Akamulichisyeje Masengo Kabuku ka Asangalaleje Mpaka Kalakala mu Utumiki

Yili yakusangalasya kuti tukwete kabuku soni buku jasambano jatukamulichisyeje masengo pakwajiganya ŵandu Baibulo. Tukuŵenda Yehofa kuti atukamuchisyeje patukukamulichisya masengo bukuji pakwakamuchisya ŵandu kuti atande kumtumichila jwalakwe. (Mat. 28:18-20; 1 Akoli. 3:6-9) Ana mpaka tukamulichisye masengo wuli mabukuga?

Mabukuga agapanganyisye mlitala lyakuti akambilaneje ni mundu pakumjiganya. Myoyo pakukosechela kapena kutendesya lijiganyo akusosekwa kukuya malangiso gakuyichisyaga.a

• Aŵalanjeje yachalijiganyeyo soni kukambilana yiwusyo

• Aŵalanjeje malemba galembile kuti “aŵalanje” kaneko amkamuchisyeje jwakulijiganyajo kumanyilila yakulijiganya pa malembago

• Aloleleje soni akambilane mafidiyo pakamulichisya masengo yiwusyo yayili pelepoyo

• Alolechesye kuti mbali jilijose alijiganyisye majiganyo gosope

Pasimene ni mundu, atandeje ni kumpa kabuku. (Alole libokosi papeji 16 lyakuti “Yampaka atende pakugaŵila kabuku ka Asangalaleje Mpaka Kalakala pa ulendo wandanda.”) Pamalisisye kulijiganya ni mundu kabukuka soni naga akulosya kuti akusaka kumanyilila yejinji, mpaka ampe buku jekulungwa ni kutanda kulijiganya pa lijiganyo 04. Naga apano akumjiganya mundu pakamulichisya masengo buku ja Jikusatujiganya Yatuli kapena Mlungu Ŵanonyeleje, akusosekwa kuchenga ni kutanda kamulichisya masengo buku ja Asangalaleje Mpaka Kalakala. Kaneko alole pa mpaka atandile m’bukuji.

ALOLELE FIDIYO JAKUTI TWAPOCHELE KU LIJIGANYO LYA BAIBULO, NI AKAMBILANE YIWUSYO YAKUYICHISYAYI:

• Ana ŵakulijiganya Baibulo chalijiganye chichi mu buku jasambanoji?

• Ligongo chichi akusosekwa kumlosya fidiyoji mundu patandite kumjiganya Baibulo?

• Ana akusosekwa kumlimbikasya jwakulijiganya jwawo kukwanilisya yakulinga yamtuli?—Alole chati chakuti “Yakusosekwa Kuyiganichisya soni Yakulinga ya Mbali Jilijose”