YESU AKWISA MPELA MWENYE

ALI agambile kuposya ŵandu ŵaŵili ŵakuŵenda ŵangalola ŵala, Yesu akwinjila m’musi wine wamwana ciŵandika Yelusalemu. Jwalakwe akwasalila ŵakulijiganya ŵakwe kuti: ‘Ajawule mumsindawo, soni cakajisimane bulu jamwana ali ajitaŵilile. Akajigopole nikwika najo kwa une.’

Payice najo bulu jila, Yesu akukwela pabulujo. Kaneko akumjendesya kwawula ku Yelusalemu kwakuli palutando lwejipi. Pakuŵandicila mumsindawo, likuga lyekulungwa lya ŵandu likwisa kukumcingamila. Ŵajinji mwa ŵanduwo akuwula yakuwala yawo yapacanya nikuyiŵika pamsewu. Ŵane akukata nyambi sya yitela ya mgwalangwa. Nyambi sya yitela ya mgwalangwasi akusiŵikasoni pamsewu, soni akugumila kuti: ‘Mlungu ampe majali mwenye jwakwisa mlina lya Yehofa!’

Kalakala mu Yisalayeli mayimwene gasambano gajinjilaga mu Yelusalemu gali gakwesile pa mwanace jwa bulu kukulilosya kwa ŵandu. Yesu akutenda yeleyi pandema ajino. Soni ŵanduŵa akulosya kuti akusaka kuti Yesu aŵe mwenye jwawo. Nambo ngaŵa kuti ŵandu wosope akumsaka jwalakwe. Tukuyiwona yeleyi Yesu pakwawula ku nyumba jakulambilila.

Ku nyumba jakulambilila Yesu akuposya ŵandu ŵangalola, soni ŵalemale. Tuŵanace patukuyiwona yeleyi, tukugumila ni kumlumbaga Yesu. Nambo yeleyi yikwatendekasya ŵambopesi kutumbila, ni akumsalila Yesu kuti: ‘Ana akupikana yatukuŵeceta tuŵanaceto?’

Yesu akwanga kuti: ‘Elo, ngupikana. Ana jemanja nganim’ŵalanga m’Baibulo maloŵe gakuti: “Kutyocela pakamwa pa ŵanace ni makandi gakonga ŵamjimbile Mlungu malumbo?” M’yoyo tuŵanaceto tukwendelecela kulumba mwenye jwa Mlungu.

M’weji tukusakasoni kuŵa mpela tuŵanaceto, ngati m’yoyo? Ŵandu ŵane komboleka kulingalinga kutulekasya kuŵeceta ya ucimwene wa Mlungu. Nambo tujendelecelejepe kwasalila ŵane pakwamba ya yindu yakusangalasya yacacitenda Yesu kwa ŵandu.

Yesu paŵaliji pacilambo capasi nganijiŵa ndaŵi jakuti atande kulamulila mpela mwenye. Ana ndaŵi jeleji jiciyika cakaci? Ŵakulijiganya ŵa Yesu akusaka kumanyilila. Cituŵalanje yeleyi mungani jakuyicisya.