Litala Lyasambano Soni Lyakusangalasya Lyakutendela Umboni Pelanguka
1. Ana mipingo jajikwete malo gakusapita ŵandu ŵajinji ŵakwenda pasi aŵele ali mkujilimbikasya kutenda cici?
1 Mipingo jajikwete malo gakusapita ŵandu ŵajinji ŵakwenda pasi, aŵele ali mkujilimbikasya kuti jilinganye yakuti jilalicileje pelanguka pakamulicisya masengo matebulo kapena mashelefu gamatayala. Pakulalicila pakamulicisya masengo shelefu jamatayala, pambali pakwe pakusajima kapena kutama mundu jumo. Nambo naga akamulicisya masengo tebulo jekulungwa, pakusosekwa kuŵa ŵandu ŵaŵili. Ŵakusatama pamalo gelega akusaŵa ŵakusangalala, ŵakungulucika, soni ŵangasawusya kuŵecetana nawo. Naga payice mundu jwakwete lung’wanu ni yayili pa tebulopo, jwakulalicila jumo akusatanda kuŵecetana najo, mwine pakuŵeceta kuti, “Ana akumanyilila yajikusasala Baibulo pangani jeleji?” Ŵakulalicila ŵanewo komboleka kulalicilaga mwaupile ciŵandika tebulojo.
2. Asale cakutendekwa cacikulosya umbone wakulalicila pelanguka pakamulicisya masengo matebulo.
2 Kulalicila m’litala lyeleli kutendekasisye kuti papagwe majiganyo ga Baibulo gejinji. Mwambone, mwanace jwa sukulu pa koleji jine jwalembile yindu yaŵasakaga kuwungunya pakwamba ya Mboni sya Yehofa, nambo ŵalepele kupata Nyumba ja Ucimwene. Nambo pacamasile cijuma cimo, pasukulu pepo ŵajiweni tebulo jakola mabuku gakulalicilila. Jwalakwe ŵatandite kulijiganya Baibulo ni Ŵamboniwo. Apanopano ŵabatiswe, soni ŵatandite kulalicila pakamulicisya masengo matebulo.
3. Ana ŵakulalicila ŵane akusaliwona wuli litala lyakutendela umboni pelangukali?
3 Mklistu jwine jwamkongwe jwakusalalicila pakamulicisya masengo litalali jwatite: “Ŵane akusayika patebulo jetu kuti ajigale magasini gasambano. Nambo ŵane mwaŵeleŵa akusaŵa kuti nganapikane ya Mboni sya Yehofa cipagwile. Nguganisya kuti litalali mpaka likamucisye kwayicila ŵandu ŵajinji.” Mklistu jwinesoni jwamkongwe jwatite, “Lyeleli lili litala lyasambano, soni lyakusangalasya lyakutendela umboni ligongo lyakuti ŵandu akusatenda lung’wanu ni kwika jika, atamose ali ngakuyinonyela mnope.”
4. Ligongo cici kuŵika tebulo ja mabuku pamalo gagogo soni pandaŵi jakulandana cijuma cilicose kuli kwakamucisya?
4 Kuli kwakamucisya kuŵika matebuloga pamalo gagogo pa masiku soni ndaŵi syakulandana pa cijuma cilicose. Ligongo lyakuti ŵandu cayiwoneje yinduyi kaŵilikaŵili, kaneko mpaka aŵe ŵagopoka kwikaga patebulopo ni kuwusya yiwusyo kapena kukujigala mabuku. Ana mpingo wawo wulinganyisye yakutendela umboni pelanguka pakamulicisya masengo litalali? Naga yili m’yoyo, wawojo komboleka kutanda kulalicila nawo pakamulicisya masengo litala lyakusangalasya, soni lyakamucisya mnopeli ‘lyakulalicilila ya Ucimwene wa Mlungu.’—Luk. 9:60.