Yehofa Akusiŵanonyela Ŵandu ‘Ŵakusasogola Yisogosi Mwakupilila’

1, 2. (a) Ana yisyasyo ya abale ni alongo ŵakusalalicila m’mikuli jele ŵandu ŵajinji ŵangali lung’wanu mpaka yitulimbikasye camtuli? (Alole ciwulili cacili penanipa.) (b) Ana Yesu jwasasile yamtuli pangani jakulalicila “kumangwakwe”? (Alole maloŵe gamwiŵanda.)

SERGIO NI OLINDA ali apayiniya ŵakwete yaka ya m’ma 80. Liŵasali likusatama ku United States. Jemanjaji akusalajilila kwenda ligongo lya ucekulu. Atamose yili m’yoyo, kwa masiku 6 cijuma cilicose, akusajigala kashelefu ka mabuku ni kwawula kutawuni kukulalicila. Ndaŵi syosope akusaja kwika 7 koloko kundaŵi. Apayiniyaŵa aŵele ali mkutenda yeleyi kwa yaka yejinji. Jemanjaji akusagaŵa mabuku kwa ŵandu ŵakusapita ciŵandika malo gakwelela basi. Ŵandu ŵajinji ŵangakola nawo lung’wanu, nambo liŵasali lyangatenguka ni yeleyi. Kundaŵi kulikose likusayikape, ni kwamwemwetelaga ŵandu ŵakupita. Musi, liŵasali likusawutanda ulendo wakumangwawo. Lisiku lyakuyicisya, pakwanaga 7 koloko kundaŵi, likusaŵasoni lili liyice kutawuni kula, mwamti likusatenda yeleyi caka cosope.

² Mwakulandana ni liŵasali, abale ni alongo ŵane ŵakulupicika aŵele ali mkulalicila m’mikuli ja mpingo wawo jele ŵandu ŵajinji ŵangasaka kupikanila ngani syambone. Naga wawojo akusalalicilasoni m’mikuli mpela jeleji, tukuyamicila kupilila kwawo.a Cisyasyo cawo cili cakulimbikasya kwa Aklistu ŵajinji, atamose kwa ŵandu ŵaŵatandite kalakala usyesyene. Jwakulolela mkuli jwine jwatite, “Panjinjile mu undumetume ni abale ni alongo ŵakulupicikaŵa, cikulupi cangu cikusalimba.” Jwine jwasasile kuti, “Kukulupicika kwa abale ni alongoŵa kukusangamucisya kuti ndendeje undumetume wangu mwakupilila soni mwakulimba mtima.” Jwinesoni jwatite, “Cisyasyo cawo cikusalimbikasya.”

3. Ana mungani ajino citupate kwanga kwa yiwusyo yitatu yapi, soni ligongo cici kwanga kwakwe kuli kwakamucisya?

³ Mungani ajino citupate kwanga kwa yiwusyo ayi, Ligongo cici ndaŵi sine mpaka tutenguceje? Ana tukusasogola wuli yisogosi? Ana cici campaka citukamucisye kwendelecela kusogola yisogosi mwakupilila? Kwanga kwa yiwusyoyi cikutulimbikasye kutenda yiliyose yampaka tukombole kuti tujendelecele kutenda masengo gakulalicila gaŵatupele Yesu.

LIGONGO CICI NDAŴI SINE MPAKA TUTENGUCEJE?

4. (a) Ana Paulo ŵapikene wuli mumtima ni yaŵatesile Ayuda? (b) Ligongo cici Paulo ŵapikene m’yiyi?

⁴ Naga wawojo akusalalicila mumkuli wele ŵandu ŵajinji ŵangali lung’wanu, nganaŵa jika. Kwa yaka yakupunda 30, ndumetume Paulo jwakamucisye ŵandu ŵajinji kuŵa ŵakumkuya Yesu. (Mase. 14:21; 2 Akoli. 3:2, 3) Nambope, nganakombola kwacenga Ayuda ŵajinji kuti aŵe Aklistu. Ŵajinji ŵamkanile, soni mpaka ŵane ŵamlagasisye. (Mase. 14:19; 17:1, 4, 5, 13) Ana Paulo ŵapikene wuli mumtima ni yaŵatesile Ayudayi? Jwalakwe jwatite, “Nguŵeceta yakuwona mwa Klistu, . . . ngwete canasa cekulungwa soni mtima wangu ukumbweteka ndaŵi syosope.” (Alo. 9:1-3) Ligongo cici Paulo ŵapikene m’yiyi? Ligongo lyakuti ŵakunonyelaga mnope kulalicila. Jwalakwe ŵalalicilaga Ayuda ligongo lyakwanonyela. Ni ligongo lyakwe yampwetece mumtima kwawona ali mkukana canasa ca Mlungu.

