Yampaka Tutende Kuti Tusangalaleje Patukulalichila

1. Ana ŵandu ŵane akusagawona chamti uli masengo gakulalichila? (Alole chiwulili.)

M’WEJI ŵa Mboni sya Yehofa tukusakamula masengo gakulalichila ligongo lyakumnonyela Yehofa nambosoni ligongo lyakusaka kwakamuchisya achalongo achimjetu kuti ammanyilile jwalakwe. Mwamti abale ni alongo ŵajinji akusasangalala pakukamula masengo gakulalichilaga. Nambope ŵane yikusiyasawusya kukamula masengoga mwakusangalala. Yikusaŵa myoyo, ligongo lyakuti ŵane ali ŵasooni mwachipago. Ŵane akusalikayichila yakwawula ku nyumba ja mundu kukulalichila. Pele ŵane akusajogopa kwawula ku nyumba ja mundu jwanganiŵaŵilanga. Nambosoni ŵane akusajogopa kuti chakatopole pele ŵane akusajogopa yakangana ni ŵandu. Mwangasamala kandu kuti akusamnonyela mnope Yehofa, abale ni alongo ŵeleŵa akusayiwona kuŵa yakusawusya kuti akalalichile ŵandu. Nambope akusamanyilila kuti kulalichila gali masengo gakusosekwa mnope mwamti akusalingalinga kutenda yampaka akombole kuti alalichileje. Kusala yisyene, kutenda yeleyi kukusamtendekasya Yehofa kuŵa jwakusangalala mnope.

2. Naga akulaga kuti aŵeje ŵakusangalala pali mu utumiki, ana ligongo chichi ngakusosekwa kutenguka?

² Ana wawojo ndaŵi sine yikusiyasawusya kukamula masengo gakulalichila mwakusangalala ligongo lya yeleyi? Naga yili myoyo kwa wawojo, akatenguka. Kulikayichila kwawo kukulosya kuti wawojo ali ŵakulinandiya soni ngakusaka kuti aŵe ŵakumanyika pasikati pa ŵandu. Nambosoni kuti ngakusaka yakulimbana ni ŵane. Pangalisoni mundu jwampaka asangalale ni kutopoledwa pakumtendela mundu jwine yambone. Atati ŵawo ŵakwinani akusamanyilila yakusawusya yakusimana nayo mwamti ali ŵakusachilila kwakamuchisya pa yakusawusya yeleyi. (Yes. 41:13) Munganiji chitukambilane mfundo msano syampaka situkamuchisye kumalana ni nganisyosi, nambosoni yatukusosekwa kutenda kuti tukamuleje masengo gakulalichila mwakusangalala.

AKUNDEJE KUTI MALOŴE GA MLUNGU GALIMBIKASYEJE

3. Ana ni chichi chachamkamuchisye jwakulochesya Yelemiya kuti akombole kwalalichila ŵane?

³ Kutandila kalakala, maloŵe ga Mlungu gaŵele gali mkwakamuchisya ŵakutumichila ŵa Mlungu kuti akwanilisyeje utumiki wakusawusya wapegwile. Jumo mwa ŵakutumichilaŵa ali jwakulochesya Yelemiya. Jwalakwe jwalikayichilaga pa masengo gakulalichila gaŵampele Yehofa. Jwalakwe jwatite, “Une ndili mwanache, soni ngingumanyilila kuŵecheta.” (Yel. 1:6) Nambo ana Yelemiya jwamasisye chamti uli kulikayichila kwakweku? Maloŵe ga Mlungu ni gagamkamuchisye jwalakwe. Mwamti jwatite, “Maloŵe ga ŵalakwe gakusakolela mpela moto mu mtima mwangu. Ngusalinjilila kugasunga mu mtima mwangu, nambo panyuma pakwe ngusagakoposya.” (Yel. 20:​8, 9) Atamose kuti ŵandu ŵaŵasosekwaga Yelemiya kwalalichila ŵaliji ŵakusawusya, nambope maloŵe gaŵampele Yehofa kuti alalichile ni gagampele machili jwalakwe kuti akombole kukamula masengoga.

