Msimu Ukusatendela Umboni Pamo ni Msimu Wetu

1-3. Ligongo cici lisiku lya Pentekote lyaliji lyapajika, soni ana yeleyi yakwanilisye catuli yakulocesya ya m’Malemba? (Alole ciwulili cacili penanici.)

LYALIJI Lyamlungu kundaŵi pa lisiku lya Pentekote mu 33 C.E. Lisikuli lyaliji lyapajika kwa ŵandu ŵa mumsinda wa Yelusalemu. Lyaliji lisiku lya cindimba soni lyasabato. Mbopesi syaliji sili sipelecedwe kala kundaŵi m’nyumba ja Mlungu. Sambano ŵandu ŵaliji mkusangalala mnope jwamkulungwa jwa ŵambopesi paŵakosecelaga kupeleka mbopesi ja mikate jiŵili jakola cakusasaŵilisya. (Lev. 23:15-20) Mbopesi jeleji jalosyaga kutanda kwa ndaŵi jagowola tiligu.

² Payatendekwaga yeleyi pa nyumba ja Mlungu, cindu cine cakwe cakusosekwa mnope caliji cili cisigele panandi kutendekwa m’cipinda capenani ca m’nyumba jine ja mumsindawo. M’cipindamo mwaliji Aklistu ciŵandika 120 ŵaŵasongene pampepe ni ‘kupopelaga.’ (Mase. 1:13-15) Yaŵatendaga jwamkulungwa jwa ŵambopesi palisiku lya Pentekote yaliji yakamulana ni yindu yayaliji yili yisigele panandi kwatendecela Aklistuwo. Yeleyo yakwanilisye yakulocesya ya Yoweli yaŵasasile yaka ciŵandika 800 munyumamo. (Yow. 2:28-32; Mase. 2:16-21) Ana cindu cakusosekwa mnope cacatendekwe palisiku lyelelyo caliji cici?

³ Aŵalanje Masengo 2:2-4. Likuga lya Aklistu lyalyasongene m’cipinda capenanico lyapocele msimu weswela wa Mlungu. (Mase. 1:8) Paŵapocele msimuwo ŵatandite kulocesya kapena kutendela umboni yindu yakusimonjesya yaŵayiweni soni yaŵayipikene. Petulo ŵasalile ŵandu ŵane ŵaŵasongene kusosekwa kwa yindu yayatendekweyo. Jwalakwe ŵatite, “Apitikuce mitima, soni jwalijose mwa jemanja abatiswe m’lina lya Yesu Klistu kuti amkululucile yakulemwa yenu. Naga akutenda yeleyo cacipocela mtuka walulele wa msimu weswela.” Ŵandu ciŵandika 3,000 ŵabatiswe palisikulyo soni ŵapocele msimu weswela.—Mase. 2:37, 38, 41.

4. (a) Ligongo cici tukusosekwa kola lung’wanu ni yayatendekwe pa lisiku lya Pentekote? (b) Ana cindu cine capi cakusosekwa mnope cacatendekwe munyumamo pa lisiku lyakulandana ni lya Pentekote mu 33 C.E? (Alole maloŵe gakumbesi.)

⁴ Ligongo cici yayatendekwe pa Pentekote mu 33 C.E. yili yakusosekwa mnope kwa m’weji? Ligongo lyakuti Yesu Klistu, jwali Jwamkulungwa jwa Ŵambopesi wosope ŵakwanilisye yakulocesya.^[1] Palisiku lya Pentekote jwamkulungwa jwa ŵambopesi ŵapelekaga kwa Yehofa mbopesi ja mikate jiŵili jakola cakusasaŵilisya. Mikatejo jajimilaga ŵakumkuya ŵa Yesu ŵandanda ŵaŵasagwilwe kutyocela kwa ŵandu ŵakulemwa ni kuŵa ŵanace ŵa Mlungu. Yeleyi yawugwile litala lyakuti “yisogosi yandanda” yakutyocela mu mtundu wa ŵandu yijawuleje kwinani ni kuŵa mayimwene ga Ucimwene wa Mlungu wawuciyikasya majali gangaŵalanjika kwa ŵandu ŵakupikanila. (Yak. 1:18; 1 Pet. 2:9) M’yoyo, cinga tukwete cembeceyo cakuja kutama kwinani ni Yesu kapena cakutama pacilambo capasi kwangamala, nambo yayatendekwe pa lisiku lya Pentekote mu 33 C.E. yikusatukwaya.

ANA CICI CACIKUSATENDEKWA MUNDU PASAGWILWE?

