UMI WETU WACIKLISTU
Tulosyeje Ndamo Syapenani sya Yehofa
Yehofa apelece ndamo syapenani kwa ŵandu. Mwambone, jwalakwe akusasala kuti ulombela uli mkamulano wangamala wa ŵandu ŵaŵili, jwamlume ni jwamkongwe. (Mat. 19:4-6, 9) Yehofa akusaŵengana ni yamsese ya mtundu uliwose. (1 Akoli. 6:9, 10) Jwalakwe akusapelekasoni malamusi ga kawale soni kalisalalisye yayikusalekanganya ŵandu ŵakwe ni ŵandu ŵane.—Deut. 22:5; 1 Tim. 2:9, 10.
Masiku agano, ŵandu ŵajinji ŵangakuya ndamo syapenani sya Yehofa. (Alo. 1:18-32) Jemanjaji akusakunda nganisyo syasiwandile mnope kucilamboku kulamulila kawale, kalisalalisye, soni ndamo syawo. Ŵandu ŵajinji akusatenda yakulemwecekayi pelanga soni kwanyosya ŵandu ŵakwete ndamo syambone.—1 Pet. 4:3, 4.
Ŵamboni sya Yehofawe, mwakulimba mtima tukusosekwa kulosyaga ndamo syapenani sya Mlungu. (Alo. 12:9) Mwamtuli? Tukusosekwa tumanyiceje ni ndamo syakusasijiticisya jwalakwe, nambosoni kwendelecela kulosya ndamo syapenanisi pa umi wetu. Mwambone, patukusagula mtundu winewakwe wa cakuwala kapena kalisalalisye, tuliwusyeje kuti, ‘Ana yakusagula yanguyi yikulosya ndamo syapenani sya Yehofa kapena ndamo syakucilambo? Ana kawale soni kalisalalisye kangu yikulosya kuti ndili Mklistu jwakogopa Mlungu?’ Kapena patukusagula yatukusapikanila kapena yatukusalolela tuliwusyeje kuti, ‘Ana Yehofa mpaka asangalale ni yeleyi? Ana yeleyi yikulimbikasya ndamo syambone kapena syakusakala? Ana yakusagula yangu payakusangalasya yikunjonanjila ndamo syambone? (Sal. 101:3) Ana mpaka yakuŵasye ŵa mwiŵasa mwangu kapena ŵandu ŵane?’—1 Akoli. 10:31-33.
Ligongo cici tukusosekwa kulosyaga ndamo syapenani sya Yehofa? Pacangakaŵapa, Klistu Yesu cajonanje ŵandu wosope ŵakusakala. (Ezek. 9:4-7) Ŵandu ŵakutenda yakusasaka Mlungu ni ŵacacikulupuka. (1 Yoh. 2:15-17) Kwende tulosyeje ndamo syapenani sya Yehofa kuti ŵandu ŵakulola ni meso gawo yitendo yetu yambone amcimbicisye Mlungu.—1 Pet. 2:11, 12).
Ana yakusagula yangu pa ngani ja kawale soni kalisalalisye yikusalosya cici pakwamba ya ndamo syangu?
ALOSYE FIDIYO JAKUTI AŴE MJAKWE JWA YEHOFA—JWAMLUME JUMO, JWAMKONGWE JUMO, KANEKO ATAGULILANE YIWUSYO YAKUYICISYAYI:
Ligongo cici luli lunda kutenda yindu mwakamulana ni ndamo sya penani sya Yehofa?
Ligongo cici acinangolo akusosekwa kutanda kwajiganya ŵanace ŵawo ndamo syapenani sya Yehofa ali ŵacinandipile?
Ana ŵanace soni ŵacikulile mpaka ŵakamucisye camtuli ŵandu kumanyilila umbone wa Mlungu?