4. Ana pakusapagwa yakuyichisya yamti uli naga tukuŵalanga Maloŵe ga Mlungu soni tukuganichisya yatuŵalasileyo? (Akolose 1:​9, 10)

⁴ Aklistu akusapata machili kutyochela ku Maloŵe ga Mlungu gagali m’Baibulo. Paŵalembelaga Aklistu ŵa ku mpingo ŵa Akolose, ndumetume Paulo jwasasile kuti kumanyilila chenene yakusasaka Mlungu ni kwampaka kwakamuchisye jemanjaji kuti ‘ajendeje mwakamulana ni yakusasaka Yehofa’ nambosoni kuti apitilisye “kusogola yisogosi pa masengo galigose gambone.” (Aŵalanje Akolose 1:​9, 10.) Masengo gambonega gakusapwatikapo kulalichila ngani syambone. Myoyo, patukuŵalanga Maloŵe ga Mlungu ni kuganichisyaga yatuŵalasileyo, chikulupi chetu pa Yehofa chikusalimba, nambosoni tukusaŵa ŵakoseka kulalichila utenga wa Uchimwene wa Mlungu.

5. Ana tukusosekwa kutenda chichi kuti kuŵalanga soni kulijiganya kwetu Baibulo kuŵeje kwakamuchisya mnope?

⁵ Kuti Maloŵe ga Mlungu gatukamuchisyeje chenene, tukusosekwa kuŵambala kuŵalanga, kulijiganya soni kuganichisya yatuŵalasileyo mwakuwutuka. Naga asimene ni lilemba lyalikwasawusya kulipikanichisya aŵambaleje kuliguluka. Mmalomwakwe akamulichisyeje masengo Kabuku Kakamuchisya Kuwungunya Ngani ka Mboni sya Yehofa kapena mabuku gane kuti apate yakuti kalilondesye lilembalyo. Mwamti naga akulijiganya mwangawutuka, yichakamuchisya kukulupilila kuti yakulijiganya kutyochela m’Baibulo yili yisyesyene. (1 Ates. 5:21) Kutenda yeleyi kuchakamuchisya wawojo kuti asangalaleje pakwasalila ŵane yalijiganyisyeyo.

AKOSECHELEJE CHENENE

6. Ligongo chichi tukusosekwa kukosechela chenene patukwawula kukulalichila?

⁶ Naga akukosechela chenene mkanajawule kukulalichila, yichakamuchisya kuti akalalichileje mwangali woga. Yesu ŵakamuchisye ŵakulijiganya ŵakwe kuti akosechele mkaniŵatumisye kukulalichila. (Luk. 10:​1-11) Ligongo lyakuti ŵakamulichisye masengo malangiso gaŵapele Yesu, ŵakuliljiganyaŵa ŵaŵele ŵakusangalala ni yakuyichisya yambone pa masengo gawo gakulalichila.—Luk. 10:17.

7. Ana mpaka tukosechele chamti uli kulalichila? (Alole chiwulili.)

⁷ Ana mpaka tukosechele chamti uli kulalichila? Tukusosekwa kuganichisya mfundo syatukusaka twalalichile ŵandu ni kuja kusiŵecheta m’litala lyakupikanika chenene. Mpaka yiŵesoni yakamuchisya kumanyilila mwampaka atujanjile ŵandu ŵa mudela jetu ni kukosechela yampaka tujanje pa mfundo jilijose jampaka aŵechete. Kaneko patusimene ni ŵandu tulinjeje kuŵa ŵagopoka, tumwetulileje nambosoni tuŵeje ŵakunguluchika.

