Yesu Akumjimusya Lasalo ku Ŵawe

Yesu ŵakwete acimjakwe ŵatatu ŵapamtima ŵaŵatamaga ku Betaniya. Jemanjaji ŵaliji Lasalo ni acalumbugwe ŵaŵili ŵaŵaliji Maliya ni Malita. Lisiku line Yesu paŵaliji lisi line lya lusulo lwa Yolodani, Maliya ni Malita ŵamtumicisye Yesu utenga wakusosekwa mwacitema. Utenga wakwe waliji wakuti, ‘Lasalo alwasile mnope. Conde ayice mwacitema!’ Nambo Yesu nganajawula ndaŵi jijojo. Jwalakwe ŵajawile pali pamasile masiku gakupunda gaŵili. Kaneko ŵasalile ŵakulijiganya ŵakwe kuti, ‘Kwende tujawule ku Betaniya. Lasalo akugona ni ngusaka ngamjimusye.’ Ŵandumetume ŵala ŵatite, ‘Naga Lasalo akugona, nikuti caŵe cenene.’ Nambo kaneko Yesu ŵasalile mwangapita mumbali kuti, ‘Lasalo awile.’

Yesu paŵayice ku Betaniya, paliji pali pamasile masiku mcece ciwile Lasalo. Mwamti likuga lya ŵandu lyayice kukumtondoya Malita ni Maliya. Malita ali apikene kuti Yesu ayice, jwawutwice kuti akasimane najo. Ni Malita ŵatite, “Ambuje akaŵe akuno, mlumbugwangu ngamkanawa.” Yesu ŵamsalile jwalakwe kuti, ‘Mlumbugwenu caŵesoni cijumi. Ana Malita, mkukulupilila yeleyi?’ Jwalakwe jwajanjile kuti, ‘Ngukulupilila kuti jwalakwe cacijimuka pacacijimukaga ŵandu ŵawe.’ Kaneko Yesu ŵamsalile kuti, “Une ndili kwimuka soni umi.”

Kaneko Malita ŵajawile kwa Maliya ni ŵamsalile kuti, ‘Yesu ayice.’ Maliya ŵawutucile kuŵaliji Yesu, soni likuga lya ŵandu nombe nalyo lyamkuyisye. Ali asimene ni Yesu, jwalakwe jwatindiŵele ali mkulila. Jwalakwe jwatite, ‘Ambuje akaŵe akuno, mlumbugwetu akaliji cijumi!’ Yesu camkamwile mnope canasa ali am’weni Maliya ali mkulila, mwamti jwalakwe jwatanditesoni kulila. Likuga lya ŵandu lila palyam’weni Yesu ali mkulila lyatite, ‘Alole, Yesu ŵamnonyelaga Lasalo.’ Nambo ŵane ŵawusyaga kuti, ‘Ligongo cici nganamkulupusya mjakwejo?’ Ana sambano Yesu ŵatesile cici?

Yesu ŵajawile kumalembe kuŵam’ŵisile Lasalo. Nambo pamlango wa lilembelyo ŵawugelepo ni liganga lyekulungwa. Ni Yesu jwatite, ‘Atyosye ligangalyo.’ Malita ŵatite, ‘Nambo pamasile masiku mcece ciwile, komboleka kuti mtembowo utandite kununga.’ Nambope ŵanduwo ŵatyosisye ligangalyo. Kaneko Yesu ŵapopesile kuti, ‘Atati, ngwayamicila kuti ambikene. Ngumanyilila kuti akusambikanila, nambo nguŵeceta mwagumila kuti ŵanduŵa amanyilile kuti ŵandumile wawojo.’ Kaneko jwalakwe jwaŵilasile mwagumila kuti, “Lasalo mkopoce!” Kaneko patendekwe cindu cakusimonjesya. Lasalo jwakopwece m’malembe mula ali jwam’ŵijilile ni nguwo sya malilo. Ni Yesu ŵatite, “Amgopole ni amlece ajawuleje.”

Ŵandu ŵajinji ŵaŵayiweni yeleyi ŵamkulupilile Yesu. Nambo ŵane ŵapite kukwasalila Afalisi. Kutandila pandaŵijo, Afalisi ŵasakaga kum’wulaga Lasalo yalumo ni Yesu. Jumo jwa ŵandumetume 12 ŵa Yesu jwakolanjidwa Yudasi Isikaliyoti, mwamtemela ŵajawile kwa Afalisi ni kwawusya kuti, ‘Ana cacimba mbiya silingwa ndili nakamucisye kumkamula Yesu?’ Jemanjajo ŵakamulene yakumpa mbiya 30 sya silifa. Kaneko Yudasi ŵatandite kusosasosa litala lyakumpelecela Yesu kwa Afalisi.