Kulupuka ku Ukapolo wa ku Eguputo Mpaka Mwenye Jwandanda jwa Ayisalayeli

Musa ŵalongolele Ayisalayeli kutyoka ku ukapolo wa ku Eguputo kwawula ku Litumbi lya Sinayi, kweleko Mlungu ŵapelece malamusi gakwe. Kaneko, Musa ŵatumile acalume 12 kuja kukusonda cilambo ca Kanani. Nambo acalume 10 ŵayice ni ngani jakusakala. Ŵatendekasisye ŵandu kusaka kuwujilasoni ku Eguputo. Ligongo lya kunandipa kwa cikulupi cawo, Mlungu ŵapele cilango Ayisalayeli mwakwatendekasya kwenda mwipululu kwa yaka 40.

Pambesi pakwe, Yoswa ŵamsagwile kuti ŵalongolele Ayisalayeli kwinjila m’cilambo ca Kanani. Pakusaka kwakamucisya kusumula cilamboco, Yehofa ŵatesile yakusimonjesya. Jwalakwe ŵatendekasisye kuti mesi ga Lusulo lwa Yolodani gakajenda, mapupa ga ku Yeliko gagwe, lyuŵa lijime pamalo gamo lisiku lyosope. Yili yimasile yaka msano ni cimo, cilambo ca Kanani ŵacisumwile.

Kutandila pa Yoswa, ŵakwelusya ŵalamulile Ayisalayeli kwa yaka 356. Citulijiganye yejinji ya jemanjaji, mpela Balaki, Gidiyoni, Yefita, Samusoni, soni Samuyele. Cituŵalanjesoni ya acakongwe mpela Lahabu, Debola, Yayeli, Lute, Naomi, soni Delila. Mbali JATATU jeleji jikutagulila yayatendekwe mu yaka 396.