5. (a) Ana cici cacikusatulimbikasya kwalalicila ŵane? (b) Ligongo cici yili yangasimonjesya kuti ndaŵi sine tukusatenguka?

⁵ Mwakulandana ni Paulo, m’wejisoni tukusiŵalalicila ŵandu ligongo lyakwanonyela. (Mat. 22:39; 1 Akoli. 11:1) Tukusatenda yeleyi ligongo lyakumanyilila kuti wosope ŵasagwile kutanda kumtumicila Yehofa akusapata majali gejinji. Patukwawona ŵandu ŵa mumkuli wetu, ndaŵi syejinji tukusaganisyaga kuti, ‘Ŵanduŵa gakwapelela majali gakwika ligongo lyakutumicila Yehofa. Ngusosekwatu kwakamucisya kumanyilila yeleyi!’ Paligongo lyeleli, tukusajendelecela kwalimbikasya kuti alijiganyeje usyesyene wakwamba ya Yehofa nambosoni lisosa lyakwe kwa ŵandu. Patupite kukwalalicila ŵandu, tukusaŵa mpela tukwasalila kuti, ‘Tuyice kukwapa mtuka wambone. Conde apocele.’ Ni ligongo lyakwe yili yangasimonjesya kuti ‘mtima wetu ukusatupweteka’ naga ŵanduwo akukana kupocela mtukawu. Tukusapikana m’yiyi ngaŵa ligongo lyakusoŵa cikulupi, nambo ligongo lyakuti tukusanonyela mnope ŵandu. M’yoyo, tukusapililape atamose tusimane ni yakutengusya. Ŵajinjiwe mpaka tukamulane ni maloŵe ga mpayiniya jwine jwa yaka 25 lina lyakwe Elena juŵatite, “Masengo gakulalicila gali gakusawusya. Nambope, gali gambone mnope kupunda galigose.”

ANA TUKUSASOGOLA WULI YISOGOSI?

6. Ana citupate kwanga kwa ciwusyo capi, soni ana citukupate camtuli?

⁶ Ligongo cici mpaka tuŵe ŵakusimicisya kuti mwangajigalila kwatukulalicila, Yehofa mpaka asangalaleje ni undumetume wetu? Kuti tupate kwanga kwa ciwusyoci, kwende tulole yitagu yiŵili ya Yesu. M’yitagu yosopeyi, Yesu jwagombelecesye kusosekwa kwa ‘kusogola yisogosi.’ (Mat. 13:23) Citagu candanda cili cakwamba ya citela ca mpeleya.

7. (a) Ana “namalima,” “citela ca mpeleya,” soni “nyambi” yikwimila ŵani? (b) Ana tukusosekwa kupata kwanga kwa ciwusyo capi?

⁷ Aŵalanje Yohane 15:1-5, 8. Pa lilembali, Yesu ŵasalile ŵandumetume ŵakwe kuti, “Atati ŵangu akusacimbicikwa naga jemanja akwendelecela kusogola yisogosi yejinji soni kulosya kuti ali ŵakulijiganya ŵangu.” Yesu jwasasile kuti Yehofa ali “namalima,” Yesu msyenejo ali “citela ca mpeleya cisyesyene,” nambosoni ŵakumkuya ŵakwe ali “nyambi.”b Sano, ana yisogosi yakusosekwa kusogola ŵakumkuya ŵa Klistu yili cici? Mu citagu celeci, Yesu nganasala kuti cisogosi cakwe cili cici, nambo ŵagambile kusala yindu yine yampaka yitukamucisye kumanyilila kwanga kwa ciwusyoci.

8. (a) Mu citaguci, ligongo cici yisogosi ngayikwimila ŵakulijiganya ŵasambano? (b) Ana Yehofa akusatusalila kutenda cici?

