“Mlisagulile Mwachimsyene . . . Jwakuti Mumtumichileje”

1. Ana tukusasosekwa kutenda chichi kuti tusangalaleje yisyesyene, soni ligongo chichi? (Yesaya 48:​17, 18)

ATATI ŵetu ŵakwinani akusatunonyela mnope mwamti akusasaka kuti tusangalaleje ni umi apano soni msogolo. (Jwak. 3:​12, 13) Jwalakwe ŵatupele umanyilisi wakuti tukomboleje kutenda yindu yakulekanganalekangana. Nambope nganatupa ufulu wakulilamulila achimsyewe soni wakulisagulila jika chachili chambone soni chakusakala. (Jwak. 8:9; Yel. 10:23) Mlungu akusamanyilila kuti yindu mpaka yitujendele chenene naga tukumtumichila jwalakwe soni kukuya malamusi gakwe.—Aŵalanje Yesaya 48:​17, 18.

2. Ana Satana akusasaka kuti tukulupilileje chichi? Ana Yehofa atesile yamti uli pakusisya mabosa gelega?

² Satana akusasaka kuti m’weji tukulupilileje kuti mpaka tuŵe ŵakusangalala soni yindu mpaka yitujendeleje chenene pali pangali chikamuchisyo cha Yehofa. (Gen. 3:​4, 5) Pakusaka kusisya mabosa ga Satanaga, Yehofa ŵakundile ŵandu ŵakwimuchila kuti alilamulile kwa kandaŵi. Yili yangalajila kuwusya kuti ulamusi wa ŵandu ulepele kulamulila. Nambope Malemba gakusasala yisyasyo ya achalume ni achakongwe ŵele yindu yajendele chenene paumi wawo ligongo lyakumtumichila Yehofa. Yesu Klistu ali chisyasyo cha ŵandu ŵeleŵa. Mungani ajino chitukambilane magongo gagamtendekasisye Yesu kusagula kumtumichila Yehofa. Kaneko chitukambilane ligongo lyakwe Atati ŵetu ŵakwinani akusasaka kuti twatumichileje. Pakumalisya, chitulole magongo gagatutendekasisye kusagula kumtumichila Yehofa.

YAYAMTENDEKASISYE YESU KUSAGULA KUMTUMICHILA YEHOFA

3. Ana Satana jwasakaga kumpa chichi Yesu, soni ana Yesujo jwasagwile kutenda chichi?

³ Yesu ali pachilambopa, jwasosekwaga kusagula mundu juŵasosekwaga kumtumichila. Jwalakwe ali agambile kubatisidwa kwene, Satana jwamsalile kuti champe mauchimwene gosope ga pachilambo chapasi naga akumtindiŵalila soni kumchimbichisya kamope basi. Nambo Yesu jwajanjile kuti, “Mtyoche Satana! Pakuŵa Malemba gakusati, ‘Yehofa Mlungu jwenu ni jwamkusosekwa kumtindiŵalila soni jwalakwe jika ni jwamkusosekwa kumtumichila.’” (Mat. 4:​8-10) Ligongo chichi Yesu jwajanjile myiyi? Kwende tukambilane gane mwa magongo gagamtendekasisye kwanga myiyi.

4-5. Ana ni magongo gane gapi gagamtendekasisye Yesu kusagula kumtumichila Yehofa?

⁴ Ligongo lyekulungwa lyalyamtendekasisye Yesu kusagula kumtumichila Yehofa lili chinonyelo. Jwalakwe akusamnonyela yisyesyene Yehofa. (Yoh. 14:31) Konjechesya pelepa, Yesu akusamtumichila Yehofa ligongo ni yayili yakuŵajilwa kutenda. (Yoh. 8:​28, 29; Chiw. 4:11) Jwalakwe akusamanyilila kuti Yehofa ni jwali msyene umi soni kuti ali jwakulupichika soni jwakoloŵa magasa. (Sal. 33:4; 36:9; Yak. 1:17) Ndaŵi syosope Yehofa aŵele ali mkumsalila Yesu yisyesyene soni kumpa chilichose chakwete. (Yoh. 1:14) Mwakulekangana ni yeleyi, Satana ayikasisye chiwa. Jwalakwe ali jwaunami, jwakutunduka soni jwakulinonyela. (Yoh. 8:44) Kumanyilila yeleyi, kwamtendekasisye Yesu kuti akamsyasya Satana mwakumjimuchila Yehofa.—Afil. 2:​5-8.

