LIJIGANYO 12
Yampaka Yakamuchisye Kupitilisya Kulijiganya Baibulo
Kulijiganya Baibulo kuli kwambone mnope, nambo ndaŵi sine kukusaŵa kwakusawusya. Ndaŵi sine mpaka ayiwoneje kuti yili yangakomboleka kupitilisya kulijiganya Baibulo. Ligongo chichi akusosekwa kulingalinga kuti apitilisye kulijiganya Baibulo? Ana ni chichi champaka chakamuchisye kuti apitilisye atamose pakusimana ni yakusawusya?
1. Ligongo chichi kulijiganya Baibulo kuli kwakusosekwa?
“Maloŵe ga Mlungu gali ga umi soni gakusakamula masengo mwamachili.” (Ahebeli 4:12) Baibulo jili jakusosekwa mnope ligongo jikusasala nganisyo sya Mlungu soni kuti jwalakwe akusiŵanonyela wawojo. Jikusamkamuchisya mundu kumanyilila yindu, kola lunda lusyesyene soni chembecheyo. Chakusosekwa mnope chili chakuti, Baibulo jikusamkamuchisya mundu kuŵa paunasi ni Yehofa. Machili ga maloŵe ga Mlungu gachitukamuchisya kukola umi wambone patukulijiganya Baibulo.
2. Ana ligongo chichi yajikusajiganya Baibulo ayiwoneje kuŵa yakusosekwa?
Maloŵe ga m’Baibulo gali mpela chipanje chakusosekwa mnope. Ni ligongo lyakwe Baibulo jikusatusalila kuti ‘tusume chakuwona ni ngachisumisyasoni.’ (Misyungu 23:23) Tuyiwoneje yindu yatukusalijiganya m’Baibulo kuŵa yakusosekwa mnope. Kutenda yeleyi kuchitukamuchisya kupitilisya kulijiganya Baibulo atamose patusimene ni yakusawusya.—Aŵalanje Misyungu 2:4, 5.
3. Ana Yehofa mpaka ŵakamuchisye uli kuti apitilisye kulijiganya Baibulo?
Yehofa ni juŵatupanganyisye soni ali mjetu. Myoyo jwalakwe akusasaka kwakamuchisya wawojo kuti alijiganye yakwamba jwalakwe. Jwalakwe mpaka ŵape machili kuti ‘asoseje [“asachilileje,” NWT] kutenda yayili yakumsangalasya jwalakwe.’ (Aŵalanje Afilipi 2:13) Myoyo Yehofa ali jwakoseka kwakamuchisya kuti anonyeleje kulijiganya soni kuyikamulichisya masengo yakulijiganya. Jwalakwe mpaka ŵakamuchisyesoni kuti apilileje pakusimana ni yipwetesi soni ŵane pakwalagasya. Ndaŵi syosope apopeleje kwa Yehofa kuti ŵakamuchisye kupitilisya kulijiganya Baibulo.—1 Atesalonika 5:17.
KULIJIGANYA YEJINJI
Chitulijiganye yampaka yakamuchisye kuti apitilisye kulijiganya Baibulo atamose kuti yikusiyatupilaga yakutenda, kapena ŵane akusiŵasisya. Chitulolesoni yampaka atende Yehofa pakwakamuchisya kuti apitilisye kulijiganya.
4. Akuwoneje kulijiganya Baibulo kuŵa kwakusosekwa
Ndaŵi sine yikusatutupila mnope yakutenda mwamti tukusayiwona kuŵa yakusawusya kuti tulijiganye Baibulo. Ana chichi champaka chitukamuchisye? Aŵalanje Afilipi 1:10, kaneko akambilane yiwusyo ayi:
Ana ni yindu yapi yakusayiwona kuti yili “yambone mnope” paumi wawo?
Ana mpaka atende chichi kuti kulijiganya Baibulo akuwoneje kuŵa kwakusosekwa?
