Akamulicisyeje Masengo Kabuku Kakuti “Kodi M’Baibulo Muli Nkhani Zotani?”—Kuti Atande Kuŵecetana ni Mundu
1. Ana tupocele cida catuli cakutukamucisya mu undumetume?
1 Caka acino pamsongano waupande twasangalele kupocela kabuku kakuti “Kodi M’Baibulo Muli Nkhani Zotani?” Ana mpaka tukamulicisye masengo catuli cida casambanoci pakukosecela yacitukaŵecete mu undumetume? Pakuŵa kabukuka akalembile mwakuŵika malemba m’makuga mwakamulana ni ngani sya m’Baibulo syakulekanganalekangana, mpela mwayiŵelele mu buku ja Kukambitsirana, mpaka jiŵe jakamucisya kutanda kuŵecetana ni mundu.
2. Ana mpaka tukamulicisye masengo catuli kabuku kakuti “Kodi M’Baibulo Muli Nkhani Zotani? mu undumetume?
2 Komboleka kamulicisya masengo ciwusyo ca 8 kaneko nikuŵeceta kuti: “Tukunguluka mwakata ni acimjetu pakwamba yaciwusyo cakusaliwusya ŵandu ŵajinji cakuti, ‘Ana Mlungu ni jwakutandisya yipwetesi ya ŵandu?’ [M’mikuli jine, yikusaŵa yakamucisya mnope kumlosya msyene nyumba ciwusyoco.] Ana wawo akuganisya wuli? [Ajembeceye kuti ajanje.] Baibulo jikusajanga cenene ciwusyo celeci.” Aŵalanje ni kutagulilana lilemba limo kapena malemba gane kutyocela m’Baibulo gagakusimanikwa pelepo. Naga msyenenyumba akusaka kumanyilila yejinji, komboleka kumlosya yiwusyo 20 yayili m’kabukuka nikum’ŵenda kuti asagule cimo cakuti catagulilane ulendo wakuyicisya. Kapena komboleka kumpa jimo mwa mabuku getu gakwiganyila jajikusala yejinji ya ngani jagambile kutagulilana kwene.
3. Ana mpaka tukamulicisye masengo catuli kabuku kakuti “Kodi M’Baibulo Muli Nkhani Zotani?” pakutandisya kuŵecetana ni mundu m’mikuli mwele ŵandu ŵakwe nganaŵa mu dini sya Ciklistu?
3 Yiwusyo 4, 13 mpaka 17 mpaka yiŵe yakamucisya mnope pakulalicila mumkuli wele ŵandu ŵakwe nganaŵa mu dini sya Ciklistu. Mwambone, komboleka kamulicisya masengo ngani jajili mu ciwusyo 17 nikuŵeceta kuti: “Tukutagulilana ni ŵandu mwakata pakwamba ya yakamucisya maŵasa. Ana ngakwiticisya kuti maŵasa lelo jino gakusimana ni yakusawusya yejinji? [Ajembeceye kuti ajanje.] Maŵasa gejinji gayiweni kuti maloŵe galunda aga gali gakamucisya: “Jwamkongwe jwalijose amcimbicisyeje [mnope] jwamlume jwakwe.” [Ngakusosekwa kolanga kuti maloŵega gatyocele pa Aefeso 5:33. Naga akuŵeceta kwa jwamkongwe, komboleka kusala maloŵe ga pa Aefeso 5:28.] Ana akuganisya kuti kamulicisya masengo maloŵega mpaka kuŵe kwakamucisya mu ulombela?
4. Ana kumbesi kwa kutagulilana kwawo ni mundu jwanganaŵa mu dini ja Ciklistu mpaka atende cici?
4 Kumbesi kwa kutagulilana kwawo alinganye yakuti cajendelecele kutagulilana ndaŵi jine. Komboleka kulinganya yakuti catagulilane lilemba line lya pa ciwusyo catagulileneje. Pandaŵi jakuŵajilwa, ammanyisye msyenenyumbajo kuti maloŵe galunda gaŵele mkutagulilanago gakutyocela m’Baibulo. Mwakamulana ni yaŵele mkuŵecetana, soni mwakusajiwonela mundujo Baibulo, ampe buku jakujiwona wawojo kuti mpaka asangalale najo.—Alole ngani jajikusimanikwa pa mapeji 3 mpaka 6 mu Undumetume wa Ucimwene wa December 2013.