Lute ni Naomi

Pandaŵi jele ku Yisalayeli kwaliji cilala, jwamkongwe jwaciyisalayeli lina lyakwe Naomi, jwasamile ni kwawula ku Mowabu yalumo ni ŵamkwakwe soni ŵanace ŵakwe ŵaŵili ŵacalume. Pali papite ndaŵi ŵamkwakwe Naomi ŵajasice. Ŵanace ŵakwe ŵacalume ŵala ŵalombele acakongwe ŵacimowabu ŵaŵaliji Lute soni Olipa. Yakutesya canasa yaliji yakuti, nombe ŵanace ŵa Naomi ŵala ŵajasicesoni.

Naomi paŵapikene kuti cilala cacaliji ku Yisalayeli cimasile, jwaganicisye yakuwujila kumangwakwe. Lute soni Olipa ŵanyakwice najo yalumo, nambo ali mkati mwa ulendowo, Naomi jwasalile kuti, ‘Jemanja mwaliji acakongwe ŵambone kwa ŵanace ŵangu soni kwa une. Ngusaka jemanja wosope mlombedwesoni. M’wujile kumangwenu ku Mowabu.’ Acakongwewo ŵatite, ‘Tukusanonyela wawojo! Ngatukusaka kwaleka.’ Nambo Naomi ŵajendelecele kwasalila kuti awujile. Pambesi pakwe Olipa jwawujile, nambo Lute jwasigele. Naomi ŵamsalile Lute kuti, ‘Olipa awujile kwa ŵandu ŵakwe soni kwa milungu jakwe. Mmwejosoni mwujile najo yimpepe soni mjawule ku nyumba ja mama ŵenu.’ Nambo Lute ŵatite, ‘Ngangusaka kwaleka. Ŵandu ŵawo caciŵa ŵandu ŵangu soni Mlungu jwawo caciŵa Mlungu jwangu.’ Ana mkuganisya kuti Naomi jwapikene uli Lute ali aŵecete maloŵe gelega?

Lute ni Naomi ŵakopocele ku Yisalayeli ŵandu ali atandite gungula balele. Lisiku line, Lute ŵapite kukuwulula balele mumgunda wa jwamlume jwine lina lyakwe Bowasi. Jwalakwe jwaliji mwanace jwa Lahabu. Bowasi ŵapikene kuti Lute jwaliji M’mowabu juŵatamaga mwakulupicika ni Naomi. Bowasi ŵasalile ŵamasengo ŵakwe kuti aleceje balele jwine kuti Lute alokoteje.

Ligulo lya lisiku lyelelo, Naomi ŵam’wusisye Lute kuti, ‘Ana lelo mwawululaga mumgunda mwa ŵani?’ Lute ŵajanjile kuti, ‘Mumgunda mwa Bowasi.’ Naomi ŵamsalile kuti, ‘Bowasi ali jumo jwa ŵacibale ŵa ŵamkwangu. Mkaleka kuwulula mumgunda mwakwe yalumo ni asikana ŵanewo. Pangali jwampaka amlagasye kweleko.’

Lute ŵajendelecele kuwulula mumgunda wa Bowasi mpaka pambesi pandaŵi jagungula balele. Bowasi ŵayimanyi kuti Lute ali jwakulimbicila masengo soni jwamkongwe jwambone. M’masiku gelego, naga jwamlume jwamlombele awile ali jwangali ŵanace ŵacalume, acabale ŵakwe ŵamlombaga jwamkongwe jwamasijejo. Ligongo lya yeleyo Bowasi ŵamlombile Lute. Jemanjaji ŵaŵelece mwanace lina lyakwe Obedi, jwele panyuma pakwe jwaliji angangagwe Mwenye Daudi. Acimjakwe ŵa Naomi ŵasangalele. Ŵaŵecete kuti, ‘Candanda Yehofa ŵampele Lute jwaŵele jwambone kwa mmwejo, apanosoni mkwete cisukulu cacilume. Yehofa acimbicikwe.’