⁸ Pakwamba ya Atatigwe, Yesu jwatite, “Jwalakwe akusakata nyambi jilijose mwa une jangasogola yisogosi.” Yeleyi yikugopolela kuti Yehofa akusatuwona kuti tuli ŵakutumicila ŵakwe naga tukusogola yisogosi. (Mat. 13:23; 21:43) Nambo mwakamulana ni citaguci, cisogosi cakusosekwa kusogola Mklistu jwalijose ngacikugopolela ŵakulijiganya ŵasambano ŵampaka tupanganye. (Mat. 28:19) Yikaŵe kuti yikugopolela yeleyo, nikuti Ŵamboni ŵakulepela kupanganya ŵakulijiganya ligongo lyakulalicila mumkuli wangali ŵandu ŵalung’wanu, akaŵele nyambi syangasogola sya m’citagu ca Yesu cila. Nambo yeleyi ngaŵa yisyene! Ligongo cici? Ligongo m’weji ngatukusitwakanganicisya ŵandu kuti aŵe ŵakulijiganya ŵa Yesu. Nambosoni yikaŵe kuti yeleyi yili yisyene, nikuti Yehofa akaliji jwangalwe pakwawona ŵandu kuŵa ŵangaŵajilwa ligongo lyakulepela kutenda yindu yanganaŵa ayikombwele. Nambo Yehofa akusatusalila kuti tutendeje yindu yampaka tuyikombole.—Deut. 30:11-14.

9. (a) Ana kusogola yisogosi kuli kutenda masengo gapi? (b) Ana sano citulijiganye citagu capi, soni ligongo cici?

⁹ Ana sano cisogosi catukusosekwa kusogola ni cici? Cisogosi cakwe cikwimila masengo gampaka jwalijose akombole kugatenda. Ana ni masengo gapi gagakugopolela “kusogola yisogosi”? Gali gakulalicila ngani syambone syakwamba ya Ucimwene wa Mlungu.c (Mat. 24:14) Citagu ca Yesu ca jwakumisa mbeju cikusimicisya yeleyi. Wuli sano tulole citagu caŵilici.

10. (a) Mu citagu ca jwakumisa mbeju, ana mbeju ni litaka yikwimila cici? (b) Ana lisace lya tiligu likusakoposya cici?

¹⁰ Aŵalanje Luka 8:5-8, 11-15. Mu citaguci, mbeju sili “maloŵe ga Mlungu,” kapena kuti utenga wa Ucimwene. Litaka likwimila mtima wa mundu wakuwanicisya. Mbeju syasyagwilile pa litaka lyambone, syamesile, ni kukula mpaka kutenda masace, mwine tugambe kujila kuti masace ga tiligu. Kaneko, “syasogwele yisogosi kuwilisya maulendo 100.” Nambo ana lisace lya tiligu likusakoposya cici? Ana likusakoposya masace gane gamwanamwana? Iyayi, likusakoposya mbeju syasambano, syele mkusipandamo mpaka sitendesoni masace. Mu citaguci, lusongolo lumo lwa mbeju ja tiligu lukusogola songolo syakwana 100. Ana yeleyi yikukamulana camtuli ni undumetume wetu?

11. (a) Ana citagu ca mundu jwakumisa mbeju cikukamulana camtuli ni undumetume wetu? (b) Ana tukusasogola wuli mbeju jasambano ja Ucimwene?