⁵ Ligongo line lyalyamtendekasisye Yesu kusagula kumtumichila Yehofa lyaliji lyakuti jwamanyililaga yindu yambone yampaka yipagwe naga akuŵa jwakulupichika. (Aheb. 12:2) Jwalakwe jwayimanyi kuti naga akuŵa jwakulupichika nikuti chachilichimbichisya lina lya Atatigwe soni kumasya ulemwa ni chiwa yayayiche ligongo lya Satana.

LIGONGO LYAKWE YEHOFA AKUSASAKA KUTI TUMTUMICHILEJE

6-7. Ligongo chichi ŵajinji masiku agano ŵangamtumichilaga Yehofa? Ligongo chichi tukusasosekwa kumtumichila jwalakwe?

⁶ Ŵandu ŵajinji masiku agano ngakusamtumichila Yehofa ligongo lyakuti ngakusamanyilila ndamo syambone syakwete Yehofajo soni yindu yambone yaŵatendele jemanjajo. Mwelemu ni muyaŵelelesoni ni ŵandu ŵa ku Atene ŵaŵalalichile ndumetume Paulo.—Mase. 17:​19, 20, 30, 34.

⁷ Paulo jwasalile ŵandu ŵaŵampikanilaga kuti Mlungu jusyesyene “ni jwakusapeleka kwa ŵandu wosope umi, mpweya, soni yindu yosope.” Jwalakwe jwasasilesoni kuti, “Ligongo lya jwalakwejo tukwete umi, tukusajenda soni tupali.” Mlungu ni jwali Mkupanganya mwamti, “kupitila mwa mundu jumo, ŵapanganyisye mitundu josope ja ŵandu.” Myoyo tukusosekwa kumtumichilaga jwalakwejo.—Mase. 17:​25, 26, 28.

8. Ana Yehofa nganaŵa atesile chichi? Alondesye.

⁸ Mpela mkupanganya soni jwakulamulila jwa chilambo chosope, yikakomboleche kuti Yehofa ŵakanganichisyeje ŵandu kuti amtumichileje jwalakwe. Nambope, Yehofa ngakusatendaga yeleyo. Mmalomwakwe, jwalakwe akusatupa umboni wakulosya kuti jwalakwe apali soni kuti akusamnonyela mnope jwalijose jwa m’weji. Jwalakwe akusasaka kuti ŵandu ŵajinji aŵe achimjakwe mpaka kalakala. (1 Tim. 2:​3, 4) Kuti yeleyi yikomboleche, Yehofa atujiganyisye m’weji kuti tukomboleje kwajiganya ŵane yakwamba chakulinga chakwe soni kwasalila ya yindu yambone yele jwalakwejo chachatendela ŵandu. (Mat. 10:​11-13; 28:​19, 20) Jwalakwe jwalinganyisye yakuti tumtumichileje kupitila m’mipingo soni jwatupele achakulungwa ŵa mumpingo ŵakusatulolela mwachinonyelo.—Mase. 20:28.

9. Ana Yehofa akusalosya chamti uli kuti akusiŵanonyela ŵandu wosope?

⁹ Yehofa akusalosya chinonyelo chakwe mwakwatendela yambone ŵandu ŵangakusamkulupilila jwalakwe. Aganichisye ya yindu ayi, kutandila kalakala, ŵandu mabiliyoni gejinji aŵele ali mkulisagulila jika pakwamba ya yindu yayili yambone kapena yakusakala. Atamose kuti yili myoyo, Yehofa aŵele ali mkwapa jemanjaji yakusosechela ya paumi wawo kuti aŵeje ŵakusangalala. (Mat. 5:​44, 45; Mase. 14:​16, 17) Jwalakwe akusiŵakamuchisyasoni jemanjaji kuti akomboleje kuŵa paunasi wambone ni ŵane, kola maŵasa soni ŵanache, kukamula masengo, nambosoni kuti akusangalaleje. (Sal. 127:3; Jwak. 2:24) Yeleyitu yikwamba kulosya kuti Atati ŵetu ŵakwinani akusamnonyela jwalijose. (Eks. 34:6) Kwende sambano tulole magongo gane gagakusatutendekasya kuti tumtumichileje Yehofa soni yindu yambone yatukusapata ligongo lyakutenda yeleyi.

