Ana Mpaka Akamulichisye Masengo Chamtuli Yisyasyo ya Kalalichile?

Kutandila mu Januwale 2018, pachikuto cha kabuku ka Yakutendekwa Pamsongano wa Utumiki ni Umi Wachiklistu, mwatandite kusimanikwa mbali ja yisyasyo ya kalalichile. Ana mpaka tukamulichisye masengo chamtuli mbaliji?

Naga Apegwile Ngani pa Mbaliji: Akusosekwa kukamulichisya masengo chiwusyo, lilemba, soni chiwusyo cha pa ulendo wakuyichisya. Yeleyi yikusasimanikwa pa mbali ja yisyasyo ya kalalichile. Nambope, ngayikugopolela kuti akusosekwa kutenda ndendende ni yayili mu yisyasyo yakalalichileyo. Nambo mpaka ayiŵechete mmaloŵe gawogawope, soni mpaka atande mwakulekanganalekangana. Mpaka agaŵilesoni buku kutyochela mu yindu yakwiganyila atamose kuti mbali jakutendajo nganasala yeleyo.

Pali mu Utumiki: Yisyasyo ya kalalichile ŵayilinganyisye ni chakulinga chakuti yitukamuchisyeje. Naga mundu ali jwachidwi soni akusaka kumanyilila yejinji, mpaka apitilisye kukambilana najo pakamulichisya masengo chiwusyo cha pa ulendo wakuwilisya. Mpaka agambe kuchenga pane ni pane mu chisyasyo cha kalalichile kapena mpaka alinganye chiwusyo chawo. Ana pana ngani kapena lilemba line lyakwe lyele ŵandu ŵatesile nalyo chidwi munyumamo? Mpaka akamulichisyesoni masengo yeleyo. Mpaka akamulichisyesoni masengo yindu yayigambile kutendekwa kwene mu dela jawo, kapena yayikopweche mu nyusipepala. Chinga mpaka asagule yamtuli pakamulichisya masengo yisyasyo ya kalalichile, nambo chakulinga chawo chiŵeje ‘kutenda yosope ligongo lya ngani syambone, kuti ŵalalichile ŵane.’—1 Akoli. 9:22, 23