Milili Jitatu Jandanda

Mpela acikapolo, Ayisalayeli ŵakamulaga masengo gakupweteka mnope mwakwakanganicisya. M’yoyo, Yehofa ŵamtumisye Mose ni Aloni kwa Falao ni utenga wakuti, ‘Mwakunde ŵandu ŵangu ajawule m’cipululu kuti akalambile une.’ Mwakupoka, Falao ŵajanjile kuti, ‘Jwangali nayo masengo yasasile Yehofa soni ngangunda Ayisalayeli kuti ajawuleje.’ Kaneko Falao jwatandite kwakamulisya Ayisalayeli masengo gakupweteka mnope. Ligongo lya yeleyi Yehofa ŵatesile yineyakwe pakusaka kumjiganya Falao lijiganyo. Ana mkumanyilila yaŵatesile? Jwalakwe jwayikasisye Milili 10 ku Iguputo. Yehofa ŵamsalile Mose kuti, ‘Falao ngakumbikanila une. Jwalakwe kundaŵi cakaŵe pa Lusulo lya Nayilo. Kweleko mkamsalile kuti ligongo lyakuti nganiŵakunda ŵandu ŵangu kuti ajawule, mesi ga m’lusulo lya Nayilo cigasanduce miyasi.’ Myoyo, Mose jwapikanile ni jwapite kwa Falao jula. Ali ayice ku lusuloko, Aloni ŵaputile mesi gala ni ndodo jakwe kaneko mesi gasandwice miyasi. Paŵatendaga yeleyi Falao jwaliji mkulola. Ni kaneko lusulolo lwatandite kununga, somba syawile soni kwaliji kwangali mesi gambone gakumwa. Nambope Falao nganiŵakunda Ayisalayeli kuti ajawuleje.

Pali pamasile masiku 7, Yehofa ŵamtumisyesoni Mose kwa Falao ni utenga wakuti, ‘Naga ngamkwakunda ŵandu ŵangu kwawula, mu Iguputo cimugumbale yula.’ Aloni paŵakwesisye ndodo jakwe mwinani yula yatandite kusimanikwa palipose. Mwamti ŵandu ŵatandite kuyisimana yulayo m’nyumba syawo, pabedi soni mu mbale. Palipose paliji yula. Falao ŵamsalile Mose kuti aŵende kwa Yehofa kuti alekasye mliliwo. Jwalakwe jwasasile kuti ciŵakunde Ayisalayeli kuti ajawuleje. M’yoyo, Yehofa ŵalekasisye mliliwo ni Aiguputo ŵatandite kuwunjika mawunjili ga yula yewe. Cilamboco catandite kununga. Nambo Falao nganiŵakundasoni Ayisalayeliwo kuti ajawule.

Kaneko Yehofa ŵamsalile Mose kuti, ‘Aloni apute pasi ni ndodo jakwe kaneko luwundu lusanduce membe syakuluma.’ Ndaŵi jijojo, membe syatandite kusimanikwa palipose. Ŵane mwa ŵandu ŵa Falao ŵamsalile jwalakwe kuti, ‘Mliliwo utyocele kwa Mlungu.’ Nambope Falao nganiŵakunda Ayisalayeli kwawula.