LIGONGO LYAKWE TUKUSAMTUMICHILA YEHOFA

10. (a) Ana ni ligongo lyekulungwa lyapi lyalikusatutendekasya kumtumichila Yehofa? (Mateyu 22:37) (b) Ana kuwusimana mtima kwa Yehofa kwakamuchisye chamti uli wawojo? (Salimo 103:​13, 14)

¹⁰ Mpela muyaŵelele ni Yesu, ligongo lyekulungwa lyalikusatutendekasyasoni m’weji kumtumichila Yehofa lili chinonyelo chetu pa jwalakwejo. (Aŵalanje Mateyu 22:37.) Patulijiganyisye ya ndamo syambone syakwete Yehofa tukusatanda kumŵandichila mnope jwalakwejo. Mwachisyasyo, aganichisye ya kuwusimana mtima kwakusatulosyaga Yehofa. Pandaŵi jine Ayisalayeli ali alepele kumpikanila Yehofa, jwalakwejo jwaŵendile kuti, ‘Ujilani sambano, jwalijose aleche matala gakwe gakusakala.’ (Yel. 18:11) Yehofa akusakumbuchilaga kuti tuli ŵandu ŵangali umlama soni kuti tuli luwundu. (Aŵalanje Salimo 103:​13, 14.) Ana wawojo pakuganichisya ya ndaŵi jele Yehofa ŵakululuchile soni ndamo sine syambone syakwete jwalakwe, ngayikwatendekasya kola mtima wakusachilila kumtumichila jwalakwe mpaka kalakala?

11. Ana ni magongo gane gapi gagakusatutendekasya kwatumichila Atati ŵetu ŵakwinani?

¹¹ Tukusamtumichilasoni Yehofa ligongo lyakuti ni yatukusasosekwa kutenda. (Mat. 4:10) Tukusamanyililasoni yindu yambone yampaka tupate ligongo lyakumtumichila Yehofa mwakulupichika. Kulupichika kwetu kukusakamuchisya kuti tuswejesye lina lya Yehofa, kulosya kuti Satana ali jwaunami, soni kukusatendekasya mtima wa Atati ŵetu ŵakwinani kuŵa wakusangalala. Mwamti naga tukusagula kumtumichila Yehofa apano, tuchikolasoni upile wakumtumichila jwalakwe mpaka kalakala.—Yoh. 17:3.

12-13. Ana tukulijiganya chichi pa yindu yayamtendechele Jane ni Pam?

¹² Atamose pali ŵachinandipile, mpaka alijiganye kumnonyela mnope Yehofa mwamti chinonyelo chelechi mpaka chipitilisye kulimba mnope pakukula. Aganichisye ya chisyasyo cha alongo ŵaŵili ŵakupagwana mena gawo Jane ni Pam.a Jemanjaji paŵatandaga kulijiganya Baibulo ŵaliji ali akwete yaka 11 soni jwine 10. Atamose kuti achinangolo ŵawo nganasakaga kulijiganya Baibulo, nambope ŵakundile ŵanache ŵawoŵa kuti alijiganyeje ni ŵa Mboni sya Yehofa. Nambo kumbesi kwa wiki ŵajigalaga ku chalichi kwawo. Jane jwatite, “Yindu yaŵanjiganyaga ŵa Mboni sya Yehofa kutyochela m’Baibulo yangamuchisyaga kuti ngajigalilaga yakusatenda achimjangu mpela kamulichisya masengo mtela wakusokonasya mtwe soni ndamo syakusakala.”

¹³ Asikana ŵaŵiliŵa ŵatandite kulalichila ni mpingo ali akwete yaka ya mma 20. Kaneko ŵatandite upayiniya kwineku ali mkwasamalila achinangolo ŵawo ŵachikulile. Paŵaganichisyaga ya munyuma, Jane jwatite, “Nayiweni kuti Yehofa akusatenda yindu mwakulupichika pakwasamalila ŵakutumichila ŵakwe. Mwamti yeleyi yikusakamulana ni yalikusaŵecheta lilemba lya 2 Timoteyo 2:19 kuti, ‘Yehofa akusamanyilila ŵele ŵali ŵakwe.’” Kusala yisyene, Yehofa akusiŵasamalila ŵandu ŵakusamnonyela soni kumtumichila jwalakwe.