¹¹ Kuti tucipikanicisye cenene citaguci, kwende tuwanicisye m’yi. Tujile kuti yaka yipiteyo Ŵamboni ŵane kapena acinangolo ŵetu Ŵamboni ŵatulalicile ya Ucimwene wa Mlungu. Jemanjaji ŵasangalele paŵayiweni kuti tujiticisye utenga wa Ucimwene wawuli mpela mbeju. Mu citagu ca Yesu cila, mbeju jine jatamilicice pa litaka lyambone. M’yoyosoni m’weji patwajiticisye utenga wa Ucimwene, watamilicice mumtima mwetu. Yakuyicisya yakwe, mbeju ja Ucimwene jila jamesile ni kukula, ni kuŵa mpela masace ga tiligu, mpaka kuŵa jakoseka kusogola yisogosi. Mpela mwayiŵelele kuti masace ga tiligu gangakoposya masace gajakwe mpela yisogosi, nambo gakusakoposya mbeju jasambano, m’yoyosoni yatukusakoposya m’weji mpela cisogosi yili mbeju jasambano ja Ucimwene, ngaŵaga jwakulijiganya jwasambano.d Ana tukusasogola wuli mbeju jasambano ja Ucimwene? Pandaŵi jilijose jatumsalile mundu ya Ucimwene wa Mlungu, m’litala lililyose, tukusaŵa tuli mkuwandisya mbeju jajapandidwe mumtima mwetu. (Luk. 6:45; 8:1) Paligongo lyeleli, citaguci cikutujiganya kuti patukwendelecela kuwandisya ngani sya Ucimwene wa Mlungu, tukusaŵa tuli ‘mkusogola yisogosi mwakupilila.’

12. (a) Ana tukulijiganya cici pa citagu ca Yesu ca citela ca mpeleya ni citagu ca mundu jwakumisa mbeju? (b) Ana lijiganyo lyeleli likwakamucisya camtuli wawojo?

¹² Ana tukulijiganya cici pa citagu ca Yesu ca citela ca mpeleya ni citagu ca mundu jwakumisa mbeju? Yitaguyi yikutukamucisya kumanyilila kuti kusogola yisogosi ngakukugopolela kuti ŵandu alosyeje lung’wanu patukwalalicila mumkuli mwetu. M’malo mwakwe, kukwegamila pa kulimbicila kwetu kulalicila. Paulo jwaŵecetesoni yakulandana ni yeleyi. Jwatite, “Mundu jwalijose cacipocela mbote jakwe mwakamulana ni masengo gakwe.” (1 Akoli. 3:8) Mundu akupocela mbote jakwe mwakamulana ni masengo gakwe, ngaŵaga mwakamulana ni yakuyicisya ya masengogo. Mlongo jwine jwaŵele ali mkutenda upayiniya kwa yaka 20, jwatite, “Ngusasangalala kumanyilila kuti Yehofa akusatupa mbote ligongo lyakulimbicila kwetu masengo gakulalicila.”

ANA TUKUSASOGOLA MWAMTULI YISOGOSI MWAKUPILILA?

13, 14. Mwakamulana ni Aloma 10:1, 2, ana Paulo nganaleka kwalalicila Ayuda ŵaŵakanaga utenga wa Ucimwene pa magongo gapi?

¹³ Ana cici campaka citukamucisye kwendelecela kusogola yisogosi mwakupilila? Tulijiganyisye kala kuti Paulo jwatengwice ligongo lyakuti Ayuda ŵakanaga utenga wa Ucimwene. Atamose yaliji m’yoyo, jwalakwe nganaleka kwalalicila. M’cikalata cakwe cakwawula kwa Aklistu ŵa ku Loma jwasasile muŵawonelaga Ayuda. Jwalakwe jwatite, “Cangusacilila mumtima mwangu soni cangucondelela kwa Mlungu cili cakuti Ayisalayeli akulupuce. Pakuŵa ngwatendela umboni kuti ali ŵakulipeleka kwa Mlungu, nambo ngakummanyilila cenene.” (Alo. 10:1, 2) Pelepatu Paulo jwasasile magongo gagamtendekasyaga kwendelecela kulalicila.

¹⁴ Ligongo lyandanda, Paulo jwajendelecele kwalalicila Ayuda ligongo lyakuti jwaliji ‘jwakusacilila mumtima mwakwe’ kuti Ayuda akulupuce. Ligongo lyaŵili, Paulo ‘jwacondelelaga kwa Mlungu’ kuti ŵakamucisye Ayuda kupocela utenga wa Ucimwene. Paligongo lyatatu, Paulo jwasasile kuti jemanjajo “ali ŵakulipeleka kwa Mlungu.” Jwalakwe ŵayiwonaga kuti ŵanduwo mpaka acenje ni kutanda kumtumicila Yehofa. Jwamanyililaga kuti Ayuda ŵakulipelekaŵa mpaka aŵe ŵakumkuya ŵa Yesu, mpela Paulojo.

