MWENYE JWAKUMALISYA JWA AYISALAYELI

YOSIYA akwete yaka 8 pakuŵa mwenye jwa ucimwene wakumpoto wa mitundu jiŵili ja Ayisalayeli. Yakayi yili yamnono mnope kuti mundu aŵe mwenye. M’yoyo kundanda acakulungwa ŵane akumkamucisya kulamulila mtunduwo.

Yosiya palamulile kwa yaka msano ni yiŵili akutanda kumsosa Yehofa. Jwalakwe akukuya cisyasyo cambone ca acayimwene mpela Daudi, Yehosafati ni Hesekiya. Kaneko, ali ciŵela kuŵa mcanda, Yosiya akutenda cindu cine mwakulimba mtima.

Kwandaŵi jelewu Ayisalayeli ŵajinji aŵele ŵakusakala mnope. Akulambila milungu jaunami. Akutindiŵalila mitembe. Sambano Yosiya ni acalume ŵakwe akwenda m’cilamboco nikutanda kutyosya kulambila kwaunami. Gelega gali masengo gamakulungwa ligongo ŵandu ŵajinji mnope akulambila milungu jaunami. Komboleka kum’wona Yosiya paciwulilipa ni acalume ŵakwe ali mkukasanya mitembe.

Kaneko Yosiya akuŵika acalume ŵatatu kuti aloleleje masengo gakulinganyasoni nyumba jakulambilila ja Yehofa. Mbiya akusisonganganya kutyocela kwa ŵandu ni akusipeleka kwa acalume ŵaŵaŵisile ŵala kuti alipilileje yakusosekwa pamasengopo. Paŵaliji mkukamula masengo pa nyumba jakulambililapo, jwamkulungwa jwa ŵambopesi Hilikiya akucisimana cindu cine cakusosekwa mnope. Akujisimana buku ja malamusi jele Yehofa ŵamsalile Musa kuti alembe, kalakala mnope. Bukuji jasokonecele kwa yaka yejinji.

Bukujo akwawula najo kwa Yosiya, ni jwalakwe akuŵenda kuti am’ŵalanjile. Pakupikanila kuŵalangako, Yosiya akuyiwona kuti ŵandu aŵele mkakupikanila malamusi ga Yehofa. Yeleyi yikumtendekasya kuŵa jwacanasa, ni kaneko akupapulanya yakuwala yakwe, mpela mwakuyiwonela paciwulilipa. Jwalakwe akuŵeceta kuti: ‘M’weji Yehofa atutumbilile, ligongo acinangolo ŵetu nganapikanilaga malamusi gakulembegwa m’bukumu.’

Yosiya akumsalila jwamkulungwa jwa ŵambopesi Hilikiya kuti awusye kwa Yehofa yacatende kwa jemanjajo. Hilikiya akwawula kwa Hulida jwakulocesya jwamkongwe ni akum’wusya ya nganiji. Jwalakwe akupeleka utenga wakutyocela kwa Yehofa kuti akamsalile Yosiya kuti: ‘Yelusalemu ni ŵandu ŵa ku Yelusalemu wosope cacipocela cilango ligongo alambileje milungu jaunami, soni cilambo cigumbele ni yakusakala. Nambo ligongo lyakuti mmwejo Yosiya mtesile yindu yambone, cilangoci ciciyika mmwejo mli m’wile.