LUTE NI NAOMI

M’BAIBULO mwana buku jakolanjikwa kuti Lute. M’buku ja Lute mwana ngani jakwamba ya liŵasa lyalyapali mu ndaŵi jele Ayisalayeli ŵakwete ŵakwelusya. Lute ali jwamkongwe jwacinandipile jwa kucilambo ca Moabu. Jwalakwe nganaŵa jwa mtundu wa ŵandu ŵa Mlungu wa Ayisalayeli. Nambo Lute palijiganyisye ya Mlungu jusyesyene Yehofa, jwalakwe akumnonyela Mlungu mnope. Naomi ali jwamkongwe jwacikulile juŵamkamucisye Lute kulijiganya ya Yehofa.

Naomi ali jwamkongwe jwa Ciyisalayeli. Jwalakwe ni ŵamkwakwe, soni ŵanace ŵawo ŵaŵili ŵasamile kwawula kucilambo ca Moabu pandaŵi jajapali sala ku Yisalayeli. Sambano lisiku line ŵamkwakwe Naomi ŵawile. Pali papite ndaŵi, ŵanace ŵa Naomi ŵala ŵalombele ŵali ŵaŵili ŵa Cimoabu mena gawo galiji Lute ni Olipa. Nambo pali papite yaka ciŵandika 10, ŵanace ŵaŵili ŵa Naomi ŵala ŵawile. Naomi ni ŵali ŵaŵili ŵa Cimoabu ŵala ŵaliji ŵakudandawula mnope! Ana sambano Naomi akatesile cici?

Lisiku line Naomi akuganisya yakuwutanda ulendo wakuwujila kumangwakwe kwa ŵandu ŵa mtundu wakwe. Lute ni Olipa akusaka kwendelecela kutama ni jwalakwe, m’yoyo ŵanyakwice nawo yimpepe paulendowu. Nambo ali agambile kwenda panandi, Naomi akwasalila ŵali kuti: ‘Wujilani kunyumba, mkatameje ni acimama ŵenu.’

Naomi akwakomasya ni ngomo ŵaliwo palijeje, pakulosya kulangana nawo. Pandaŵi jijojo ŵaliwo akutanda kulila, ligongo akumnonyela mnope Naomi. Akuŵeceta kuti: ‘Iyayi! Citujawule namwe kwa ŵandu ŵa mtundu ŵenu.’ Nambo Naomi akwanga kuti: ‘Wujilani ŵana ŵangu. Kumangwenu cimkatameje cenene.’ M’yoyo Olipa ŵawutandite ulendo wakuwujila kumangwakwe. Nambo Lute ngakuwujila kumangwakwe.

Sambano Naomi ŵaŵecete kwa Lute kuti: ‘Olipa awujile kumangwakwe. Mmwejosoni ujilani yimpepe ni jwalakwejo.’ Nambo Lute akwanga kuti: ‘Akanganganicisya kuti nalece wawojo! Angunde nakuye wawojo. Kwakwawula wawojo nombe une cinjawule kukoko, soni kwacakatame wawojo une cingatamesoni kukoko. Ŵandu ŵawo cakaŵe ŵandu ŵangu, soni Mlungu jwawo cakaŵe Mlungu jwangu. Kwacakawile wawojo, nombe une cingawile kukoko, soni kukoko ni kwacakasice m’malembe.’ Lute paŵecete yeleyi, Naomi ngakulingasoni atapanandi kumtendekasya kuti awujile kumangwakwe.

Kumbesi kwakwe acakongwe ŵaŵiliŵa akwika ku Yisalayeli. Kweleko akutamilicika. Lute ndaŵi jijojo akutanda kamula masengo mumgunda, ligongo jili ndaŵi jakuwulula balele. Jwamlume jwine lina lyakwe Bowasi akumkunda kuti awululeje balele mumgunda wakwe. Ana akwamanyilila mama ŵakwe ŵa Bowasi? Ŵaliji Lahabu jwa mu msinda wa Yeliko jula.

Lisiku line Bowasi akumsalila Lute kuti: ‘Mbikene yosope yakwamba mmwejo, soni yambone yosope yam’ŵele mkwatendela a Naomi. Ngumanyilila yamwatite pakwaleka baba ni mama ŵenu, soni cilambo cenu, soni yimtesile pakwika akuno kukutama ni ŵandu ŵanganimwamanyaga nikala kose. Yehofa amtendele yambone!’

Lute akwanga kuti: ‘Ambuje alosisye canasa kwabasi. Andendekasisye une kupikana cenene mumtima ligongo lya mwaŵecetele kwa une.’ Bowasi akumnonyela mnope Lute, soni ngapakujigala ndaŵi jejinji mnope kuti jemanjaji alombane. Yeleyi yikumsangalasya Naomi! Nambo Naomi akusangalala mnope pandaŵi jele Lute ni Bowasi pakukola mwanace jwawo jwandanda jwamlume, lina lyakwe Obedi. Pali papite ndaŵi Obedi akuŵa anganga ŵakwe Daudi. M’bujomu citulijiganye yejinji pakwamba ya Daudi.