Liwukutu Likolela Moto

Mose ŵatemi ku Midiyani kwa yaka 40. Jwalakwe ŵalombele soni ŵakwete ŵanace. Lisiku line, jwalakwe ali mkucinga ngondolo ciŵandika Litumbi lya Sinayi, jwaciweni cindu cakusimonjesya. Liwukutu lya miŵa lyakolelaga moto nambo nganilipyaga. Mose paŵaliŵandicile liwukutulyo kuti alole yayatendekwagayo, jwapikene maloŵe kutyocela paliwukutulyo kuti, ‘Mose! Mkaŵandicila. M’wule sapato syenu ligongo pamjimipo gali malo geswela.’ Jwaliji Yehofa juŵaŵecetaga pakamulicisya masengo lilayika.

Mose wamkamwile woga ni jwalisiŵilisye ngope jakwe. Maloŵego gatite, ‘Nakuweni kulagasika kwa Ayisalayeli. Cinjakulupusya jemanjajo m’miyala mwa Aiguputo ni cinjajawusya m’cilambo cambone. M’mwejo ni ŵacimcalongolela ŵandu ŵangu kutyoka ku Iguputo.’ Komboleka kuti yeleyi yamsimonjesye Mose.

Mose jwawusisye kuti, ‘Ana ngajileje cici naga ŵandu akambusye kuti ŵani ŵamtumile?’ Pakwanga Mlungu ŵatite, ‘Mkasalile jemanjajo kuti Yehofa, Mlungu jwa Abulahamu, Isaki soni Yakobo ni jwandumile.’ Kaneko Mose ŵatite, ‘Nambi uli naga ŵanduwo ngaja kumbikanila?’ Yehofa ŵampele umboni wakulosya kuti cakamkamucisye. Ŵamsalile Mose kuti aponye ndodo jakwe pasi. Ni ndodojo jasandwice lijoka. Mose paŵalikamwile lijokalyo kumcila kwakwe lyaŵelesoni ndodo. Kaneko Yehofa ŵatite, ‘Naga mkuja kutenda yeleyi, cakamanyilile kuti namtumile une.’

Mose ŵatite, ‘Ndili jwangakombola kuŵeceta.’ Ni Yehofa ŵamsimicisye kuti, ‘Cingamsalile yacimkaŵecete soni cinampe mkulugwenu Aloni kuti akamkamucisye.’ Mose paŵamanyilile kuti Yehofa ŵaliji ni jwalakwe, ŵajigele ŵamkwakwe soni ŵanace ŵakwe ni kuwujila ku Iguputo.