5. Ana tukumanyilila catuli kuti ŵandu ngakusasagulwa ni msimu weswela m’litala lyakulandana?

⁵ Yikaŵe kuti wawojo ŵaliji jumo mwa ŵakulijiganya ŵaŵapocele msimu weswela wakuwoneka mpela lilamba lya moto, mwangakayicila ngamkanaliliŵalila lisiku lyelelyo. Ngamkanakayicila kuti asagwilwe ni msimu weswela, mnopemnope pakapocele mtuka wakusimonjesya wakuŵeceta yiŵeceto yine. (Mase. 2:6-12) Nambo ana ŵandu wosope akusasagulwa ni msimu weswela m’litala lyakulandana ni likuga lyandanda lya ŵakulijiganya 120 ŵala? Iyayi. Ŵandu ŵane wosope ŵaŵasimanikwe ku Yelusalemu ŵasagwilwe paŵabatiswaga. (Mase. 2:38) Jemanjaji nganapocela malamba mpela ga moto pamtwe pawo. Konjecesya pelepa, ngaŵa kuti ŵandu wosope akusasagulwa pakubatiswa. Mwambone, Asamaliya ŵasagwilwe ni msimu weswela pali papitile kandaŵi kutyocela paŵabatiswe. (Mase. 8:14-17) Soni, Koneliyo ni ŵa m’liŵasa lyakwe ŵasagwilwe ni msimu weswela mkanaŵe kubatiswa.—Mase. 10:44-48.

6. Ana ŵasagulwe wosope akusapocela cici, soni ana yeleyi yikusiyasimicisya cici?

⁶ Yili yisyene kuti ŵandu wosope ngakusasagulwa m’litala lyakulandana. Ŵane akusamanyilila ndaŵi jijojo kuti Mlungu ŵasagwile, nambo ŵane akusamanyilila panandipanandi. Nambope, cinga mundu ŵasagwilwe m’litala lyatuli, cakusosekwa mnope cili cakuti jwalijose akusapocela cindu caŵacisasile ndumetume Paulo paŵatite, “Ali akulupilile ŵapocele cidindo ca msimu weswela welagucisyewo, wawuli cikole ca cipanje cetu camsogolo.” (Aef. 1:13, 14) M’yoyo, Yehofa akusakamulicisya masengo msimu wakwe weswela pakwasimicisya Aklistuwo kuti ŵasagwile kuti cajawule kwinani. Mklistu jwasagwilwe akusasimicisya yeleyi mumtima mwakwe ligongo lya cikole cakusapocela.—Aŵalanje 2 Akolinto 1:21, 22; 5:5.

7. Ana Mklistu jwamsagulwe jwalijose akusosekwa kutenda cici kuti capocele mbote jakwe jakwawula kwinani?

⁷ Ana Mklistu papocele cikoleci yikusaŵa yacitamile kuti cacijawula kwinani? Iyayi. Yili yisyene kuti jwalakwe akusaŵa jwakusimicisya kuti ŵaŵilanjikwe kuti cajawule kwinani. Nambo kuti capocele mbote jakweji yikwegamila kuti ajendelecele kuŵa jwakulupicika kwa Yehofa. Petulo ŵasasile kuti, “M’yoyo abale, atende yiliyose yakomboleka kuti aŵepe ŵakulupicika kuti ajendelecele kuŵa pasikati pa ŵandu ŵele Mlungu ŵaŵilasile ni kwasagula. Pakuŵa naga akutendape yeleyi ngasalepela ata panandi. Cati m’yoyo cacawugulila mlango kuti ajinjile mwaucimbicimbi mu Ucimwene wangamala wa Ambuje ni Mkulupusyo jwetu Yesu Klistu.” (2 Pet. 1:10, 11) M’yoyo, Mklistu jwamsagulwe jwalijose akusosekwa kulingalinga kuti aŵepe jwakulupicika, nambo naga ngakutenda yeleyi ngasapocela mbote jakwe.—Ahe. 3:1; Ciu. 2:10.

ANA MUNDU AKUSAMANYILILA CATULI KUTI ASAGWILWE?

8, 9. (a) Ligongo cici yili yakusawusya kwa ŵandu ŵajinji kupikanicisya yayikusatendekwa mundu pasagwilwe? (b) Ana mundu akusamanyilila catuli kuti aŵilanjikwe kuti cajawule kwinani?

