Yosiya Ŵakwete Acimjakwe Ŵambone

Ana mkuganisya kuti kutenda yambone kuli kwangasawusya?— Ŵajinji akusaganisya m’yoyo. Baibulo jikusatusalila kuti kutenda yambone kwaliji kwakusawusya kwa mcanda jwine lina lyakwe Yosiya. Nambo ŵakwete acimjakwe ŵambone ŵaŵamkamucisyaga. Kwende tulijiganye ya Yosiya ni acimjakwe.

Babagwe Yosiya ŵaliji Amoni, mwenye jwa cilambo ca Yuda. Amoni ŵaliji jwakusakala mnope, soni ŵalambilaga mitembe. Paŵawile Amoni, Yosiyajo ŵaŵele mwenye jwa cilambo ca Yuda. Nambo pandaŵijo ŵaliji ni yaka 8! Ana mkuganisya kuti nombenajo ŵaliji jwakusakala mpela babagwe?— Iyayi, nganaŵa jwakusakala!

Atamose paŵaliji mwanace, Yosiya ŵasakaga kumpikanila Yehofa. M’yoyo, ŵasagwile kuti akunguluceje ni ŵandu ŵaŵamnonyelaga Yehofa. Acimjakwe ŵa Yosiyawo ŵamkamucisye jwalakwe kuti atendeje yambone. Ana ŵane mwa acimjakwe ŵa Yosiya ŵaliji ŵani?

Mjakwe jumo ŵaliji Sefaniya. Sefaniya ŵaliji jwakulocesya juŵakalamwisye Ayuda kuti cacisimana ni yakusawusya naga akulambila mitembe. Yosiya ŵapikanile yaŵaŵecete Sefaniya ni ŵalambilaga Yehofa, ngaŵaga mitembe.

Mjakwe jwine jwa Yosiya ŵaliji Yelemiya. Jwalakwe ŵaliji jwakulandana yaka ni Yosiya. Wosopeŵa paŵakulaga ŵatamaga mwakuŵandikana. Ŵanonyelanaga mnope mwati paŵawile Yosiya, Yelemiya ŵalembile nyimbo jakum’dandawula mjakwejo. Yelemiya ni Yosiya ŵakamusyanganaga kutenda yambone, soni kumpikanila Yehofa.

Ana mpaka mlijiganye cici pacisyasyo ca Yosiya?— Yosiya ŵasakaga kutenda yambone atamose kuti ŵaliji mwanace. Jwalakwe ŵamanyilile kuti akusosekwa kuŵa mjakwe jwa ŵandu ŵakunonyela Yehofa. Mmwejosoni mkusosekwa mkunguluceje ni ŵandu ŵakusanonyela Yehofa, soni ŵampaka amkamucisye kutenda yambone!