatiswa m’mesi. Kulipelekaku kukusatendekwa kamope, nambo kumlambila Yehofa kukusatendekwa kwa umi wetu wosope. Kutandila apanopano mpaka msogolo, mpela ŵandu ŵatuli kumbali ja Yehofa, tukusosekwa kwendelecelape kulosya mtima wakupikanila.—1 Pet. 4:1, 2.
TUKUSAYIKANA YAKUMBILA YA KUCILAMBO
10. Ana pana kulekangana kwamtuli pasikati pa wosope ŵakutumicila Yehofa ni ŵangakusatumicila?
10 Mungani jipite jila twalijiganyisye yakutendekwa ya m’Baibulo yakwamba Kaini, Solomo soni Ayisalayeli. Wosopeŵa ŵalambilaga Yehofa nambo ŵaliji ŵangakulupicika kwa jwalakwe. Yisyasyo ya ŵandu ŵeleŵa yikutujiganya kuti nganikuŵa kwakwanila kwamba kuŵeceta kuti tukusamlambila Yehofa, nambo tukusosekwa kuŵa ŵacilungamo ni kuyiŵengaga yakusakala. (Alo. 12:9) Yehofa ŵasasile kuti tucimanyilila ‘kulekangana pasikati pa mundu jwakulungama ni jwakusakala soni pasikati pa mundu jwakusamtumicila Mlungu ni jwangakusamtumicila.’—Mal. 3:18.
11. Ligongo cici yili yakusosekwa mnope kuti ŵandu ŵane atumanyilileje kuti tuli Ŵamboni sya Yehofa?
11 Panasoni litala line lyampaka tulocesye kuyamicila ligongo lyakuti Yehofa ŵatusagwile kuŵa ŵandu ŵakwe. Kwawula kwetu pasogolo mwausimu, kukusosekwa ‘kuwonecela kwa ŵandu wosope.’ (1 Tim. 4:15; Mat. 5:16) Aliwusyeje kuti, ‘Ana kulupicika kwangu kwa Yehofa kukusawonecelaga kwa ŵandu ŵane? Ana ngusasangalala kwasalila ŵandu ŵane kuti ndili jwa Mboni sya Yehofa?’ Yehofa mpaka yimpwetece mnope naga ali atuweni tuli mkutenda sooni kwasalila ŵane kuti tuli ŵa Mboni sya Yehofa, citamileco jwalakwe ali atusagwile kuŵa ŵandu ŵakwe.—Sal. 119:46; aŵalanje Maliko 8:38.
Ana kawale soni kalisalalisye kawo kakusikamanyikasya kuti ali jumo jwa Mboni sya Yehofa? (Alole ndime 12, 13)
12, 13. Ana ligongo cici yikusaŵa yakusawusya kwamanyilila ŵandu ŵane kuti ali Ŵamboni sya Yehofa?
12 Yili yakutesya canasa kuti Ŵamboni sya Yehofa ŵane akusakuya “msimu wa cilambo.” Yakuyicisya yakwe akusatenda yindu yakulandana ni yakusatenda ŵandu ŵangatumicila Yehofa. (1 Akoli. 2:12) “Msimu wacilambo” ukusiwatendekasya ŵandu kola nganisyo syakutenda yakumbila ya cilu. (Aef. 2:3) Mwambone, atamose kuti tukusapocela cikamucisyo cakutukalamusya kuti tukusosekwa kuŵambala msimu wa cilambo, nambope ŵane akusasagula melepe kawale soni kalisalalisye kangaŵajilwa. Jemanjaji akusanonyela kuwala yakuwala yakanganika soni yakuwonecela mkati atamose ali ku yakutendekwa ya Ciklistu. Nambosoni akusasyasyaga masitayilo ga kasenje soni katiŵe ka umbo kakucilamboku. (1 Tim. 2:9, 10) Yakuyicisya yakwe, naga atemi pa likuga lya ŵandu, yikusaŵa yakusawusya kwamanyilila naga ali Ŵamboni sya Yehofa kapena iyayi.—Yak. 4:4.
13 Panasoni Ŵamboni sya Yehofa ŵane ŵanganaŵe kulekangana ni cilambo. Yeleyi yili m’yoyo ligongo lyakuti kaŵine kawo soni katende ka yindu pali kucindimba yikusaŵa yakupundanganya malile. Jemanjaji akusaŵika yiwulili soni ndemanga syawo pamalo gakungulucila ga pa intaneti yasikusalosya kuti nganaŵa ŵandu ŵausimu. Komboleka kuti jemanjaji nganiŵajamuceje kumpingo kuti atesile ulemwa, nambo ndamo syawo mpaka syatendekasye acimjawo ŵakulingalinga kuŵa paunasi wambone ni Yehofa kola nganisyo syakusakala.—Aŵalanje 1 Petulo 2:11, 12.
Akasakunda kuti ŵandu ŵanganaŵa ku mbali ja Yehofa ŵasokonasye
14. Ana ni cindu capi cakusosekwa campaka tutende kuti tuwucenjele unasi wetu ni Yehofa?
14 Cilamboci cikusicatendekasya ŵandu kuŵika nganisyo syawo pa “yakumbila ya cilu, yakumbila ya meso ni kulilosya ni yindu yakwete mundu paumi wakwe.” (1 Yoh. 2:16) Ligongo lyakuti tuli ŵakwe wa Yehofa ndaŵi syosope tukusalimbikasidwa “kuleka umi wangamcimbicisya Mlungu, yakumbila ya pacilambo capasi, soni kuti tukole nganisyo syambone, tuŵe ŵakulungama soni ŵakulipeleka kwa Mlungu mu ndaŵi ajino.” (Tito 2:12) Yatukusaŵeceta, kalye ketu, kamwe, kawale, kalisalalisye, yatukusatenda ku masengo kapena cilicose catukusatenda, ndaŵi syosope yilosyeje kuti twalipelece kwa Yehofa.—Aŵalanje 1 Akolinto 10:31, 32.