⁸ Ŵakutumicila ŵa Yehofa ŵajinji yikusiyasawusya kupikanicisya yayikusamtendecela mundu pasagwilwe. Yeleyi yili yakupikanika ligongo lyakuti jemanjajo nganaŵa ŵasagulwe. Sonitu Mlungu pandanda ŵapanganyisye ŵandu kuti atameje kwangamala pacilambo capasi ngaŵaga kwinani. (Gen. 1:28; Sal. 37:29) Nambope, Mlungu ŵasagwile ŵandu ŵane kuti cakaŵe mayimwene soni ŵambopesi kwinani. M’yoyo pasagwilwe, cembeceyo cawo, kaganisye soni mwakusapikanila yikusacenga mwati akusajembeceya kuja kutama kwinani.—Aŵalanje Aefeso 1:18.

⁹ Nambo ana mundu akusamanyilila catuli kuti aŵilanjikwe kuti cajawule kwinani? Kwanga kwakwe kukusimanikwa m’maloŵe gele Paulo ŵasalile Aklistu ŵasagulwe ŵa ku Loma ‘ŵaŵaŵilanjikwe kuti aŵe ŵaswela.’ Jwalakwe ŵasalile kuti, “Nganimpocela msimu wa ukapolo wakutendekasyasoni woga, nambo mwapocele msimu wakuti m’ŵe ŵanace, watukusagumila nawo kuti: ‘Abba, Atati!’ Pakuŵa msimuwo ukusatendela umboni pamo ni msimu wetu kuti tuli ŵanace ŵa Mlungu.” (Alo. 1:7; 8:15, 16) Pakamulicisya masengo msimu weswela, Mlungu akusamtendekasya mundu kumanyilila cenene kuti jwalakwejo aŵilanjikwe kuti cakalamulile mpela mwenye kwinani pampepe ni Yesu.—1 Ates. 2:12.

10. Ana lilemba lya 1 Yohane 2:27 likugopolela cici palikusala kuti Aklistu ŵasagulwe ngakusasosecela kuti mundu jwine ŵajiganyeje?

¹⁰ Ŵandu ŵaŵilanjikwe ni Mlungu kuti cajawule kwinani ngakusasosecelasoni kuti mundu jwine ŵasalile kuti asagwilwe. Yehofa akusiŵatendekasya jemanjaji kuŵa ŵakusimicisya ya yeleyi. Ndumetume Yohane ŵasalile Aklistu ŵasagulwe kuti, “Jemanja mwasagwilwe ni jwamswelajo, soni wosope mkumanyilila yeleyi. Mlungu ŵamsagwile jemanja ni msimu soni msimuwo uli ciŵela mwa jemanja. M’yoyo ngamkusosecela kuti mundu jwine amjiganyeje, nambo pakuŵa mwasagwilwe mwakuwona ngaŵaga mwaunami, ligongo lyakusagulwako, mkwiganyidwa yindu yosope. Mpela muŵamjiganyicisye, mjendelecele kuŵa ŵakamulana najo.” (1 Yoh. 2:20, 27) Aklistu ŵasagulwe akusasosecela kulijiganya yindu yausimu mpela mundu jwalijose. Nambo ngakusasosecela kuti mundu jwine ŵasimicisyeje kuti ali ŵasagulwe yisyene. Macili gekulungwa ga Yehofa gagali msimu weswela gakusasimicisya jemanjajo kuti ali ŵasagulwe.

“KUPAGWA MWASAMBANO”

11, 12. Ana Mklistu jwamsagulwe komboleka kayicilaga ya cici, nambo ana ngakusakayicila ya cici?

¹¹ Mklistu pasagwilwe ni msimu weswela, akusacenga mnope. Yesu ŵasasile yayikusatendekwa mkati mwa mundujo kuti yili mpela “kupagwasoni.”^[2] (Yoh. 3:3, 5.) Jwalakwe ŵasasilesoni kuti, “Mkasimonga ligongo namsalile kuti, Ŵandumwe mkusosekwa kupagwasoni. Mbungo jikusapujila kwajikusaka, soni mkusapikana kukokoma kwakwe, nambo ngamkusamanyilila kwajikutyocela soni kwajikwawula. Yili m’yoyosoni ni jwalijose jwapagwile mwa msimu.” (Yoh. 3:7, 8) Kusala yisyene, yili yakusawusya kumlondecesya cenenepe mundu jwangasagulwa mwayikusaŵela yindu ni mundu jwamsagulwe.

