Ŵakamucisyeje Ŵangalola Kuti Alijiganye ya Yehofa

1. Ana Yesu ŵatendele catuli canasa ŵangalola?

¹ Lisiku lyakuti Yesu awulajidwe lili liŵandicile, jwalakwe ŵatyosile ku msinda wa Yeliko kwawulaga ku Yelusalemu. Pawulendowu ŵasimene ni ŵangalola ŵaŵili ŵakuŵendesya ŵaŵagumilaga kuti, “Ambuje, . . . atutendele canasa!” Atamose kuti Yesu ŵaganisyaga mnope ya yindu yakusawusya yacakasimane nayo, nambo jwalakwe ŵaŵilasile acalumewo ni kwaposya. (Mat. 20:29-34) Ana mpaka tumsyasye catuli Yesu pakwatendela canasa ŵangalola?

2. Ana mpaka tumlalicile catuli mundu jwangalola?

² Twakamucisyeje: Naga asimene ni mundu jwangalola, akusosekwa kumsalila lina lyawo, soni kum’wusya naga akusaka cikamucisyo. Ligongo lyakuti ŵajinji ŵangaganicisya ŵangalola, pandanda komboleka kwakayicila. Nambo naga akumlosya kuti akumnonyela yisyesyene, soni kuti akwete najo lung’wanu, ngaŵa mkwakayicila. Akumbucilejesoni kuti ŵane mpaka akomboleje kulola panandi, nambo ŵane ngakombola kusyesyene. Yeleyi mpaka kwakamucisye kumanyilila cikamucisyo cakusosecela mundujo. Pambesi pakumkamucisya, komboleka kumsalilasoni kuti tukusalijiganya Baibulo ni ŵandu. Am’ŵende kuti aŵalanje najo malemba, mpela Salimo 146:8 kapena Yesaya 35:5, 6. Naga akusakombola kuŵalanga yilembo ya ŵandu ŵangalola, am’wusye naga akusaka mabuku kuti alijiganye yejinji ya m’Baibulo. Mpaka amkamucisyesoni kupata mabuku gakwamba kupikanila pa Webusayiti ja jw.org. Naga jwangalolajo akwete kompyuta soni naga jikwete pologalamu jakuŵalanga maloŵe, mpaka asangalale kupikanila ngani sya pa Webusayitiji.—Alole libokosi lyakuti “Yampaka Atende Pakumkamucisya Jwangalola.”

3. Ana mpaka twasosesose catuli ŵandu ŵangalola ŵali mumkuli wetu?

³ Ŵasosejesoseje Ŵangalola: Ndaŵi syejinji patukulalicila kunyumba ni nyumba ngatukusasimana ŵangalola ligongo lyakuti ŵajinji ŵangagopoka kuŵecetana ni ŵandu ŵangakwamanyilila. M’yoyo, pakusasosekwa mtawu ‘patukwasosasosa’ kuti twalalicile. (Mat. 10:11) Naga akusakamula masengo yimpepe ni jwangalola kapena naga akusalijiganya sukulu yimpepe, mpaka uŵe upile wawo kuti amlalicile. Naga mumkuli wa mpingo wawo mwana sukulu ja ŵangalola, apeleceje mabuku getu ga ŵandu ŵangalola ku sukulujo kuti aŵiceje mu layibulale. Naga akumanyilila liŵasa lyalikwete mundu jwangalola, mpaka amsalile mundu jwa m’liŵasalyo kuti ŵa Mboni sya Yehofa ali ŵakusacilila kwakamucisya ŵangalola pakwapa mabuku ga ŵangalola kapena gakwamba kupikanila. Mpaka amsalilesoni yeleyi mundu jwakusakamula masengo ku ciwanja cakamucisya ŵandu ŵangalola. Amlosye mundujo kutyocela m’Baibulo kuti pacangakaŵapa Mlungu camasye ungalolawu. Kombolekasoni kumlosya fidiyo jakuti “Kaya Ndikanagwira Mtengo Wanji?” ja pa Webusayiti jetu ja jw.org. Fidiyoji jikusatagulila ya mundu jwangalola jwele yindu yamjendele cenene ligongo lyakola Baibulo ja ŵangalola. Kutagulila cenene cakulinga cawo, mpaka kwape upile wakuwonegana ni ŵangalolawo.

4. Ana tukulijiganya cici pa yaŵatesile Janet?

⁴ Mlongo jwine jwangalola lina lyakwe Janet ŵajawile kumalo kwakwatamaga ŵandu ŵangalola. Mlongoju ŵatandite kuŵecetana ni jwamkongwe jwine jwangalola. Janet ŵamsalile mundujo kuti, “Yesu ŵaposisye ŵandu ŵangalola pakulosya kuti msogolomu cacaposya ŵangalola wosope.” Ŵalolite yimpepe lilemba lya Ciunukuko 21:3, 4, ni kutagulilana yawucitenda Ucimwene wa Mlungu pakwanilisya lilembali. Paŵapikene yeleyi, jwamkongwejo ŵatite, “Nganimbikaneje cipagwile mundu jwangalola ali mkusala yeleyi. Ŵandu ŵajinji ŵakusakombola kulola akusati mundu akusaŵa jwangalola ligongo lya yindu yaŵatesile acinangologwe kapena jwalakwejo msyene.” Janet ŵamsalile jwamkongweju kupitila pa imelo yampaka atende kuti apate buku jakuti Baibulo Jikusajiganya Cici. Apanopano Janet akulijiganya Baibulo ni jwamkongweju kaŵili pacijuma.

5. Atamose kuti m’weji ngaŵa mkwaposya ŵangalola, nambo ana mpaka paŵe yakuyicisya yatuli naga tukulinga kwakamucisya?

⁵ M’weji ngaŵa mkwaposya ŵandu ŵangalola mpela mwaŵatendelaga Yesu. Nambo mpaka twakamucisye ŵandu ŵele nganisyo syawo, Satana asiŵisile m’cipi, kupwatikapo ŵali m’cipi ligongo lya ungalola, kupikanicisya usyesyene wa m’Maloŵe ga Mlungu. (2 Akoli. 4:4) Yesu ŵaposisye acalume ŵaŵili ciŵandika msinda wa Yeliko ligongo ‘lyakwatendela canasa.’ (Mat. 20:34) M’wejisoni naga tukusatendela canasa ŵangalola, mpaka tusangalaleje pakwakamucisya kulijiganya ya Yehofa, jucacimasya ungalola.