Mlungu Akwakulupusya Ayisalayeli

AYISALAYELI ŵatamaga mu Eguputo kwa yaka yejinji. Yindu yajendelaga cenene, soni ŵanduŵa ŵatupile. Kwa yaka yejinji Ayisalayeli ŵaliji mkutama mu Eguputo. Ni yindu yaliji mkwajendela cenene, soni ŵapali ŵajinji. Nambo Falawo jwine ŵatandite kulamulila. Mwenye jweleju nganammanyililaga Yusufu. Mwenyeju ŵaliji jwangalwe, soni ŵajogopaga kuti Ayisalayeliŵa catupe mnope, ni ŵatesile kuŵa acikapolo. Soni ŵalamwile kuti ŵanace ŵacalume ŵakupagwa kwene wosope akajaseje mu lusulo lwa Nayilo. Nambo jwamkongwe jwine jwakulimba mtima, ŵalikulupwisye likandi lyakwe lyalilume mwakuliŵika m’citundu ni kulisisa m’matete mungulugulu lusulo. Mwanace jwamkongwe jwa Falawo ŵalokwete likandili, ni ŵalipele lina lyakuti Musa, soni ŵalilelite mu liŵasa lya ucimwene wa ku Eguputo.

Musa ali akwete yaka 40, yindu yamsakalile paŵasakaga kumcenjela kapolo jwa Ciyisalayeli kwa jwakulolela masengo jwa ku Eguputo. Musa ŵatisile ni kwawula kukutama ku cilambo ca kwanawula. Musa ali akwete yaka 80, Yehofa ŵamtumisye kuti awujile ku Eguputo akawonecele pameso pa Falawo, ni kumsalila kuti ŵagopole ŵandu ŵa Mlungu.

Paŵamsalile Falawo nganakunda ata panandi. Ni Mlungu ŵayikasisye milili jakwana likumi pa Aeguputo. Pandaŵi jilijose jiŵajawulaga Musa pameso pa Falawo kukumkamucisya kuti aganisye cenene, kutendela kuti mlili wine ukayika, Falawo nganasaka kumpikanila Musa, soni Mlungu jwakwe Yehofa. Pambesi pakwe mlili wa likumi wayikasisye ciwa pa ŵanace wosope ŵandanda kupagwa, kuleka awo pewo ŵa m’maŵasa gagapikanile Yehofa kuti apace m’matanga mwawo miyasi ja mwanace jwa ngondolo jwambopesi. Lilayika lya Mlungu lyalyajonangaga ŵanace ŵandanda kupagwawo nganiliwulaga ŵanace ŵa m’nyumba syelesi. Kutandila pelepo Ayisalayeli caka cilicose ŵakumbucilaga kulupuka kwakusimonjesyaku mwakutenda cindimba cakolanjikwa kuti Pasaka.

Ligongo lyakuti mwanace jwakwe jwandanda kupagwa ŵawile, Falawo ŵalamwile Musa ni Ayisalayeli wosope kuti akopoce mu Eguputo. Ndaŵi jijojo Ayisalayeli ŵalinganyisye yakopoka mu Eguputo. Nambo Falawo ŵasindile nganisyo. Jwalakwe yimpepe ni asilikali ni magaleta ŵatandite kwakuya. Ayisalayeli paŵayice mungulugulu Nyasa Jecejewu, yawonece kuti ŵasoŵile kwakutilila. Yehofa ŵajigaŵenye Nyasa Jecejewujo, yayakamucisye kuti Ayisalayeli ajomboce pejumu, mesi gali gagambile kwima mpela yipupa! Aeguputo paŵatandite komboka nawo pakwakuya Ayisalayeli, Mlungu ŵagawugwile mesi gala ni gamkokosile Falawo yimpepe ni asilikali ŵakwe.

Kaneko, Ayisalayeli paŵasongene mungulugulu Litumbi lya Sinayi, Yehofa ŵalangene nawo cilanga. Yehofa ŵamkamulicisye masengo Musa kuti aŵe mboni paŵapelekaga malamusi kwa Ayisalayeli kuti galongoleje ni kwacinjilicisya mu yakutendekwa yosope ya paumi wawo. Yaliji yakuti naga Ayisalayeli mwakulupicika akakamulaneje ni ulamusi wa Mlungu, Yehofa akakamucisyaga, soni mtundu wawo ukaŵele wakamucisya kwa ŵane.

Nambope Ayisalayeli ŵajinji nganalosya cikulupi mwa Mlungu. Ni Yehofa ŵatendekasisye ŵanduŵa kuti aŵe mkusyungulila mwipululu kwa yaka 40. Kaneko Musa ŵasagwile Yoswa juŵaliji jwakulupicika kuti ajinjile m’malo mwake. Pambesi pakwe Ayisalayeli ŵaliji ŵakoseka kwinjila m’cilambo ciŵacisasile Mlungu kalakala kwa Abulahamu.

​—Nganiji jityocele m’mabuku ga Eksodo; Levitiko;Numeri; Deuteronomo; Masalmo 136:10-15; Masengo 7:17-36.