NGANI JA PANDANDA | YAJIKUSASALA BAIBULO PAKWAMBA YA MALAYIKA
Mwagakusatendela Malayika Pakwakamucisya Ŵandu
Malayika gakulupicika gakusakola lung’wanu ni yakusatenda ŵandu, soni gakusamtumicila Mlungu mwamtawu pakwanilisya lisosa lyakwe. Mlungu paŵapanganyaga cilambo capasi, malayika “gagumisile yimpepe mwakusangalala, soni ŵanace wosope ŵa Mlungu ŵatandite kumlumba mwagumila.” (Yobu 38:4, 7) Kutandila kalakala, malayika gaŵele gali mkusacilila “kumanyilila” yakulocesya yakwamba yindu yayicitendekwa pacilambo capasi.—1 Petulo 1:11, 12.
Baibulo jikusalosya kuti ndaŵi sine malayika gacenjelaga ŵakulambila ŵasyesyene pakwanilisya lisosa lya Mlungu. (Salimo 34:7) Mwambone:
Yehofa paŵajonangaga misinda jiŵili jakusakala, Sodomu ni Gomola, malayika gamkamucisye mundu jwakulupicika Loti ni liŵasa lyakwe kutila.—Genesis 19:1, 15-26.
Kalakala anyamata ŵatatu ŵa Cihebeli ŵaŵaliji ku Babulo ali ŵaponyisye m’cilangali ca moto, Mlungu ‘ŵatumisye lilayika lyakwe kuti likakulupusye ŵakutumicila ŵakweŵa.’—Danieli 3:19-28.
Mundu jwakulungama Daniyele paŵamponyisye mu lisimbo lya masimba, jwalakwe jwasasile kuti jwakulupwice ligongo lyakuti “Mlungu ŵatumisye lilayika lyakwe ni kuwugala pakamwa pa masimba.”—Danieli 6:16, 22.
Kutandila kalakala malayika gaŵele mkwakamucisya ŵandu ŵakulupicika
MALAYIKA GAKAMUCISYAGA MPINGO WANDANDA WACIKLISTU
Ndaŵi sine, malayika gakamucisyaga yindu yayatendekwaga mumpingo wandanda Waciklistu naga pakusosekwa kuti lisosa lya Yehofa litendekwe. Mwambone:
Lilayika lyawugwile matanga ga ndende soni kwasalila ŵandumetume ŵaŵaliji mu ndendemo kuti akajendelecele kulalicila ku nyumba jakulambilila.—Masengo 5:17-21.
Lilayika lyamsalile jwakulalicila Filipo kuti ajawule ku msewu wa kucipululu, wakutyocela ku Yelusalemu kwawula ku Gasa, kuti akamlalicile mundu jwa ku Itiyopiya jwaŵayice ku Yelusalemu kukulambila.—Masengo 8:26-33.
Pajakwanile ndaŵi jakuti ŵandu ŵanganaŵa Ayuda ajinjile mumpingo Waciklistu, lilayika lyam’wonecele m’mesomkulola jwamkulungwa jwa asilikali jwa Loma lina lyakwe Koneliyo ni kumsalila kuti akam’ŵilanje ndumetume Petulo kuti ayice ku nyumba jakwe.—Masengo 10:3-5.
Ndumetume Petulo paŵaliji mu ndende, lilayika lyam’wonecele ni kumlongolela kutyoka mu ndendemo.—Masengo 12:1-11.
ANA MALAYIKA MPAKA GAKAMUCISYE CAMTULI?
Lelo jino, pangali umboni wakulosya kuti Mlungu akusakamulicisya masengo malayika pakwakulupusya ŵandu m’matala gakulekanganalekangana mpela mwayaŵelele kalakala. Nambope, pakwamba ya ndaŵi jetu jino, Yesu jwatite, “Utenga awu wambone wakwamba ya Ucimwene tiwucilalicikwa pacilambo cosope capasi, kuti uŵe umboni kwa ŵandu ŵa mitundu josope, kaneko mbesi jiciyika.” (Matayo 24:14) Ana akumanyilila kuti ŵakulijiganya ŵa Yesu akusakamula masengoga mwakulongoleledwa ni malayika?
Malayika gakusakamucisya pamasengo gakulalicila ngani syambone pacilambo cosope
Buku ja Ciunukuko jikusalosya kuti malayika gakusakamucisya ŵandu mwamtawu pacilambo cosope, kulijiganya yakwamba Yehofa soni cakulinga cakwe kwa ŵandu. Ndumetume Yohane jwalembile kuti, “Naliweni lilayika line lili mkuguluka mwinani. Lilayikalyo lyakwete ngani syambone syangamala syakuti silalicikwe kwa ŵandu ŵa pacilambo capasi, kwa ŵandu ŵamtundu wuliwose, lukosyo lulilose, soni ciŵeceto cilicose. Jwalakwe jwaŵecetaga mwakwesya maloŵe kuti, ‘Mumjogope Mlungu ni kumpa ucimbicimbi, ligongo ndaŵi jakuti alamule cilambo jikwanile. M’yoyo, mumlambile Jwele juŵapanganyisye kwinani, cilambo capasi soni nduluko sya mesi.’” (Ciunukuko 14:6, 7) Yindu yejinji yayikutendekwa masiku gano, yikusalosya kuti malayika gakukamucisya pamasengo ga pacilambo cosope gakulalicila ya Ucimwene. Nambosoni jwakulemwa papitikwice ni kuwujila kwa Yehofa, ‘malayika ga Mlungu gakusasangalala kwamnope.’—Luka 15:10.
Ana cici cacicitendekwa masengo gakulalicila gali gatendekwe mwakwanila? Kaneko, “likuga lya ngondo lyakwinani” lya malayika, licimkamucisya Yesu Klistu, Mwenye jwa mayimwene, pakuputa “ngondo ja lisiku lyekulungwa lya Mlungu Jwamaciligose” pa Alamagedo. (Ciunukuko 16:14-16; 19:14-16) Mlungu cacikamulicisya masengo malayika gakwe gamacili pakulamula cilamboci. Pandaŵiji, Ambuje Yesu ‘caciwucisya mwakupeleka cilango kwa ŵandu . . . ŵangapikanila ngani syambone syakwamba Ambuje ŵetu Yesu.’—2 Atesalonika 1:7, 8.
Akakayicilaga yakuti malayika gakusakola lung’wanu ni wawojo pajika. Malayika gakusigaganicisya mnope ŵandu ŵakusasacilila kumtumicila Mlungu, soni ndaŵi syejinji Yehofa, ŵakamulicisyaga masengo malayika gakwe kuti galimbikasye ŵakutumicila ŵakwe ŵakulupicika pacilambo capasi.—Ahebeli 1:14.
Jwalijose jwetuwe akusosekwa kutenda cisagula cakusosekwa mnope. Ana cacipikanila ngani syambone sasikulalicidwa pacilambo cosope capasi? Ŵamboni sya Yehofa kumangwawoko cacisangalala kwakamucisya wawojo kuti apindule ni cikamucisyo cacinonyelo cakusapeleka Mlungu lelo jino kupitila mwa malayika gakwe gamacili.