Ana Akumanyilila Yampaka Asagule?

M’yipatala yejinji pacilambo cosope, akusatenda opaleshoni jangakamulicisya masengo miyasi. Ana akumanyilila cenene yampaka asagule pakwamba ya cikamucisyo ca mtela cangakamulicisya masengo miyasi? Akusosekwa kumanyilila yeleyi kuti asaguleje cenene pakwamba ya cikamucisyo ca mtela ni ca opaleshoni. Kuti amanyilile yejinji pa nganiji, aŵalanje mtwe 7 wa buku ja Ciceŵa jakuti Chikondi cha Mulungu, soni aŵalanje mabuku ni magasini gane gagasasile mumtwewu, soni mu ngani ajino. Panyuma pakwe, akusosekwa kujipopelela nganiji ni kulolasoni yalijiganyisye pakamulicisya masengo yiwusyo yayili pasipa.

(1) Ana ŵa Mboni sya Yehofa akusakanaga kwataga miyasi pa ligongo lyekulungwa lyapi? (2) Pa ngani ja cikamucisyo ca mtela, ana ŵa Mboni sya Yehofa akusasaka cikamucisyo catuli? (3) Ana jwakulwala jwalijose akwete ukoto wapi? (4) Ligongo cici luli lunda kusagula matala gane ga cikamucisyo ca mtela? (5) Naga mundu ajasile mnope miyasi, ana madokotala mpaka gatende mwacitema yindu yiŵili yapi? (6) Ana mpaka asace kumanyilila yatuli pakwamba ya matala gane ga cikamucisyo ca mtela? (7) Ana mpaka yikombolece kutenda opaleshoni jekulungwa mwangakamulicisya masengo miyasi? (8) Ana moŵa agano ŵandu atandite kujiwona catuli ngani ja cikamucisyo cangakamulicisya masengo miyasi?

Kunda kupocela cikamucisyo cinecakwe cacisasile m’buku ja Chikondi cha Mulungu, soni m’mabuku gane gagasasile mu ndime ajino, jili ngani jakusosekwa kusagula jika mwakamulana ni cikumbumtima cecijiganye cenene Baibulo. Ana acimanyi cikamucisyo cakuŵajilwa ca mtela campaka asagule, soni campaka ŵasagulile ŵanace ŵawo? Ana alembile yeleyo pa kadi jawo ja DPA ni ja ŵanace ŵawo? Kuti apikane yejinji ya nganiji, alolesoni cenene “Mafunso Ochokera kwa Owerenga” mu Nsanja ya Olonda ja June 15, 2004, ni ja October 15, 2000. Kaneko akamulicisye masengo cikalata cacili mu ngani ja mu Undumetume wa Ucimwene wa Ciceŵa wa November 2006 jakuti, “Kodi Ndimaiona Bwanji Nkhani Yokhudza Tizigawo ta Magazi ndi Njira Zachipatala Zogwiritsa Ntchito Magazi Anga Omwe?,” kuti alole cikamucisyo campaka asagule kupocela kapena kana. Pambesi pakwe alolecesye kuti alembile cenene yasagwileyo pa kadi jawo ja DPA. Akusosekwa kwasalila cenene ŵandu ŵakwajimila pa cikamucisyo ca mtela, soni ŵacibale ŵanganaŵa ŵamboni yacasaguleyo.