15. Ana mpaka tujigalile wuli cisyasyo ca Paulo? Apelece yisyasyo.

¹⁵ Ana mpaka tujigalile wuli cisyasyo ca Paulo? Candanda, tulipeleceje pakwalalicila ŵandu ŵampaka aŵe “ŵakuŵajilwa umi wangamala.” Caŵili, tupopeleje kwa Yehofa kuti awugule mitima ja ŵandu ŵambone. (Mase. 13:48; 16:14) Silvana, jwaŵele ali mkutenda upayiniya kwa yaka ciŵandika 30, jwatite, “Mkanindande kulalicila pa nyumba ja mundu jilijose mumkuli wangu, ngusapopela kaje kwa Yehofa kuti angamucisye kola nganisyo syambone.” M’wejisoni tukusosekwa kupopela kwa Yehofa kuti malayika gatulongoleleje kwa ŵandu ŵakwete mitima jambone. (Mat. 10:11-13; Ciu. 14:6) Robert, jwaŵele ali mkutenda upayiniya kwa yaka yakupunda 30, jwatite, “Yili yakusangalasya kamula masengo ni malayika gagakusamanyilila yayikwatendecela ŵandu.” Catatu, tukoleje nganisyo syakuti ŵanduwo mpaka acenje ni kutanda kutumicila Yehofa. Carl, jwamkulungwa jwa mumpingo juŵabatiswe yaka yakupunda 50 yipiteyo, jwatite, “Pangulalicila, naga mundujo akumwemwetela, akulosya lung’wanu, kapenasoni akuwusya yiwusyo yambone, ngusamanyilila kuti akusacilila kupikanila ngani syambone.” Mwakulandana ni Paulo, m’wejisoni mpaka tupilile patukusogola yisogosi.

“MKONO WENU UKAPUMULA”

16, 17. (a) Ana tukulijiganya cici pa lilemba lya Mlaliki 11:6? (b) Apelece cisyasyo cakulosya kuti masengo getu gakulalicila gakusakwaya ŵandu ŵane.

¹⁶ Atamose yili mkuwoneka kuti ŵandu ŵajinji ngakusaka kupikanila ngani syambone, nambo ngatukusosekwa kuleka kupanda mbeju m’mitima ja ŵandu. (Aŵalanje Mlaliki 11:6.) Yili yisyene kuti ŵandu ŵajinji ŵangapikanila utenga wetu, nambo akusayiwona yatukusatenda. Akusatuwona kuti tukusawala mwakulicimbicisya, tukusaŵeceta cenene ni ŵandu, nambosoni tukusalosya ngope jagopoka. Mkupita kwa ndaŵi, ndamo syetu syambone mpaka syatendekasye ŵane kuti atyosye nganisyo syawo syakulemweceka. Yeleyi ni yaŵayiweni Sergio ni Olinda, ŵatwakolasile kundanda ŵala.

¹⁷ Sergio jwatite, “Pandaŵi jine, une ni ŵamkwangu twalwasile. Ligongo lya yeleyi, twalepelaga kuja kukulalicila pa ka shelefu pala. Nambo patwawujilesoni, ŵandu ŵatuwusyaga kuti, ‘Kusoŵaku, casawisye cici?’” Pakonjecesya, Olinda ali mkumwemwetela jwatite, “Ŵakwendesya mabasi paŵatuweni ŵasangalele, soni ŵane ŵaŵecetaga kuti, ‘Tukusangalala kuti atandilesoni kulalicila!’ Mpaka ŵanesoni ŵatuŵendaga magasini.” Mwangajembeceya, jwamlume jwine jwayice pa ka shelefupo ni kumpa maluŵa Sergio ni Olinda pakulosya kuyamicila masengo gawo.

18. Ligongo cici wawojo ali ŵakusacilila “kusogola yisogosi mwakupilila”?

¹⁸ Naga ‘mkono wetu ngawukupumula’ pakamula masengo gakumisa mbeju ja Ucimwene, nikuti tukukamula nawo masengo gakupeleka “umboni kwa ŵandu ŵa mitundu josope.” (Mat. 24:14) Kupunda yosope, tukusaŵaga ŵakusangalala ligongo lyakumanyilila kuti Yehofa akutujiticisya, pakuŵa akusiŵanonyela ŵandu ‘ŵakusasogola yisogosi mwakupilila.’