8. Ana Aklistu ali mpela yiŵiga yaŵayisasile Paulo m’litala lyapi?

⁸ Pakwalondechesya achimjakwe ya masengo gakulalichilaga, Paulo jwatite, “Twapochele masengo gakusosekwa mnope gelega atamose kuti tugambile kuŵa mpela yiŵiga yakunyakulila chipanje.” (2 Akoli. 4:7) Ana chipanje chelechi chili chichi? Gali masengo gakulalichila ya Uchimwene wa Mlungu gagakusakulupusya umi ŵa ŵandu. (2 Akoli. 4:1) Nambi yiŵigayi yikwimila chichi? Yikwimila ŵakutumichila ŵa Mlungu ŵakusakamula masengo gakulalichilaga. Mu ndaŵi ja ndumetume Paulo, ŵandu ŵamalonda ŵakamulichisyaga masengo yiŵiga pakunyakulila katundu jwakusosekwa mnope mpela yakulya, finyo nambosoni mbiya. Mwakulandanamo, Yehofa atupele utenga wakusosekwa mnope wa ngani syambone kuti twalalichileje ŵandu ŵane. Mwamti ni chikamuchisyo cha Yehofa mpaka tupate machili gakutukamuchisya kuti tukombole kulalichila ngani syambone mwakulupichika.

AMŴENDEJE YEHOFA KUTI ŴAKAMUCHISYE KUŴA ŴAKULIMBA MTIMA

9. Ana mpaka tumalane chamti uli ni kwajogopa ŵandu kapena kogopa kutopoledwa? (Alole chiwulili.)

⁹ Ndaŵi sine mpaka twajogopeje ŵandu kapena kogopa kuti ngapikanila utenga wetu. Nambo ana mpaka tumalane chamti uli ni woga welewu? Aganichisye ya lipopelo liŵaŵendile ŵandumetume pandaŵi jiŵasalilidwe kuti aleche kulalichila. Mmalo mwakwajogopa ŵandu, jemanjaji ŵamŵendile Yehofa kuti ŵakamuchisye kuti “aŵecheteje maloŵe [gakwe] mwakulimba mtima.” Yehofa ŵajanjile lipopelo lyawo ndaŵi jijojo. (Mase. 4:​18, 29, 31) Nombe m’weji ndaŵi sine pawutukamwile woga tukusosekwa kupopela kwa Yehofa kuti atukamuchisye. Tumŵendeje Yehofa kuti atukamuchisye kupitilisya kwanonyela ŵandu yampaka yitukamuchisye kuti tukajogopaga kwalalichila.

10. Ana Yehofa akusatukamuchisya chamti uli kuti tukwanilisye mbali jetu jakutendela umboni? (Yesaya 43:​10-12)

¹⁰ Yehofa ŵatusagwile m’weji kuti tuŵe Mboni syakwe nambosoni ŵasasile kuti chatukamuchisyeje kuti tuŵe ŵakulimba mtima. (Aŵalanje Yesaya 43:​10-12.) Aganichisye ya matala mcheche gakusakamulichisya masengo jwalakwe pakutukamuchisya. Litala lyandanda, Yesu akusaŵa ni m’weji kulikose kwatukusalalichila ngani syambone. (Mat. 28:​18-20) Litala lyaŵili, Yehofa asagwile malayika gakuti gatukamuchisyeje pa masengo gakulalichila. (Chiw. 14:6) Litala lyatatu, Yehofa atupele msimu wakwe weswela kuti utukamuchisyeje kukumbuchila yatulijiganyisye. (Yoh. 14:​25, 26) Nambosoni litala lyamcheche, Yehofa atupele abale ni alongo ŵatukusajenda nawo pakulalichila. Kusala yisyene, ni chikamuchisyo cha Yehofa soni cha abale ni alongo, mpakana tukombole kukamula chenene masengo gakulalichila.

