Hana Akuŵenda Mwanace

M’yisalayeli jwine jwakonjidwa kuti Elikana jwakwete acakongwe ŵaŵili, ŵaŵaliji Hana ni Penina. Nambo Elikana jwamnonyelaga mnope Hana. Penina ŵakwete ŵanace ŵajinji. Ni ŵamnyosyaga Hana ligongo lyakuti nganakola ŵanace. Caka cilicose Elikana ŵalijigalaga liŵasa lyakwe kunyumba ja kulambilila ku Silo. Lisiku line paŵaliji kweleko, Elikana jwayiweni kuti ŵamkwakwe ŵakunonyelwa ngakusangalala. Jwalakwe jwatite kwa ŵamkwewo, ‘Conde mkalila’ ŵamkwangu. Une ndili ŵamkwenu, ngumsamnonyela.’

Kaneko Hana jwajawile pamalo gajika kukupopela. Jwalakwe nganaleka kulila paŵaŵendaga cikamucisyo kwa Yehofa. Ni jwatesile cilanga kwa Yehofa kuti, ‘Naga akumba mwanace, cinjimpeleka kwa wawojo, soni cacatumicila kwa umi wakwe wosope.’

Jwamkulungwa jwa Ŵambopesi, Eli, jwam’weni Hana ali mkulila capasipasi, ni jwaganisyaga kuti amwele mkologo. Nambo Hana jwatite, ‘Ambuje, une nganingolelwa. Nambo ngulaga mnope, ni ngumsalila Yehofa.’ Eli ali ayimanyi kuti alemwisye ŵamsalile Hana kuti, ‘ Mlungu ampe yamkuŵendayo.’ Pelepo Hana ŵapikene cenene mumtima mwakwe ni ŵawusile. Mkanicimale caka, jwalakwe jwakwete mwanace jwamlume ni jwampele lina lyakuti Samuyele. Mgambe ganisya muŵasangalalile Hana!

Hana nganaliŵalila cilanga caŵatesile kwa Yehofa. Mwanacejo ali agambile kuleka konga ŵamjawisye kunyumba jakulambilila. Jwalakwe ŵamsalile Eli kuti, ‘Aju ali mwanace junaŵendile jula. Ngumpeleka kwa Yehofa kuti amtumicileje kwa umi wakwe wosope.’ Elikana ni Hana ŵajawulaga kukumlola Samuyele caka cilicose soni ŵamjigalilaga mkanjo wangali makono. Yehofa ŵampelesoni Hana ŵanace ŵatatu ŵacalume soni ŵaŵili ŵacakongwe.