Samuyele Ŵajendelecele Kutenda Yambone

Kutandila ali mwanace, Samuyele ŵatamaga, soni ŵatumicilaga pa nyumba ja Mlungu, malo gele ŵandu ŵayikaga kukulambila Yehofa. Ana mkumanyilila kuti yaŵele uli kuti Samuyele atameje kweleku? Kwende tutande kaje kumanyilila ya mamagwe, Hana.

Kwa yaka yejinji, Hana nganampataga mwanace atamose kuti ŵamsakaga mnope. Cati m’yoyo, ŵapopesile kwa Yehofa kuti amkamucisye. Ŵamsalile Yehofa kuti naga cacikola mwanace, cacimpeleka kuti akatameje ni kutumicilaga ku nyumba ja Mlungu. Yehofa ŵajanjile lipopelo lyakwe nipo ŵakwete mwanace. Ni ŵampele mwanacejo lina lyakuti Samuyele. Samuyele paŵayikaga yaka yitatu kapena mcece, Hana ŵatesile yaŵalangene ni Yehofa. Ŵampelece Samuyele kunyumba ja Mlungu kuti akatumicileje Mlungu kweleko.

Eli ŵaliji jwamkulungwa jwambopesi ku nyumba ja Mlungu. Ŵanace ŵa Eli ŵaŵili ŵatumicilagasoni kukoko. Naga mkukumbucila, nyumba ja Mlungu jaliji malo gakulambilila kwele ŵandu ŵasosekwaga kutenda yindu yambone. Nambo ŵanace ŵa Eli ŵatendaga yindu yakusakala. Samuyele ŵayiwonaga yaŵatendagayo. Ana Samuyele ŵatesile yindu yakusakala mpela muŵatendelaga ŵanace ŵa Eli?— Iyayi, jwalakwe ŵajendelecele kutenda yambone, mwakamulana ni yiŵamjigenye acinangologwe.

Ana mkuganisya kuti Eli ŵasosekwaga kwatenda cici ŵanace ŵakwe ŵaŵiliwo?— Jwalakwe ŵasosekwaga kwajamuka. Ngamkanaŵakundaga kuti akamuleje masengo panyumba ja Mlungu. Nambo Eli nganatenda yeleyi. M’yoyo, Yehofa ŵamtumbilile Eli, soni ŵanace ŵakwe ŵaŵiliwo. Kaneko Yehofa ŵaganicisye yakwapa cilango.

Cilo ca lisiku line, Samuyele ali m’lugono, ŵapikene jwine jwakwe ali kum’ŵilanga kuti: ‘Samuyele!’ Jwalakwe ŵawutucile kwa Eli, nambo Eli ŵamsalile kuti: ‘Nganinam’ŵilanga.’ Yeleyi yatendekwesoni kaŵili. Payatendekwe katatu, Eli ŵamsalile Samuyele kuti pacakapikanesoni kuŵilangako akajanje kuti, ‘Aŵecete Yehofa, une ngupikana.’ Samuyele ŵatesile yeleyi. Kaneko Yehofa ŵamsalile Samuyele kuti: ‘Mumsalile Eli kuti cinape cilango ŵamwiŵasa mwakwe ligongo lya yakusakala yatesile.’ Ana mkuganisya kuti yaliji yangasawusya kuti Samuyele akamsalile Eli utenga welewu?— Iyayi, yaliji yakusawusya. Nambo atamose kuti Samuyele ŵatendaga woga, jwalakwe ŵatesile yiŵamsalile Yehofa kuti atende. Yiŵaŵecete Yehofa yila yatendekwe. Ŵanace ŵaŵili ŵa Eli ŵawulajigwe, nombenajo Eli ŵawile.

Samuyele ali cisyasyo cambone kwa m’weji. Jwalakwe ŵatesile yambone atamose kuti ŵawonaga ŵandu ŵane ali mkutenda yakusakala. Nambi uli m’mwejo? Ana cimcijendelecela kutenda yambone mpela Samuyele? Naga cimcitenda yeleyi, cimcisangalasya Yehofa, soni acinangolo ŵenu.