¹² Ŵandu ŵaŵasagwilwe komboleka kuliwusyaga kuti, ‘Ligongo cici Yehofa ŵasagwile uneji ngaŵaga mundu jwine?’ Mpaka atandesoni kulikayicila naga ali jwakuŵajilwa pa ukumu welewu. Nambope jemanjaji ngakusakayicila kuti Yehofa ŵaŵilasile. Akusasangalala ni mtukawu soni akusawuyamicila. Akusapikana mumtima mpela muŵatendele Petulo juŵatite, “Acimbicikwe Mlungu jwalisoni Atati ŵa Ambuje ŵetu Yesu Klistu, pakuŵa mwacanasa cakwe cekulungwa, ŵatuŵelece mwasambano kuti tuŵe ni cembeceyo ca umi mwa kwimuka kwa Yesu Klistu. Ŵatuŵelece kuti tukole cipanje cangajonasika, cangasakasigwa soni cangasuluka. Cipanje celeci ŵasunjile jemanja kwinani.” (1 Pet. 1:3, 4) Aklistu ŵasagulwe pakuŵalanga maloŵe gelega akusamanyilila kuti atati ŵawo ŵakwinani akuŵeceta kwa jwalijose jwa jemanjajo.

13. Ana mundu akusacenga wuli kaganisye kakwe pasagwilwe ni msimu weswela, soni ana cici cacikusatendekasya yeleyi?

¹³ Aklistu ŵasagulwe mkanaŵe kuŵilanjigwa ni msimu wa Mlungu, ŵasangalalaga ni cembeceyo cakutama kwangamala pacilambo capasi. Jemanjaji ŵajembeceyaga ndaŵi jele Yehofa cacilinganya cilambo capasici kuti ciŵe paladaiso soni kutyosya yakusakala yosope. Kombolekasoni kuti ŵaliwanicisyaga ali mkwapocela ŵakunonyelwa ŵawo pacacijimukaga kuŵawe. Ŵajembeceyagasoni kuti cacitaŵa nyumba ni kutamagamo soni kulya yisogosi ya m’yitela yaŵapandile. (Yes. 65:21-23) Nambo, ana kaganisye kawo kacenjile ligongo cici? Ana ligongo lyakuti nganajikutilaga ni cembeceyo cakutama pacilambo capasi? Kapena ligongo lyakuti ŵasimene ni yipwetesi pacilambo capasi? Ana ŵaganisisye kuti kutama pacilambo capasi kwangamala kuciŵa kwangasangalasya? Kapena ana ŵasacililaga kuti akalole mwaukusaŵela umi wa kwinani? Iyayi. M’malomwakwe Mlungu ni juŵasagulile yeleyi. Jwalakwe paŵaŵilasile jemanjaji, ŵakamulicisye masengo msimu wakwe weswela pakwatendekasya kuti acenje kaganisye kawo soni mbote jakwembeceya.

14. Ana Aklistu ŵasagulwe akusasacilila cici?

¹⁴ Sambano, ana mpaka tujile kuti Aklistu ŵasagulwe akusasacilila kuwa? Paulo ŵajanjile ciwusyoci paŵatite, “M’we ŵatuli m’cisakasa acino tukuwuwula ligongo lya kusitopelwa. Mnopenope ngaŵaga ligongo lyakuti tukusaka kuwula cisakasaci, nambo kuti tuwale nyumba jinejo kuti umi ujinjile mmalo mwa cakomboleka kuwaci.” (2 Akoli. 5:4) Jemanjaji ngakusasacilila kuti awe mwacitema. Mmalomwakwe, akusasacilila kumtumicila Yehofa lisiku lililyose pampepe ni acimjawo soni ŵacinasi ŵawo. Nambope, mwangasamala kandu kuti akutenda yatuli, jemanjaji akusakumbucila ya cembeceyo cawo camsogolo.—1 Akoli. 15:53; 2 Pet. 1:4; 1 Yoh. 3:2, 3; Ciu. 20:6.

ANA WAWOJO ASAGWILWE?