“ANONYELANEJE MNOPE”
15. Ligongo cici tukusosekwa kutenda yindu mwacinonyelo ni ŵakulambila acimjetu?
15 Kuyamicila kwetu unasi wapajika watukwete ni Yehofa kukusawonecela mwatukutendela yindu ni ŵakulambila acimjetu. Jemanjajisoni ali ku mbali ja Yehofa. Naga tukumanyilila yeleyi, yicitutendekasya ndaŵi syosope kwalosya cinonyelo abale ni alongo ŵetu. (1 Ates. 5:15) Yesu ŵasalile ŵakumkuya ŵakwe kuti, “Mwakutenda yeleyi, wosope cacimanyilila kuti ali ŵakulijiganya ŵangu, naga akusanonyelana.”—Yoh. 13:35.
16. Ana Cilamusi ca Mose casalaga yamtuli pakwamba mwaŵawonelaga Yehofa ŵandu ŵakwe?
16 Kuti tupikanicisye ligongo lyakwe tukusosekwa kola cinonyelo kwa jwine ni mjakwe mumpingo, kwende tulole cisyasyo cakuyicisyaci. Ku nyumba jakulambilila ja Mlungu, kwapali yindu yaŵayikamulicisyaga masengo pakulambila. Cilamusi ca Mose casasile kakamulicisye masengo ka yindu yeleyi, soni jwalijose jwakasa lilamusili jwawulajidwaga. (Num. 1:50, 51) Naga Yehofa ŵasamalaga mnope yindu yangali umi yaŵakamulicisyaga masengo m’nyumba jakwe jakulambilila, nikuti jwalakwe cacasamala mnope ŵandu ŵane ŵakulupicika ŵali ku mbali jakwe. Pakuŵeceta ni ŵandu ŵakwe, Yehofa jwasasile kuti, “Pakuŵa jwalijose jwakumkwaya jemanja, nikuti akukwaya mwanace jwa liso lyangu.”—Zek. 2:8.
17. Ana Yehofa ‘akupikana’ soni kumanyilila cici?
17 Malaki ŵaŵecete kuti Yehofa ‘akusapikana’ yakuŵeceta ya ŵandu ŵakwe. (Mal. 3:16) Yisyene, Yehofa “akusamanyilila ŵandu ŵakwe.” (2 Tim. 2:19) Jwalakwe akusayiwona yiliyose yatukusatenda soni kuŵeceta. (Ahe. 4:13) Naga ngatukusitwalosya umbone mtima ŵakulambila acimjetu, tumanyilileje kuti Yehofa akusamanyilila yeleyi. Naga tukusitwapocela cenene acalendo, kuŵa ŵakoloŵa magasa, kwakululucila ŵane soni kwalosya umbone mtima, tumanyililejesoni kuti Yehofa akusayiwonaga yeleyi.—Ahe. 13:16; 1 Pet. 4:8, 9.
“YEHOFA NGASIŴALEKA ŴANDU ŴAKWE”
18. Ana mpaka tum’yamicile camtuli Yehofa ligongo lyakuŵa ŵandu ŵakwe?
18 Kuŵeceta yisyene, tuli ŵakusacilila kuyamicila Yehofa ligongo lyakuti tuli ŵandu ŵakwe. Tukusamanyililaga kuti patwapelece umi wetu kwa Yehofa, nikuti twatesile cisagula calunda. Atamose kuti tukutama pasikati pa “mbagwilo sya ŵandu ŵaunami soni ŵakwasokonasya acimjawo,” tukusaka kuti ŵandu atuwone kuti, tuli “ŵangalemwa soni ŵangali ligongo lyakutulambucisya, . . . ŵakuŵala mpela yakumulicila m’cilambo.” (Afi. 2:15) Yili yisyene kuti tukutama pasikati pa ŵandu ŵakusakala, nambope tukusosekwa kuyiŵambala yakusayiŵenga Yehofa. (Yak 4:7) Pakumanyilila kuti wosopewe tuli ku mbali ja Yehofa, ni ligongo lyakwe tukusitwanonyela soni kwacimbicisya ŵakulambila acimjetu.—Alo. 12:10.
19. Ana Yehofa akusiŵapa mbote mwamtuli ŵandu ŵali ku mbali jakwe?
19 Baibulo jasasile kuti, “Yehofa ngasiŵaleka ŵandu ŵakwe.” (Sal. 94:14) Maloŵe gelega gali gakusimicisya kuti atamose yili yisawisye camtuli Yehofa ngasatuleka. Atamose tuli tuwile Yehofa ngasatuliŵalila. (Alo. 8:38, 39) “Naga tuli ni umi, tuli umi mwa Yehofa, naga tukuwa, tukuwa mwa Yehofa. M’yoyo cinga tukutama ni umi kapena tukuwa, nambo tuli ŵa Yehofa.” (Alo. 14:8) Tukwembeceya mwalung’wanu ndaŵi jele Yehofa cacajimusya ŵakunonyelwa ŵetu ŵaŵawile kalakala. (Mat. 22:32) Nambo atamose ndaŵi ajino tukusangalala ni majali gamajinji gakutyocela kwa Yehofa. Mpela mwajikusaŵecetela Baibulo kuti, “Wakusangalala uli mtundu wele Mlungu jwawo ali Yehofa, ŵandu ŵasagulidwe kuŵa ŵakwe.”—Sal. 33:12.