14. Ana yatukusaŵecheta soni kutenda yikusakamuchisya chamti uli kuswejesya lina lya Yehofa? (Alolesoni yiwulili.)

¹⁴ Tukusasaka kuliswejesya lina lya Yehofa mwakwasalila ŵane yisyesyene yakwamba jwalakwejo. Tuwanichisye kuti wawojo akwete mjawo jwapamtima jwakusiŵatendela yambone, ali jwakoloŵa magasa soni akusiŵakululuchilaga pamlemwechesye. Ni lisiku line, ampikene mundu jwine ali mkuŵecheta kuti mjawojo ali jwakusakala mnope soni jwangakulupichika. Ana wawojo mpaka atende chichi? Mwangakayichila mpaka am’wichile kunyuma. Mwakulandanamo, Satana ni ŵandu ŵali kumbali jakwe pakusakasya mbili ja Yehofa mwakuwandisya yaunami yakwamba Jwalakwejo, m’weji mwakulimba mtima tukusalichenjela lina lyakwe mwakwasalila ŵane yisyesyene yakwamba Yehofajo. (Sal. 34:1; Yes. 43:10) Tukusalosya kuti tukusaka kumtumichila Yehofa ni mtima wosope kupitila mu yakuŵecheta soni yitendo yetu.

15. Ana Paulo jwapatile upile wamti uli ligongo lyakuchenga yindu yine paumi wakwe? (Afilipi 3:​7, 8)

¹⁵ Tukusaŵa ŵakusachilila kuchenga yindu yine paumi wetu kuti tukomboleje kutenda yejinji pakumtumichila Yehofa. Mwachisyasyo, ndumetume Paulo jwasagwile kuleka kutenda yindu yayikamtendekasisye kuŵa jwakumanyika mnope pasikati pa ŵandu ŵa mudela jakwe. Jwatesile yeleyi ni chakulinga chakuti aŵe jwakumkuya jwa Klistu soni kuti amtumichileje Yehofa. (Agal. 1:14) Yeleyi yatendekasisye kuti yindu yimjendeleje chenene paumi wakwe soni jwakwete upile wakuja kulamulila yimpepe ni Klistu kwinani. Kusala yisyene, Paulo nganaligamba ligongo lyakusagula kumtumichila Yehofa, mwamti m’wejisoni nganituŵa tuligambile.—Aŵalanje Afilipi 3:​7, 8.

16. Ana tukulijiganya chichi pa yindu yayamtendechele Julia? (Alolesoni yiwulili.)

¹⁶ Naga tukusakuwona kumtumichila Yehofa kuŵa kwakusosekwa mnope, yindu mpaka yitujendele chenene apano soni msogolo tuchipata upile wekulungwa. Aganichisye yayamtendechele Mlongo Julia. Mkanaŵe kulijiganya Baibulo, mlongoju jwajimbaga kwayala kuchalichi kwawo kutandila ali mwanache. Kaneko mundu jwine jwakupakombola kwimba chenene jwayikopochele kuti msikanaju jwakwete lunda mnope mwamti jwatandite kumjiganya kwimba. Kaneko Julia jwatandite kwimba chenene, mwamti jwayikene pakwimba mmalo gakumanyika mnope. Pandaŵi jine msikanaju ali mkulijiganya pa sukulu jine jakumanyika mnope jakwiganya kwimba nyimbo, mjakwe jwa mkalasi jwamsalile kuti lina lya Mlungu lili Yehofa. Mkanipapite ndaŵi, Julia jwatandite kulijiganya Baibulo kaŵili pa wiki. Kaneko, jwalakwe jwalinganyisye yakuti alipelecheje mnope pakumtumichila Yehofa mmalo mwakulimbichila ya kwimba nyimbo. Nambotu kutenda yeleyi kwaliji kwakusawusya. Jwalakwe jwatite, “Ŵandu ŵajinji ŵatiga kuti ngwasa upile wangu, nambo une nasakaga kuti ngamulichisyeje masengo umi wangu wosope pakumtumichila Yehofa.” Ana apano mlongoju akusapikana uli pakuganichisya ya yindu yajwasagwile yaka 30 yipiteyo? Jwalakwe jwatite, “Apano ngwete mtendele wa mumtima, soni ngusakulupilila kuti kusogoloku Yehofa chachimba yangusasaka paumi wangu.”—Sal. 145:16.

