Ana Tutendeje Yindu Mwatuli ni Mundu Jwamtyosyegwe Mumpingo?

Kutyosyegwa mumpingo kwa jwacinasi, kapena mjetu jwatesile cakulemwa nambo ngakupitikuka mtima kuli cindu cakupweteka mnope. Yampaka tutende pakuya yajikusasala Baibulo panganiji, mpaka yilosye naga tukusamnonyela mnope Mlungu, soni naga tuli ŵakulupicika pa kajendesye kakwe ka yindu.a Kwende tulole yiwusyo yine yayikusapagwa panganiji.

Ana tutendeje yindu mwatuli ni mundu jwamtyosyegwe mumpingo? Baibulo jikusati: “Mkasyoŵekana najo mundu jwakusalikolanga kuti ali jwakulupilila nambo citamileco jwalakwejo ali jwalilama, kapena jwaumbombo, jwakulambila milungu jine, jwakwasinjilila ŵane, jwakolelwa kapena jwawiyi. Mkalya najo mundu jwamti m’yoyo.” (1 Akolinto 5:11) Pakwamba ya mundu “jwangakuya yakwiganya ya Klistu,” tukusaŵalanga kuti: “Mkasimumpocela m’nyumba syenu, atamose kumkomasya. Jwalijose jwakumkomasya mundu jwamti myiyi nikuti akukamulangana nayo yitendo ya jwalakwejo yayili yaulemwa.” (2 Yohane 9-11) Ngatukusosekwa kukunguluka kapena kutagulilana ngani syakwamba kulambila ni mundu jwamtyosyegwe mumpingo. Nsanja ya Olonda ja September 15, 1981, pa peji 25 jasasile kuti: “Kwamba kumkomasyape mundu jwine mpaka kuŵe pakutandila kuŵecetana ni mundujo, soni mpaka paŵe pakutandila kungulucilana. Ana mpaka tusace kutenda yeleyi ni mundu jwamtyosyegwe?”

Ana kuŵambala kutenda najo yindu yiliyose kuli kwakusosekwa yisyene? Elo, pamagongo aga: Ligongo lyandanda, tukusalosya kuti tuli ŵakulupicika kwa Mlungu, soni ku Maloŵe gakwe. Ngatukusagamba kumpikanila Yehofa naga yindu yikutujendela cenenepe, nambo tukusampikanilasoni atamose pandaŵi jakusawusya mnope. Kumnonyela Mlungu kukusatulimbikasya kuti tupikanileje malamusi gakwe gosope. Tukusamanyilila kuti jwalakwe ali jwakulungamika, jwacinonyelo, soni kuti malamusi gakwe gakusatukamucisya. (Yesaya 48:17; 1 Yohane 5:3) Ligongo lyaŵili, kuŵambala kutenda yindu ni mundu jwangapitikuka mtima kukusatucenjela m’weji ni mpingo ku yitendo yakusakala ya mundujo, soni kukusakamucisya kuti mpingowo ukole mbili jambone. (1 Akolinto 5:6, 7) Ligongo lyatatu, kukuya mwakulupicika malamusi ga m’Baibulo mpaka kumkamucisye jwamtyosyegwejo. Patukukamulana ni yalamwile acakulungwa ŵa mumpingo, tukusaŵa kuti tukumkamucisya jwakulemwa jwalepele kupikanila cikamucisyo ca acakulungwa. Kuŵambala kutenda yindu ni mjetu jwamtyosyegwe jwatukusamnonyela, mpaka kumkamucisye ‘kumanyilila’ ukulu wa cakulemwa cakwe, nikutanda kuwujila kwa Yehofa.—Luka 15:17.

Nambi uli naga jwamtyosyegwejo ali jwacinasi jwetu? Pelepa, ulongo wamacili wawukusapagwa pasikati pa ŵandu ŵamwiŵasa mpaka utendekasye kuti kulupicika kwetu kwa Yehofa kuŵe kwakusawusya. Nambo, ana tutendeje yindu mwatuli ni jwacinasi jwetu jwamtyosyegwejo? Apano ngakomboleka kusala yosope yampaka tutendeje, nambo kwende tulole yindu yiŵili yekulungwa yampaka yitukamucisye.

Mpaka yikombolece kuti jwamtyosyegwejo ali jwacinasi jwetu jwatukutama najo pamlango. Pakuŵa kuti kutyosyegwa kwangamasya cinasi, komboleka kwendelecela kutendaga najo yindu ya lisiku ni lisiku. Nambope ligongo lyakuti ŵatesile cakulemwa, jwalakwe akusaŵa kuti amasisye unasi wausimu ni ŵamwiŵasa mwakwe. M’yoyo, naga tukusaka kulosya kuti tuli ŵakulupicika kwa Yehofa, ngasitutenda yindu yausimu pampepe ni jwacinasi jwamtyosyegwe mumpingojo. Mwambone, naga tukusaka kutenda kulambila kwa peŵasa jwacinasi jwetu jwamtyosyegwe ali papopo, jwalakwejo ngakusosekwa kujigala nawo mbali pa kulambilako. Nambope, naga jwacinasi jwamtyosyegwejo ali mwanace, acinangolo akwetepe ukumu wakumjiganya soni kumjamuka mwanacejo. M’yoyo, acinangolo ŵacinonyelo mpaka alinganye yakuti amjiganyeje Baibulo mwanacejo.b—Miyambo 6:20-22; 29:17.

Nambosoni mpaka yikombolece kuti jwacinasi jwamtyosyegwejo jwangatama yalumo ni ŵacinasi ŵamwiŵasa mwakwe. Atamose kuti ndaŵi sine mpaka tusosekwe kutagulilana najo yindu yine yakwayana ni pa liŵasapo, nambo tulolecesyeje kuti ngatukutenda yindu mwakupelenganya mnope. Aklistu ŵakulupicika ŵakwete jwacinasi jwamtyosyegwe jwangakutama najo pamlango ŵangapatila magongo gakulikululucila kuti akunguluceje najo mundujo. Mmalo mwakwe, kuŵa ŵakulupicika kwa Yehofa ni ku likuga lyakwe kukusalimbikasya kuti akuyeje malamusi ga M’malemba gakwamba ya ŵandu ŵatyosyegwe. Kuŵa ŵakulupicika kwa Yehofa mpaka kulosye kuti akusamnonyela jwamtyosyegwejo, soni yeleyi mpaka yimkamucisye kuti akamulicisye masengo camuko capocele.c—Ahebeli 12:11.