NOWA AKUTAŴA COMBO

NOWA ŵakwete jwamkongwe ni ŵanace ŵatatu ŵacalume. Mena ga ŵanacewo galiji Semu, Hamu, ni Yafeti. Ŵanaceŵa ŵakwete aciŵamkwawo. Nikuti ŵapali ŵandu msano kwisa ŵatatu mu liŵasa lya Nowa.

Mlungu ŵasakaga kuti Nowa atende cindu cakusimonjesya. Ŵamsalile kuti ataŵe combo cekulungwa. Comboci caliji cekulungwa mpela sitima ja m’mesi, nambo cawonekaga mpela libokosi lyekulungwa lyelewu. Mlungu ŵatite, ‘ciŵe ca majumba gatatu gesajikanye, soni mpanganye yipinda.’ Yipindayo yaliji ya Nowa ni liŵasa lyakwe, ya yinyama, soni ya yakulya yaŵasosekwaga.

Mlungu ŵamsalilesoni Nowa kuti acipanganye comboco mwati mesi ngaŵa mkwinjila mkati. Mlungu ŵatite: ‘cinjiyikasya cikumba cekulungwa ni konanga cilambo cosope. Ni jwalijose jucaciŵa kusa kwa comboco caciwa.’

Nowa yimpepe ni ŵanace ŵakwe ŵapikanile yaŵasalile Yehofa, ni ŵatandite kutaŵa combo. Nambo ŵane ŵagambaga kuseka. Ŵajendelecele kutenda yakusakala. Pangali juŵamkulupilile Nowa, paŵasalilaga yaŵasakaga kutenda Mlungu.

Kutaŵa combo kwajigele ndaŵi jelewu, ligongo caliji cekulungwa mnope. Kaneko pali papite yaka yejinji, camasile. Sambano Mlungu ŵamsalile Nowa kuti ajinjisye yinyama mu combo. Mlungu ŵamsalile Nowa kuti yinyama ya mitundu jine ayijinjisye yiŵiliyiŵili, cacilume ni cacikongwe. Nambo yinyama ya mitundu jine Mlungu ŵamsalile kuti ajinjisyemo yakwanila msano ni yiŵili. Ŵamsalilesoni kuti ajinjisyemo mitundu josope ja yijuni. Nowa ŵatesile yaŵamsalile Mlungu.

Kaneko, Nowa yalumo ni liŵasa lyakwe ŵajinjile m’combo mula. Kaneko, Mlungu ŵawugele litanga. Nowa ni liŵasa lyakwe ŵatemi mkatimo ni kwembeceyaga. Agambe ganicisya kuti wawojo ŵapali m’combomo yalumo ni jemanjajo ni kwembeceyaga. Ana yisyene cikumba caliji mkwisa mwakamulana ni yaŵasasile Mlungu?