Wosopewe Tukusasosekwa Jwakututondoya

Ana akukumbucila paŵagwile pandaŵi jiŵaliji mwanace? Komboleka kuti ŵawulele mkono kapena ŵakowece lilungo. Ana akukumbucila yiŵatesile mama ŵawo pakwatondoya? Komboleka kuti ŵasamalile piŵawulelepo kaneko kwataŵa kaguwo. Wawojo ŵalisile, nambo ligongo lya maloŵe gakutamika mtima pasi soni kwakumbatila mwacinonyelo yatendekasisye kuti apikane cenene. Paŵaliji mwanace nganikuŵa kwakusawusya kwatondoya pasimene ni yakusawusya.

Nambo umi ukusaŵaga wakusawusya pandaŵi jatukukula. Yakusawusya yikusaŵa yejinji mwati akusasoŵa jwakututondoya. Nambope, yakusatenda mama kwa mwanace pasimene ni cakusawusya nganiyiŵa yikamwile masengo kwa jwamkulungwa. Kwende tulole yisyasyo.

• Ana pakwete palasile mnope nganisyo ligongo lyakwatyosya pamasengo? Julian paŵamtyosisye masengo jwasokonecele mnope nganisyo. Jwalakwe jwadandawile kuti, ‘Ana liŵasa lyangu cinalisamalileje catuli? Ngamwile masengo mwakulimbicila kwa yaka yejinji, sano ligongo cici kampani jikumbona mpela jwangasosekwa?’

• Komboleka kuti asokonecele nganisyo ligongo lyakumala kwa ulombela. Raquel ŵatite, “Ŵamkwangu piŵandesile miyesi 18 jipitejo, yambwetece mnope. Nasoŵile pakamula. Nasokonecele nganisyo mnope soni wangamwile woga.”

• Mwine akwete ulwele wekulungwa mwati akulepela kupola. Komboleka kuti ndaŵi sine akusalipikana mpela muŵapikanile Yobu juŵadandawile kuti, “Mbesile ni umi wangu, ngangusaka kwendelecela kuŵa cijumi.” (Yobu 7:16) Kombolekasoni kuti akupikana mpela mwakusapikanila Luis, jwamlume jwine jwa yaka ya m’ma 80. Jwalakwe ŵatite, “Ndaŵi sine ngusalipikana mpela kuti ngwamba kwembeceya kuwa basi.”

• Kapena mwine ligongo lya ciwa ca jwakunonyelwa jwawo mpaka catendekasye kusaka kuti jwine ŵatondoye. Robert ŵatite, “Mwanangu piŵawile pangosi ja ndege, pandanda nganingulupilila kuti yeleyo yitendekwe. Kaneko yambwetece mnope mumtima mpela kuti upanga wawulewu unjopile.”—Luka 2:35.

Robert, Luis, Raquel, soni Julian ŵapatile jwakwatondoya paŵasimene ni yakusawusya. Jwakwatondoya jwakwe ngaŵasoni jwine, nambo Mlungu Jwamaciligose. Ana jwalakwe akusiŵatondoya catuli ŵandu? Ana cacatondoyasoni wawojo?