15. Ana cici cangacikusalosya kuti mundu asagwilwe ni msimu weswela?

¹⁵ Ana akusalipikana kuti Yehofa ŵasagwile wawojo kuti cajawule kwinani? Naga akusalipikana m’yoyo, akusosekwa kuganicisya yiwusyo yakusosekwa mnope ayi: Ana akusaliwona kuti akusatenda mtawu mnope mu undumetume? Ana akusalijiganya Maloŵe ga Mlungu mwamtawu soni akusanonyela kuwungunya “yindu yakusokoka ya Mlungu”? (1 Akoli. 2:10) Ana akuyiwona kuti Yehofa ŵapele majali gapajika mu undumetume wawo? Ana akusasacilila mnope kutenda lisosa lya Yehofa? Ana akusasacilila mnope kwakamucisya ŵane mwausimu? Ana agaweni maumboni gakulosya kuti Yehofa ŵakamucisye paumi wawo? Naga akwanga yiwusyo yosopeyi mwakusimicisya kuti elo, ana yikugopolela kuti sambano asagwilwe kuti cajawule kwinani? Iyayi. Ligongo cici? Ligongo lyakuti ŵakutumicila ŵa Yehofa wosope cinga ŵasagulwe kapena iyayi, mpaka alipikaneje m’yiyi. Pakamulicisya masengo msimu weswela, Yehofa mpaka apelece macili mwakulandana kwa jwakutumicila jwakwe jwalijose mwangajigalila ya mbote jacacipocela. Sonitu, naga akukayicila kuti mwine ŵasagwilwe kuti cajawule kwinani, yeleyi pajika yikulosya kuti nganasagulwa. Ŵandu ŵaŵasagwilwe ni Yehofa ngakusakayicila cilicose, nambo akusamanyilila kuti ali ŵasagulwe yisyene.

16. Ana tukumanyilila catuli kuti ngaŵa ŵandu wosope ŵaŵapocele msimu wa Mlungu cacijawula kwinani?

¹⁶ M’Baibulo mwana yisyasyo yejinji ya ŵandu ŵakulupicika ŵaŵapocele msimu wa Yehofa. Nambo ŵanduŵa nganakola cembeceyo cakwawula kwinani. Jumo mwa ŵanduŵa ali Yohane M’batisi. Yesu ŵamlumbile mnope Yohane, nambo kaneko ŵasasile kuti jwalakwe ngasajawula kukulamulila mu Ucimwene wakwinani. (Mat. 11:10, 11) Daudi nombe najo ŵalongolelegwaga ni msimu weswela. (1 Sam. 16:13) Msimu weswelawu wamkamucisyaga jwalakwe kupikanicisya yindu yakusokoka yakwamba Yehofa soni wamlongolele kuti alembe mbali sine sya Baibulo. (Maliko 12:36) Nambope, palisiku lya Pentekosite, Petulo ŵasasile ya Daudi kuti ‘nganajawula kwinani.’ (Mase. 2:34) Msimu weswela wakamucisye jemanjaji kutenda yindu yekulungwa, nambo nganiŵasagula kuti cajawule kwinani. Ana yeleyi yikugopolela kuti jemanjaji ŵaliji ŵapelembele panepakwe? Iyayi. Nambo yikulosya kuti Yehofa cacajimusya jemanjaji kuti catame ni umi pacilambo capasi kwangamala.—Yoh. 5:28, 29; Mase. 24:15.

17, 18. (a) Ana ŵakutumicila ŵa Yehofa ŵajinji lelojino akwete cembeceyo catuli? (b) Ana tucitagulilana yiwusyo yapi mu ngani jakuyicisya?

¹⁷ Ŵakutumicila ŵa Yehofa ŵajinji lelojino nganakola cembeceyo cakwawula kwinani. Jemanjaji akwete cembeceyo cakutama pacilambo capasi mpela muyaŵelele ni Daudi, Yohane M’batisi, soni acalume ni acakongwe ŵane ŵakulupicika ŵakala. Mpela Abulahamu, jemanjaji akwembeceya kuti caŵe pasi pa ulamusi wa Ucimwene wa Mlungu. (Ahe. 11:10) Mu ndaŵi jambesi jino, pana Aklistu ŵasagulwe ŵamnono ŵali ciŵela pacilambo capasi pano. (Ciu. 12:17) Yeleyi yikulosya kuti ŵajinji mwa ŵandu 144,000 ŵawile ali ŵakulupicika soni ŵapite kala kwinani.

¹⁸ Sambano, ana ŵandu ŵakwembeceya kutama pacilambo capasi kwangamala akusosekwa kwawona mwatuli ŵandu ŵakusasala kuti akwete cembeceyo cakwawula kwinani? Naga mundu jwine mumpingo mwawo atandite kulya ni kumwa yiwanicisyo ya pa Cikumbucilo, ana akusosekwa kutenda cici? Ana tukusosekwa kulaga nganisyo ligongo lya kutupa kwa ciŵalanjilo ca ŵandu ŵakulya soni kumwa yiwanicisyo ya pa Cikumbucilo? Ngani jakuyicisya jicijanga yiwusyo yeleyi.