Ana Yakusawusya Yichimala?

YAJIKUSASALA BAIBULO

“Mlungu . .  tachasyula misosi josope mmeso mwawo, chiwa ngasichipagwasoni, yipwetesi, kulila, atamose yakusawusya.”​—Chiwunukuko 21:​3, 4, Contemporary English Version.

ANA YELEYI YIKUTUKWAYA CHAMTULI?

Yikutusimichisya kuti Mlungu jwangatendekasya yakusawusya yetu.​—Yakobo 1:13.

Yikutulimbikasya kumanyilila kuti Mlungu akusatutendela chanasa patuli pa yipwetesi.​—Sekaliya 2:8.

Yikutupa chembecheyo chakuti yipwetesi yosope yichimala.​—Masalimo 37:9-11.

ANA YISYENE TUKULUPILILEJE YAJIKUSASALA BAIBULO?

Elo, pamagongo gaŵili aga:

• Mlungu akusaŵengana ni yipwetesi, soni yindu yangali chilungamo. Aganisye muŵapikanile Yehofa pandaŵi jele ŵandu ŵane ŵalagasyaga ŵandu ŵakwe mwangalwe. Baibulo jikusasala kuti jwalakwe nganiyimnonyela ligongo lya “ŵele ŵaŵatendelaga ngalwe.”​—Ŵakulamula 2:​18, Baibulo la Dziko Latsopano.

  Mlungu akusaŵengana ni ŵandu ŵakusawulasya achimjawo. Mwambone, Baibulo jikusasala kuti Mlungu akusaŵengana ni “ŵakuwulaga ŵandu ŵangalemwa.” ​—Misyungu 6:16, 17.

• Mlungu akusamsamalila jwalijose. Ngaŵape kuti “mundu jwalijose akusamanyilila mlili wakwe, soni yipwetesi yakwe,” nambosoni Yehofa akusamanyililaga!​—2 Mbili 6:29, 30.

  Yehofa pachangakaŵapa chachimasya yipwetesi ya jwalijose kupitila mu Uchimwene ŵakwe. (Mateyu 6:9, 10) Nambo pandaŵi ajino, jwalakwe akusatondoya ŵele ŵakusamsosa ni mtima wosope.​—Masengo 17:27; 2 Akolinto 1:​3, 4.