Lijiganyo 2

Mundu Jwambone Mnope Kuŵa Mjenu ni Mlungu

Kuŵa mjakwe jwa Mlungu cili cindu cambone mnope. Mlungu cacimjiganya yakuti kaŵe ŵakusengwa ni ŵakusunjika. Cacimgopola ku yikulupi yaunami ni yitendo yakuwulasya. Cacigapikanila mapopelo genu. Cacimkamucisya kuti msangalale ni mtendele wamunganisyo ni cikulupi cakulimba. (Salmo 71:5; 73:28) Mlungu cacimkamucisya mu ndaŵi ja yipwetesi. (Salmo 18:18) Niposoni Mlungu akumpa mtuka wakwe wa umi wangamala.—Aloma 6:23.

Mciŵandicilaga kwa Mlungu, cimciŵandikana ni acimjakwe ŵa Mlungu. Caciŵasoni acimjenu. Kusyesyene caciŵa cisawu acalongoajenu. Cacisangalala kumjiganya pakwamba ya Mlungu. Nipo cacimkamucisya ni kumlimbikasya.

Ngatukulandana najo Mlungu. Mcisakaga kuti Mlungu aŵe mjenu, m’manyilile cindu cine cakusosekwa mnope. Kuŵa mjakwe jwa Mlungu nganikuŵa cisawu kwa ŵamisingu jimo. Jwalakwejo ali jwamkulungwa ni jwalunda mnope, soni jwamacili mnope kutupunda m’weji. Ali Jwakulamulila jwetu jwakuŵajilwa. Ni naga tukusaka kuti aŵe mjetu, tukusosekwa kumpikanila ni kutenda yakutusalila. Yeleyi ndaŵi josope yicitukamucisya.—Yesaya 48:18.