LIJIGANYO 6
Ana Chipali Chembecheyo Chilichose kwa Ŵawe?
1. Ana ngani syambone sikusasala yamtuli pakwamba ya ŵawe?
Yesu paŵayiche ku Betaniya chiŵandika Yelusalemu, Lasalo juŵaliji mjakwe ŵaliji ali awile kwa masiku mcheche. Yesu ŵapite kumalembe yalumo ni Malita, soni Maliya, achalumbugwe ŵa Lasalo. Mwachangakaŵa, likuga lya ŵandu lyasongangene. Aganisye mwaŵasangalalile Malita ni Maliya, Yesu paŵamjimwisye Lasalo ku ŵawe?—Aŵalanje Yohane 11:21-24, 38-44.
Malita ŵamanyililaga ngani syambone pakwamba ya ŵawe. Jwalakwe ŵamanyililaga kuti Yehofa chachajimusya ŵawe kuti atameje pachilambo chapasi.—Aŵalanje Yobu 14:14, 15.
2. Ana ŵawe ali mundamo jamtuli?
Mlungu ŵamsalile Adamu kuti: “Mli luwundu, ni kuluwunduko chimchiwujila.”—GENESESI 3:19.
Ŵandu ŵapanganyidwe kutyochela ku luwundu. (Genesesi 2:7; 3:19) M’weji nganitukola misimu jajikusatama mkati mwa yilu yetu. M’weji tuli yakupanganyidwa yakuwoneka yakola yilu, myoyo pangali mbali jine ja m’weji jajikusakulupuka pachiwa. Patuwile, ututu wetu ukusawa, soni yatukusaganisya yikusamalaga. Ligongo ŵaŵe wangamanyilila chilichose ni ligongo lyakwe Lasalo nganasala chilichose pakwamba ya yindu yaŵasimene nayo ali awile.—Aŵalanje Salimo 146:4; Jwakulalichila 9:5, 6, 10.
Ana Mlungu akusalagasyaga ŵandu ni moto pawile? Pakuŵa Baibulo jikusalosya kuti ŵawe ngakusamanyilila chilichose, nikuti chijiganyo cha moto wa helo chili chawunami, soni chakunyosya Mlungu. Nganisyo syakwalagasya ŵandu ni moto syangamsangalasya Mlungu.—Aŵalanje Yelemiya 7:31.
Alolele fidiyo jakuti Ana Ŵawe ali Mundamo Jamtuli?
3. Ana ŵawe mpaka aŵechete ni m’weji?
Ŵawe ngaŵa mkuŵecheta kapena kupikana. (Salimo 115:17) Nambo malayika gane gali gakusakala, soni mpaka gakombole kuŵecheta ni ŵandu mwakulitendekasya kuŵa mpela ŵandu ŵawe. (2 Petulo 2:4) Yehofa akusalekasya yitendo yakuŵecheta ni ŵawe.—Aŵalanje Detulonomo 18:10, 11.
4. Ana ŵani ŵachachijimuka ku ŵawe?
Ŵandu ŵajinji ŵaŵawile chachikolasoni umi pachilambo chapasi. Ŵandu ŵanganammanyililaga Mlungu, soni ŵaŵatendaga yakusakala, nombe nawo chachijimuka ku ŵawe.—Aŵalanje Luka 23:43; Masengo 24:15.
Ŵachachijimuka ku ŵawe chachilijiganya yisyesyene yakwamba Mlungu, soni yampaka atende pakulosya kuti akumkulupilila soni kumpikanila Yesu. (Chiwunukuko 20:11-13) Ŵachachikolasoni umi ni kutendaga yindu yambone chachisangalala ni umi pachilambo chapasi kwangamala.—Aŵalanje Yohane 5:28, 29.
5. Ana kwimuka ku ŵawe kukulosya chichi pakwamba ya Yehofa?
Chembecheyo cha kwimuka ku ŵawe chichikomboleka ligongo Mlungu ŵamtumisye Mwanagwe kukutuwila. Myoyo kwimuka ku ŵawe kukulosya kuti Yehofa ali jwachinonyelo soni jwambone mtima mnope. Ana wawojo chachisangalala kwawona ŵani ŵawe pachachijimuka?—Aŵalanje Yohane 3:16; Aloma 6:23.