AKALEKA KUMTUMICHILA YEHOFA

17. Ana kumanyilila kuti tukutama kumbesi kusyesyene kwa masiku gakumalisya, kukwakwaya chamti uli ŵandu ŵaŵasagwile kumtumichila Mlungu soni ŵanganaŵe kusagula kutenda yeleyi?

¹⁷ Kusala yisyene, apano tukutama kumbesi kusyesyene kwa masiku gakumalisya. Ndumetume Paulo jwalembile kuti, “Nambope ‘kusigele kandaŵi panandi,’ soni ‘jwele jwakwikajo chayiche nditu soni ngakokoŵa.’” (Aheb. 10:37) Ana yeleyi yikutukwaya chamti uli m’weji? Yeleyi yikutukamuchisya kumanyilila kuti ndaŵi jajisigele kuti ŵandu asagule kumtumichila Yehofa jinandipe. (1 Akoli. 7:29) Nambosoni naga twasagwile kala kumtumichila Mlungu, tukusamanyilila kuti tukusasosekwa kupilila yakusawusya, kwineku tuli mkumanyilila kuti “kusigele kandaŵi panandi” kuti yakusawusyayi yimale.

18. Ana Yesu soni Yehofa akusasaka kuti tutendeje chichi?

¹⁸ Yesu jwalimbikasisye ŵandu kuti aŵe ŵakulijiganya ŵakwe soni kuti akaleka kumkuya jwalakwe. (Mat. 16:24) Myoyo, naga twatandite kumtumichila Yehofa yaka yejinji yipiteyo, ngatukusosekwa kuwujila munyuma. Mwamti tukusasosekwa kulimbichila kuti tupitilisye kumtumichila Yehofa. Atamose kuti ndaŵi sine kumtumichila Yehofa mpaka kuŵe kwakusawusya, nambope pana yindu yejinji yambone yampaka tupate apano ligongo lyakutenda yeleyi.—Sal. 35:27.

19. Ana tukulijiganya chichi pa yindu yayamtendechele Gene?

¹⁹ Ŵandu ŵane akusayiwona kuti kumtumichila Yehofa kukusasaka kulijima yindu yejinji. Naga wawojo ali jwachinandipile, ana akusayiwona kuti pana yindu yampaka yapite ligongo lya kumtumichila Yehofa? M’bale jwine jwachinyamata lina lyakwe Gene jwatite, “Naganisyaga kuti kuŵa jwa Mboni sya Yehofa kwandendekasyaga kuŵa jwangasangalala. Nayiwonaga kuti ŵanache ŵajinji ŵanang’andaga nawo ŵasangalalaga ni kutenda yisangalalo, kola maganja, kapena kung’anda magemu ga chiwawa. Pele une nasosekwaga kumalila ndaŵi jangu mwakwawula kumisongano soni kukulalichila.” Ana kaganisye keleka kamkwayiye chamti uli Gene? Jwalakwe jwatite, “Natandite kutama umi wa unakunaku, mwamti nasangalalaga. Nambope, kusangalalaku kwaliji kwakandaŵi kamnono. Myoyo, natandite kuganichisya ya yisyesyene ya m’Baibulo yanasagwile kuti ngayikamulichisyaga masengo. Mwamti kaneko nasagwile yakuti namtumichileje Yehofa ni mtima wangu wosope. Kutandila pandaŵiji, natandite kuyiwona kuti Yehofa akwanga mapopelo gangu gosope.”

20. Ana tukusosekwa kulingalinga kutenda chichi?

²⁰ Jwamasalimo jwamjimbile Yehofa nyimbo jakuti, “Jwana upile mundu jwamsagwile ŵalakwe ni kwika najo kutama [m’maluŵala gawo].” (Sal. 65:4) Myoyo, kwende wosopewe tupitilisye kumtumichila Yehofa. Nambosoni mpela mwajwatendele Yoswa, kwende nombem’we tuŵecheteje kuti, “Nambo une ni wosope ŵa m’nyumba jangu chitumtumichileje Yehofa.”—Yos. 24:15.