Naga akutanda kutaga msanga mu chibigili kaneko ni kuŵika maganga, magangago nganigaŵa gakwanile
Naga akutanda kuŵika maganga kaneko ni kutaga msanga, msangawo uchikwana. Mwakulandana ni yeleyi, naga tukulongosya “yambone [“yakusosekwa,” NWT] mnope” tukuchikola ndaŵi jakutendela yindu yine
Kulijiganya Baibulo kukusatukamuchisya kuti tummanyilile Mlungu soni tumtumichileje. Aŵalanje Mateyu 4:4, kaneko akambilane chiwusyo achi:
Ana ni umbone wamtuli wampaka tupate naga tukusakuwona kulijiganya Baibulo kuŵa kwakusosekwa?
5. Apitilisye kulijiganya Baibulo atamose ŵane pakwalagasya
Ndaŵi sine ŵane mpaka ŵatengusye ni chakulinga chakuti aleche kulijiganya Baibulo. Kwende tulole yayamtendechele Francesco. Alolele FIDIYO, kaneko akambilane yiwusyo ayi.
Ana achimjakwe ŵa Francesco soni ŵamwiŵasa mwakwe ŵatesile chichi paŵamanyilile yaŵalijiganyaga?
Ana kupitilisya kulijiganya kwamkamuchisye chamtuli Francesco?
Aŵalanje 2 Timoteo 2:24, 25, kaneko akambilane yiwusyo ayi:
Ana ŵamwiŵasa mwawo soni achimjawo akusapikana uli pakwawona wawojo alimkulijiganya Baibulo?
Mwakamulana ni lilembali, ana mpaka atende chichi naga ŵane ngakusangalala ligongo lyakuti wawojo akulijiganya Baibulo? Ligongo chichi akwanga myoyo?
6. Amdalileje Yehofa kuti ŵakamuchisye
Patuli paunasi ni Yehofa, tukusaŵa ŵakusachilila mnope kumsangalasya jwalakwejo. Nambope ndaŵi sine mpaka yitusawusyeje kuchenga ndamo syetu kuti sikamulaneje ni yakusasaka jwalakwe. Naga yili myoyo akaleka kulijiganya Baibulo. Yehofa chachakamuchisya. Alolele FIDIYO, kaneko akambilane yiwusyo ayi.
Ana Jim jwachenjile ndamo syapi kuti amsangalasyeje Yehofa?
Ana chichi chachikwasangalasya ni yaŵatesile Jim?
Aŵalanje Ahebeli 11:6, kaneko akambilane yiwusyo ayi:
Ana Yehofa chachatendela chichi ŵandu ŵakusasachilila kummanyilila soni kutenda akumsangalasya?
Mwakamulana ni lilembali, ana Yehofa akusapikana uli pakwawona wawojo ali mkulingalinga kulijiganya Baibulo?
JWINE MPAKA ŴAWUSYE KUTI: “Ligongo chichi akulijiganya Baibulo?”
Ana mpaka ajanje uli?
YALIJIGANYISYE
Kulijiganya Baibulo mpaka kwakamuchisye kuti chasangalale ni umi mpaka kalakala. Apitilisye kumdalila Yehofa soni jwalakwe chachatendela yindu yambone.
Yiwusyo yakuwilisya
Ligongo chichi yakusalijiganya m’Baibulo yili yakusosekwa kwa wawojo?
Ana mpaka asaguleje mwamtuli “yakusosekwa mnope” paumi wawo?
Ligongo chichi akusosekwa kumŵenda Yehofa kuti ŵakamuchisye kupitilisya kulijiganya Baibulo?
YAKULINGA YINESONI
Alole yindu mcheche yayakamuchisye ŵane kuti akamulichisyeje ndaŵi jawo mwalunda.
“Ana Mpaka Atende Yamtuli Kuti Akamulichisyeje Masengo Ndaŵi Mwalunda?” (Ajimuche!, Febuluwale 2014)
Alole yaŵatesile Yehofa pakumkamuchisya jwamkongwe jwine jwele ŵamkwakwe nganasakaga kuti amsangalasyeje Mlungu.
Alole umbone wapatile jwamlume jwine ligongo lyakuti ŵamkwakwe nganawujila munyuma.
Ŵa Mboni sya Yehofa akusiŵajimba magambo gakuti akusamasya maŵasa. Ana yeleyi yili yisyene?
“Ana ŵa Mboni sya Yehofa Akusamasya Malombela Kapena Akusagalimbisyaga?” (Ngani ja pa intaneti)