Lijiganyo 3
Ana Yesu Kristu Nduni?
Ana ligongo chichi Yesu akisakolanjidwa kuŵa Mwanache Jwam’lume “jwandanda kupagwa” jwa M’lungu? (1)
Lingongo chichi akisakolanjidwa kuŵa “Maloŵe”? (1)
Ligongo chichi Yesu ŵaiche kuchilambo chapasi mpela mundu? (2-4)
Ligongo chichi ŵatendaga yakusimonjesya? (5)
Ana Yesu chachitenda chichi m’sogolo mwa changakaŵa? (6)
1. Yesu ŵatamaga kwinani mpela mundu jwa usimu m’kinaŵiche kuchilambo chapasi. Ŵaliji chilengo chandanda cha M’lungu, m’yoyo akukolanjidwa kuŵa Mwanache Jwam’lume “jwandanda kupagwa” jwa M’lungu. (Akolose 1:15; Chivumbulutso 3:14) Yesu ali Mwanache Jwam’lume jikape juŵalenjedwe ni M’lungu msyene. Yehova ŵam’kamulichisye masengo Yesu jwa usimujo mpelaga “m’misili” jwakwe pa kupanganya yindu yine yesope ya kwinani ni ya pachilambo chapasi. (Miyambo 8:22-31; Akolose 1:16, 17) M’lungu soni ŵam’kamulichisye masengo mpela mchimwene jwa kum’ŵechetela Jwakwe. Niligongo lyakwe Yesu akukolanjidwa kuŵa “Maloŵe.”—Yohane 1:1-3; Chivumbulutso 19:13.
2. M’lungu ŵamtumisye Mwanagwe Jwam’lume kuchilambo chapasi mwa kusamya wumi wakwe kuŵika m’chitumbo mwa Malia. M’yoyo Yesu nginakola atati ŵa umundu. Niligongo lyakwe nginapochela cha kwinjila cha ulemwa kapena ungali ungwilo. M’lungu ŵam’tumile Yesu kuchilambo chapasi pa magongo gatatu: (1) Kutujiganya m’we yakuona pakwamba ya M’lungu (Yohane 18:37), (2) kusunga umbumbu wangwilo, ali m’kupeleka chisam’so chakuti m’we tuchikuye (1 Petro 2:21), ni (3) kupeleka wumi wakwe mbepesi jakutugopola ku ulemwa ni chiwa. Ligongo chichi yeleyi yaliji yakusosechela?—Mateyu 20:28.
3. Mwangapikanila lilamusi lya M’lungu, mundu jwandanda, Adamu ŵatesile chichikolanjidwa M’Baibulo kuŵa “ulemwa.” Sambano M’lungu ŵajelusyile ku chiwa. (Genesis 3:17-19) Nginaŵa soni pam’lingo wa miyeso ja M’lungu, m’yoyo nginaŵa ŵangwilo soni. Panondipanondi ŵakalambele ni kuwa. Adamu ŵapelechele ulemwa kwa ŵanache ŵakwe ŵesope ŵene. Niligongo lyakwe noweŵakwe tukisakalambala, kulwala, ni kuwa. Ana mtundu wa ŵandu ukakulupusidwe chatuli?—Aroma 3:23; 5:12.
4. Yesu ŵaliji mundu jwa m’ngwilo mpela muŵaŵelele Adamu. Nambope, mwangalandana ni Adamu, Yesu mwangwilo ŵapikanile M’lungu atamose pasi pa chiyeso chachikulungwa. M’yoyo ŵaliji ŵakomboleka kupeleka wumi wakwe wangwilowo mpela mbepesi kulipilila ulemwa wa Adamu. Ayi Baibulo jisayikolanga kuwa “chiwombolo.” M’yoyo ŵanache ŵa Adamu komboleka gopoledwa ku chijelusyo cha chiwa. Jwalijose jwakola chikulupi pa Yesu ulemwa wawo komboleka kululuchidwa soni mpakana apochele wumi wangamala.—1 Timoteo 2:5, 6; Yohane 3:16; Aroma 5:18, 19.
5. Pandaŵi jiwaliji pachilambo chapasi, Yesu ŵalamisye ŵakulwala, kwalisya ŵa sala, ni kujitondoya namondwe. Mpakana ŵajimwisye ŵawe. Ana ŵatendelaga chichi yakusimonjesya? (1) Ŵatendelaga chanasa ŵandu ŵaŵalagagawo ni ŵasosaga kwakamuchisya. (2) Yakusimonjesya yakwe yasimichisyaga kuti ŵaliji Mwanache jwa M’lungu. (3) Yalosyaga yichachitendela mtundu wa ŵandu wakupikanila patachiŵa m’kulamulila mpela Mwenye pachilambo chapasi.—Mateyu 14:14; Marko 2:10-12; Yohane 5:28, 29.
6. Yesu ŵawile ni ŵajimwisidwe ni M’lungu mpela chilengo cha usimu, ni ŵawujile kwinani. (1 Petro 3:18) Kutyochela jele ndaŵijo, M’lungu am’ŵisile kuŵa Mwenye. Sampano Yesu chachityosya kusakala kosope ni kulaga kosope pachilambo chapasi chino.—Salmo 37:9-11; Miyambo 2:21, 22.
[Yiwulili pa peji 7]
Utumiki wa Yesu wapwatikaga kwiganya, kutenda ya kusimonjesya, ata mpakana kupeleka wumi wakwe ligongo lya m’we