Kumanyilila Yisyesyene Yakwe Kuli Kwakusosekwa
Ligongo chichi kumanyilila kuti apali juŵapanganyisye yindu yosopeyi kuli kwakusosekwa? Naga akusakulupilila kuti Mlungu apali, yichakamuchisya kuti awungunye naga Baibulo jasalilidwe ni jwalakwejo. Kwende tulole umbone wampaka apate ligongo lyakulupilila yajikusasala Baibulo.
Chachiŵa ŵakusangalala
BAIBULO JIKUSATI: ‘Kutyochela kwinani [Mlungu] akusiŵapa ula ni ndaŵi ja yisogosi. Akusiŵapa yakulya ni yine yejinji yagumbala mitima jawo ni chisangalalo.’—Masengo 14:17.
ANA YELEYI YIKUGOPOLELA CHICHI?: Yiliyose yakusasangalala nayo pachilambopa yili mtuka wakutyochela kwa Mlungu. Pamanyilile kuti Mlungu akusiŵanonyela wawojo ni pachachimyamichila mnope.
Chachipata lunda lwakamuchisya
BAIBULO JIKUSATI: “Timchipikanichisya ya kulupichika ni chilungamo, ya ungali lusagu ni ya litala lili lyose lyambone.”—Misyungu 2:9.
ANA YELEYI YIKUGOPOLELA CHICHI?: Pakuŵa Mlungu ni juŵatupanganyisye akusamanyilila yindu yampaka yitukamuchisye kuŵa ŵakusangalala. Pakulijiganya Baibulo chachimanyilila yindu yampaka yakamuchisye paumi.
Chachipata kwanga kwa yiwusyo yakusakola
BAIBULO JIKUSATI: ‘Timchimpikanichisya . . . Mlungu.’—Misyungu 2:5.
ANA YELEYI YIKUGOPOLELA CHICHI?: Pamanyilile kuti kwana Mlungu yichakamuchisya kuti apate kwanga kwa yiwusyo yakusosekwa mnope. Yiwusyo mpela yakuti: Ligongo chichi tukwete umi? Ligongo chichi tukusalaga? Ana chikusatendekwa chichi mundu pawile? Mpaka apate kwanga kwa yiwusyoyi m’Baibulo.
Chachikola sogolo jambone
BAIBULO JIKUSATI: “‘Une ni jungusamanyilila yinamkolochesye jemanja, yakuti timchiŵa pambone ngaŵaga pakusakala, kuti mkole chembecheyo chisyesyene pa yamsogolo.’”—Yelemiya 29:11.
ANA YELEYI YIKUGOPOLELA CHICHI?: Mlungu jwatusimichisye kuti kusogoloku chachityosya yindu yakusakala, yipwetesi soni chiwa. Naga akukulupilila yaŵasasile Mlunguyi, yichakamuchisya kuti apilileje pakusimana ni yakusawusya.