AŴEJE ŴAKOSEKA KUCHENGA SONI AKOLEJE NGANISYO SYAMBONE

11. Ana tukusosekwa kutenda chichi kuti twasimaneje ŵandu ŵajinji patukulalichila? (Alole chiwulili.)

¹¹ Ana akusatenguka naga nganiŵasimana ŵandu ŵajinji mnyumba syawo? Mpaka yiŵe chenene pandaŵi jeleji kuliwusya kuti, ‘Ana ŵandu ŵa mugawo jangu akusasimanikwa kwapi pandaŵi jeleji?’ (Mase. 16:13) ‘Ana kapena akusaŵa ali apite ku msika?’ Naga yili myoyo, uli ngalinga kutenda ulaliki wa mumsewu ni chakulinga chakuti asimaneje ni ŵandu ŵajinji. M’bale jwine lina lyakwe Joshua jwasasile kuti, “Ngusachenga ulaliki wangu mwakulalichila mumsewu nambosoni ku malo gakusimanikwa ŵandu ŵajinji.” Jwalakwe ni ŵamkwakwe lina lyawo Bridget akusanonyela kulalichila m’magulo nambosoni Lyamlungu musi. Jemanjaji akusatenda yeleyi ligongo ndaŵi jeleji ni pakusasimana ni ŵandu ŵajinji.—Aef. 5:​15, 16.

12. Ana mpaka tumanyilile chamti uli yakusakulupilila ŵandu nambosoni yayikwalagasya nganisyo?

¹² Naga ŵandu ngakulosya chidwi ni utenga wakulalichila, mpaka atende chenene kuganichisya yakusakulupilila soni yayikusiyalagasya nganisyo ŵanduwo. M’bale Joshua ni ŵamkwakwe pakukambilana ni ŵandu, akusakamulichisya masengo chiwusyo chachili pandanda pa kapepala kakukamulichisya masengo pakulalichila. Mwachisyasyo, pakukamulichisya masengo kapepala kakuti Ana Baibulo Jili Buku Jamtuli? Jemanjaji akusatanda ni maloŵe gakuti, “Ŵandu ŵane akusajiwona Baibulo kuti jili buku jakutyochela kwa Mlungu nambo ŵane ŵangayiwona myoyo. Wawojo akuganisya uli?” Yeleyi yikusakamuchisya kuti atande kukambilana ni mundujo mwangasawusya.

13. Ligongo chichi mpaka tusale kuti yindu yikutujendela chenene patukulalichila atamose yili mkuti ŵandu ngakupikanila utenga wetu? (Misyungu 27:11)

¹³ Atamose yili mkuti ŵandu nganapikanila utenga wetu, chakulinga chetu chikusaŵa kuti chikwanilichikwe. Tukuŵecheta yeleyi ligongo lyakuti tukusaŵa kuti tutesile yakusasaka Yehofa soni Yesu. Tukusaŵa kuti tutendele umboni. (Mase. 10:42) Atamose yili mkuti nganitupata mundu jwakumlalichila, kapena ŵandu akanile utenga wetu, tukusaŵape ŵakusangalala ligongo yikusaŵa kuti tutesile yindu yakwasangalasya Atati ŵetu ŵakwinani.—Aŵalanje Misyungu 27:11.

14. Ligongo chichi tukusosekwa kuŵa ŵakusangalala jwakulalichila mjetu pampatile mundu jwakusaka kulijiganya Baibulo?

¹⁴ Tukusasosekwa kuŵa ŵakusangalala Mklistu mjetu papatile mundu jwakusaka kulijiganya Baibulo. Sanja ja Mlonda jine jasasile kuti masengo gakulalichila gakusalandana ni kusosa mwanache jwasokonechele. Ŵandu ŵajinji akusajigala mbali pakumsosasosa mwanachejo. Mwamti mwanachejo papatikene wosope akusasangalala ngaŵa mundu jwapatile mwanache pejo. Mwakulandanamo, masengo gakupanganya ŵakulijiganya gali ga abale ni alongo wosope. Jwalijose pa mpingo akusaŵa jwakusosekwa kuti akombole kwalalichila ŵandu wosope mu gawo ja mpingo wawo. Mwamti tukusaŵa ŵakusangalala naga mundu jwine atandite kusimanikwa pa misongano.

AMNONYELEJE MNOPE YEHOFA SONI ŴANDU

15. Ligongo chichi kukamulichisya masengo lilemba lya Mateyu 22:​37-39 mpaka kutukamuchisye kuŵa ŵakulipeleka pa masengo gakulalichila? (Alole chiwulili cha pachikuto.)

