Lijiganyo 7
Kum’ŵandichila M’lungu Mwepopelo
Ana ligongo chichi kupopela ndaŵi syesope kuli kwa kusosechela? (1)
Ana tupopeleje kwacheni, soni cham’tuli? (2, 3)
Ana sili syapi ngani syakwenelela kupopelela? (4)
Ana m’kusosechela kupopela lyuŵachi? (5, 6)
Ana M’lungu akisapikanilaga mapopelo gesopegene? (7)
1. Lipopelo lili kuŵecheta ni M’lungu mwa kulinondiya. Mpopeleje kwa M’lungu ndaŵi syesope. Mwa kutenda m’yoyo mpakana mpikane kuŵa ŵakuŵandikana najo mpela mjenu jwa pa m’tima. Yehova ali jwam’kulungwa ni jwa machili, nambo akisapikanaga mapopelo getu! Ana m’kisapopelaga kwa M’lungu ndaŵi syesope?—Salmo 65:2; 1 Atesalonika 5:17.
2. Lipopelo lili mbali ja kuswali kwetu. M’yoyo, tukusosechela kupopela kwa M’lungu jumpepe, Yehova. Paŵaliji pachilambo chapasi, Yesu ndaŵi syesope ŵapopelaga kwa Atatigwe, ngaŵa kwa jwine jwali jose. Nowe tutende yalumo. (Mateyu 4:10; 6:9) Nambope mapopelo getu gesopegene gapelechedweje m’lina lya Yesu. Ayi ikisalosya kuti tukuchimbichisya malo gakwe ga Yesu ni kuti tukwete chikulupi mu mbepesi jakwe ja chiombolo.—Yohane 14:6; 1 Yohane 2:1, 2.
3. Pakupopela, tukusosechela kuŵecheta ni M’lungu kutyochela mu m’tima. Tukasitupeleka mapopelo getu mwa kwinjisya mumtima kapena kuŵalanga kutyochela m’buku ja mapopelo. (Mateyu 6:7, 8) Mpakana tukomboleche kupopela mu ndamo jine jilijose jauchimbichimbi, ndaŵi jilijose, malo galigose. M’lungu akisakomboleka kupikana atamosa mapopelo ga kachetechete gakutyochela mum’tima. (1 Samueli 1:12, 13) Kuli chenene kusosa malo ga bata, gangali ŵandu kuti tupeleche mapopelo getu gausyegwe.—Marko 1:35.
4. Ana nganichi simpakana mpopelele? Silisyose syakamulana ni uganja wetu ni M’lungu. (Afilipi 4:6, 7) Lipopelo lya chisanso likusalosya kuti tukusosechela kupopelela lina lya Yehova ni lisosa lyakwe. Mpakana tuŵende soni kuti atupe yakusowa yetu yakuchilu, kutukululuchila ulemwa wetu, ni chikamuchisyo kuti tukanye chiyeso. (Mateyu 6:9-13) Mapopelo getu gakaŵa ga dyela. Tupopelele yindupeyo yiyikisakamulanaga ni lisosa lya M’lungu.—1 Yohane 5:14.
5. Komboleka kupopela ndaŵi jilijose mtima wenu paukum’kwisilila kum’yamika kapena kum’lamba M’lungu. (1 Mbiri 29:10-13) Mkusosechela kupopela pam’li mu yakusausya kapena naga chikulupi chenu chili pa chiyeso. (Salmo 55:22; 120:1) Kuli chenene kupopela m’kinitutande kulya. (Mateyu 14:19) Yehova akutuŵenda kuti “tupopeleje ndaŵi syesope syene.”—Aefeso 6:18.
6. Tupopele makamaka naga tutesile ulemwa waukulungwa. Pasyele ndaŵisi, tuŵende chifundo cha M’lungu ni chikululuchilo. Naga tukum’wululila ulemwa wetu nikutenda yakomboleka yetu kuti tukawilisya soni, M’lungu ali “jwam’koseche kululuchila.”—Salmo 86:5; Miyambo 28:13.
7. Yehova akisapikanilaga mapopelo ga ŵandu ŵalungamepe. Kuti mapopelo genu gapikanidwe ni M’lungu, m’linjelinje kuya malamusi gakwe. (Miyambo 15:29; 28:9) M’kusosechela kulinondiya pa kupopela. (Luka 18:9-14) M’kusosechela kamulila masengo pa yim’kuipopelelayo. Pakutenda m’yoyo chim’chisimichisya kuti m’kwete chikulupi soni ni kuti m’kusosadi yim’kuŵendayo. Nimyo’yo Yehova chachim’janga mapopelo genu.—Ahebri 11:6.