Ana ni kwapi kwampaka apate malangiso gakamuchisya?
M’chilambo chatukutamachi, yindu yikusachenga ndaŵi jilijose. Sambano mpaka amanyilile wuli kuti yindu yakusasagula kutenda mpaka yakamuchisye kuti aŵeje ŵakusangalala? Ana mpaka amanyilile wuli kuti yindu yakusayiwona ŵandu kuŵa yambone lelo ngasiyichenga nikuŵa yakusakala malaŵi?
Baibulo mpaka jakamuchisye kuti asaguleje chenene yindu yele ngasalijimba nayo magambo. Ligongo chichi tukuŵecheta yeleyi? Lili ligongo lyakuti Mlungu juŵatupanganyisye ni juŵatupele Baibulo. Jwalakwe akusamanyilila yindu yampaka tutende kuti tuŵeje ŵakusangalala soni kuti tukole sogolo jambone.
Yehofa ‘ŵamlosisye kala . . . chachili chambone.’—Mika 6:8.
Tukusosekwa tukulupilileje mnope maloŵe ga lunda gagakusasimanikwa m’Baibulo. Yili myoyo ligongo lyakuti Baibulo jili jakudalilichika mnope soni ‘jichitamilichika mpaka yaka yosope.’—Salimo 111:8.
Yindu pachilambochi payikupitilisya kuchenga mnope, mpaka atende chenene kulijiganya Baibulo nikulola mwampaka jakumuchisye wawojo paumi wawo.