¹⁵ Mpaka tupitilisye kukola mtima wakusachilila kukamula masengo gakulalichila naga tukumnonyela mnope Yehofa soni ŵandu. (Aŵalanje Mateyu 22:​37-39.) Kusala yisyene, Yehofa akusaŵa jwakusangalala mnope pakutuwona tuli mkukamula masengoga. Nambosoni ŵandu akusaŵa ŵakusangalala patandite kulijiganya Baibulo. Agambe kuganichisyasoni ya chembecheyo chakusangalasya chakwete ŵandu ŵatandite kulijiganya Baibulo chakuti chachitama kwangamala pachilambopa.—Yoh. 6:40; 1 Tim. 4:16.

16. Ana mpaka tuŵe chamti uli ŵakusangalala pa masengo getu gakulalichila atamose yili mkuti tukulepela kutyoka pa nyumba jetu? Apeleche yisyasyo.

¹⁶ Ana yili yakusawusya kwa wawojo kutyoka pa nyumba jawo pamagongo gane? Naga yili myoyo aganichisyeje yampaka akombole kutenda kuti alosye kuti akusamnonyela Yehofa soni ŵandu. Mu ndaŵi ja mlili wa COVID-19, yaliji yakusawusya kuti Samuel ni ŵamkwakwe lina lyawo Dania atyoche panyumba jawo. Nambope mundaŵi josope jakusawusyaji, jemanjaji ŵalalichilaga mwakutamilichika. Ŵatendaga yeleyi mwakwimba foni, kulemba yikalata nambosoni ŵatendesyaga majiganyo ga Baibulo kupitila pa Zoom. M’bale Samuel jwalalichilagasoni ŵandu ŵaŵasimanaga nawo ku chipatala papite kukupochela chikamuchisyo cha mtela pa ulwele wakwe wa kansa. Mwamti jwalakwe jwatite, “Kusala yisyene, mundu pasimene ni yakusawusya, akusatenguka, kulagasika nganisyo nambosoni chikulupi chakwe chikusalinjidwa. Myoyo, tukusasosekwa kumtumichila Yehofa kuti tuŵe ŵakusangalala.” Nambosoni mkatikati mwa mliliwu, Dania jwalwasile ulwele wa kuwa yiŵalo mwamti nganakombolaga kwimuka pa bedi jakwe kwa myesi jitatu. Kupwatika pelepa, kwa myesi 6 jwaŵele ali mkwendela njinga ja ŵalemale. Pakulondesya yandamo jakweji jwalakwe jwatite, “Natendaga yiliyose yampaka ngombole mwakamulana ni ndamo jinaliji. Mwamti nakombolaga kwalalichila adokotala ŵakongwe ŵaŵangamuchisyaga. Nalalichilagasoni ŵandu ŵaŵayikaga ni yindu ku nyumba jangu nambosoni nalalichilaga ŵandu ŵaŵayikaga ni yipangiso ya mtela kutyochela ku kampani jakulinganya mitela.” Kusala yisyene yaŵagatu yakusawusya ku liŵasali kuti akamule masengo gakulalichila. Nambope ŵatendaga yampaka akombole mwamti ŵaŵaga ŵakusangalala pakukamula masengoga.

17. Ana akusosekwa kutenda chichi kuti apindule ni mfundo syatukambilene munganiji?

¹⁷ Kukamulichisya masengo mfundo syosope msano syatulijiganyisye munganiji ni kwampaka kutukamuchisye kuti tusangalaleje patukukamula masengo gakulalichila. Mfundo jilijose jili mpela chindu chatukusawanganya pakuteleka chakulya. Naga tukuwanganya chenene yindu yayikusosechela patukuteleka chakulya, chakulyacho chikusanunjila chenene nambosoni chikusanong’a. Myoyo, naga tukukamulichisya masengo mfundo syosope syatulijiganyisye munganiji, nikuti tuchikombola kumalana ni yindu yakutengusya nikuŵaga ŵakusangalala patukukamula masengo gakulalichila.