Ana Mlungu Akwete Chanasa?

YATUKULIJIGANYA KUTYOCHELA KU YAKUPANGANYIKWA

Kumtendela mundu jwine chanasa kukusagopolela “kupikana mpela mwakupikanila mjetu mumtima, kapena kuliwanichisya mwampaka tupikanile m’weji tuli tusimene ni yakusawusya yakusimana nayo mjetu.” Dokotala jwine jwa ulwele wanganisyo lina lyakwe Rick Hanson jwasasile kuti “wosopewe mwachipago, tukusasaka kwatendela ŵane chanasa.”

AGANICHISYE AYI: Mwakulekangana ni yinyama, ŵanduwe tukusakombola kwatendela ŵane chanasa. Ana ligongo chichi yili myoyo? Baibulo jikusasala kuti Mlungu ŵatupanganyisye m’chiwanichisyo chakwe. (Genesesi 1:26) Ni ligongo lyakwe tukusakombola kumsyasya jwalakwe soni kulosya ndamo syakwe syambone. Kwatendela ŵane chanasa kukusatutendekasya kuti twakamuchisyeje. Yeleyi yikusalosya mwaŵelele Mkupanganya jwetu jwachanasa, Yehofa Mlungu.—Misyungu 14:31.

YAJIKUSATUJIGANYA BAIBULO PAKWAMBA YAKUSATI YEHOFA PAKUTUTENDELA CHANASA

Mlungu akusatutendela chanasa m’weji mwamti yikusampweteka pakutuwona tuli mkulagasika. Pakwamba ya Ayisalayeli ŵaŵapilile ukapolo ku Iguputo soni yakusawusya yaŵasimene nayo m’chipululu kwa yaka 40, Baibulo jikusati, “Pa yipwetesi yawo yosope yaŵalagasikaga nayo, Mlungu nombe najo jwalagasikaga.” (Yesaya 63:9) Ngaŵa kuti Mlungu ŵagambagape kumanyilila yakusawusya yawo, nambo yampwetekagasoni mumtima. Jwalakwe jwatite, “Ngumanyilila yipwetesi yakulaga nayo.” (Ekisodo 3:7) Mlungu akusasalasoni kuti, “Jwalijose jwakumkwaya jemanja, nikuti akukwaya mwanache jwa m’liso lyangu.” (Sakaliya 2:8) Yeleyi yikugopolela kuti patukulagasika Mlungu yikusampweteka mumtima.

Atamose kuti tukusalijimbaga magambo soni kuliwona kuti tuli ŵangaŵajilwa chanasa cha Mlungu, nambo Baibulo jikusatusimichisya kuti, “Mlungu ali jwamkulungwa kujipunda mitima jetu soni akusamanyilila yindu yosope.” (1 Yohane 3:19, 20) Mlungu akusatumanyilila chenene kupunda mwatukusalimanyilila achimsyewe. Jwalakwe akusamanyilila mwayiŵelele yindu paumi wetu, nganisyo syetu, soni mwatukupikanila mumtima. Jwalakwe akusatutendela chanasa.

Malemba gakusatusimichisya kuti:

• Jemanja chimchiŵilanga soni Yehofa chachijanga, chimchilila pamkusaka chikamuchisyo ni jwalakwe chachijanga kuti, “une ndili apano.’”​—YESAYA 58:9.

• “‘Yehofa akusala kuti, ‘Une ngumanyilila chenene yangwaganichisya jemanja. Nguganisya yakwapa mtendele kuti akole sogolo jambone soni chembecheyo, ngaŵaga yisawusyo.’ Nambosoni chachimbilanga ni kwisa kukupopela kwa une, soni une chinjapikanila.’”​—YELEMIYA 29:11, 12.

• “Asunje misosi jangu mumsaku wawo walipende. Ana misosi jangu nganijiŵa m’buku jawo?”​—SALIMO 56:8.

MLUNGU AKUSATUMANYILILA, KUTUPIKANICHISYA SONI YIKUSAMKWAYA

Kumanyilila kuti Mlungu akusatutendela chanasa kukusatutendekasya kuŵa ŵakulimba patusimene ni yakusawusya. Aganichisye yayamtendechele Maria:

Jwalakwe jwatite, “Mnyamata jwangu jwa yaka 18 pajwalwasile ulwele wa kansa kwa yaka yiŵili ni kuwa, nayiweni kuti umi wangali mate basi soni namtumbilile Yehofa ligongo lyangamposya mwanangu.

“Pali pamasile yaka 6, mjangu jwachinonyelo soni jwachanasa jwa mumpingo mwetu jwambikanilaga panasalaga munapikanilaga mumtima kuti Yehofa ngakusanonyela. Ŵambikanile kwandaŵi jelewu mwangangata maloŵe, kaneko jwakolasile lilemba lyalyangamuchisye lya 1 Yohane 3:19, 20, lyalikusati, ‘Mlungu ali jwamkulungwa kujipunda mitima jetu soni akusamanyilila yindu yosope.’ Jwalakwe jwasasile kuti Yehofa akusapikanichisyaga yakusawusya yatukusimana nayo.

“Atamose kuti ŵangamuchisye, nambope nganindeka kumtumbilila Yehofa. Ni kaneko naŵalasile lilemba lya Salimo 94:19 lyalikusati, “Panalagaga mnope nganisyo, ŵangamuchisye soni ŵandamiche mtima pasi.” Panamalisisye kuŵalanga nalipikene mpela kuti lilembali ŵanembele une. Pambesi pakwe, mtima wangu watemi pasi mwamti namsalile Yehofa yakusawusya yanasimanaga nayo pakumanyilila kuti akusatupikanichisya.”

Yili yakulimbikasya kumanyilila kuti Mlungu akusatupikanichisya soni yikusamkwaya patukusimana ni yakusawusya. Nambo ana ligongo chichi tukusimana ni yipwetesi yejinji? Ana ligongo lyakuti Mlungu akutupa chilango pa yakulemwa yetu? Ana Mlungu chatendepo kandu kuti amasye yipwetesi yosopeyi? Yiwusyo yeleyi yichijanjidwa mungani syakuyichisya.