Ana Kuŵa Mundu Jwambone Mpaka Kwakamuchisye Kola Sogolo Jambone?

Kwa yaka yejinji ŵandu aŵele ali mkuyiwona kuti kwatendela ŵane yambone ni kwampaka kwakamuchisye kola sogolo jambone. Mwachisyasyo, ŵandu ŵa ku Asia aŵele ali mkuchimbichisya yaŵaŵechete mtichala jwine jwamlijiganye mnope. Jwalakwe jwatite, “Yindu yangamkusaka kuti ŵane amtendele, mkatendela ŵane yeleyo.”

YAKUSATENDA ŴANDU ŴAJINJI

Ŵandu ŵajinji akusayiwona kuti kola ndamo syambone ni kwampaka kwakamuchisye kola sogolo jambone. Jemanjaji akusiŵachimbichisya ŵane, akusakola ndamo syambone, akusatenda yindu mwakamulana ni udindo wakwete soni akusatenda yindu yakuti akalijimbaga magambo. Jwamkongwe jwine jwa ku Vietnam jwatite, “Nakulupililaga kuti mpaka mbate upile naga ngutenda yindu mwachilungamo.”

Jwamkongwe julajula akumpa yakulya mundu jwakulaga soni jwakusoŵa pakutama.

Ŵandu ŵane akusatenda yindu yambone ligongo lya yikulupi ya dini jawo. Jwamlume jwine jwa ku Taiwan jwatite, “Nalijiganyisye kuti naga mundu akutenda yambone pali chijumi ni kuti pachachiwapo chachisangalalaga mpaka kalakala. Nambo naga ngakutenda yambone nikuti chachigambaga kulaga.”

YASIMENE NAYO ŴANDU ŴANE

Jwamkongwe akudandawula soni anyakwile mwanache jwakwe jwamlume.

Yili yisyene kuti patukwatendela ŵane yambone tukusasangalala. Nambo chakutesya chanasa chili chakuti ŵajinji ŵakusiŵatendela ŵane yambone ŵangapataga yaŵasakaga. Shiu Ping jwamkongwe jwa ku Hong Kong jwatite, “Nayiweni kuti ngaŵa kuti ndaŵi syosope pamkutenda yambone nikuti chimpate upile. Nalipelekaga mnope pakusamalila liŵasa lyangu soni kwakamuchisya ŵane. Nambo yindu nganiyijenda munasachilaga, ŵamkwangu ŵatutisile une ni mwanache jwangu.”

Ŵandu ŵajinji ayiweni kuti ngawa kuti ŵandu wosope ŵali mu dini ali ŵambone. Etsuko jwamkongwe jwa ku Japan jwatite, “Nalongolelaga ŵachinyamata mu dini jine jakwe. Natengwiche kuyiwona kuti ŵandu ŵane mu diniji nganakola ndamo syambone. Ŵakanganilanaga maudindo soni nganakamulichisyaga masengo mwachilungamo mbiya sya dini.”

“Nalipelekaga mnope pakusamalila liŵasa lyangu soni kwakamuchisya ŵane. Nambo yindu nganiyijenda munasachilaga, ŵamkwangu ŵatutisile une ni mwanache jwangu.”—SHIU PING JWA KU HONG KONG

Ŵandu ŵane ŵakusalipeleka mnope ku dini akusatengukaga payiweni kuti yindu yambone yaŵatendaga yijawile m’mesi. Yeleyi ni yayamtendechele Van jwamkongwe jwa ku Vietnam. Jwalakwe jwatite, “Lisiku lililyose nasumaga yisogosi, maluŵa soni yakulya nikuja kuyipeleka mbopesi pamalo gaŵagonile achinangolo ŵangu. Naganisyaga kuti kutenda yeleyi kuchingamuchisya kupata upile msogolo. Kwa yaka yejinji mbele ndili mkutenda yambone soni kukuya misyungu ja dini jangu. Nambotu chakutesya chanasa chili chakuti ŵamkwangu ŵalwasile ulwele wakogoya mnope. Soni mwanache jwangu jwawile mkanakule pandaŵi jiŵaliji ku sukulu ku chilambo chine.”

ANA KUŴA MUNDU JWAMBONE KULI KWAKAMUCHISYA KUTI MUNDU AKOLE SOGOLO JAMBONE?

Kuŵa mundu jwambone kuli kwakusosekwa nambo ngayikugopolela kuti basi nikuti mundu chakole sogolo jambone. Ligongo chichi tukuti myoyo? Kwende tulole yagakusasala maloŵe ga Mlungu.

ŴANDU ŴANE AKUSASAGULA KUTENDA YAKUSAKALA

“Mundu jumo jwakulemwa akusakomboleka konanjisya yindu yejinji yambone.”—JWAKULALICHILA 9:18.

Yakutenda ya ŵandu ŵane mpaka yakwayesoni wawojo atamose ali mkulingalinga kutenda yambone. Mwachisyasyo, mlili pawusawisye mwine wawojo mpaka akuyeje malamusi ga boma kuti aŵambale ulwelewo. Nambo ana mpaka chitendekwe chichi naga ŵane ngakukuya malamusigo? Yakutenda ya jemanjaji mpaka yatendekasye ŵandu ŵakukuya malamusi kulwala.

ŴANDU NGAKUSAMANYILILA YAYILI YAMBONE KAPENA YAKUSAKALA

“Pana litala line lyalikusawoneka mpela lyambone kwa mundu, nambo mbesi jakwe jili chiwa.”—MISYUNGU 14:12.

Yisyasyo ya ŵandu ŵakala yikulosya kuti ŵajinji ŵaŵaganisyaga kuti akutenda yambone ŵamanyilile mwakuchelewa kuti ŵatendaga yakulemwecheka. Nambo tumanyilileje kuti atamose tukole yakulinga yambone patukutenda yindu, nambo naga tusagwile mwakulemwecheka tuchisimana ni yakusawusya.

YAKUTENDEKWA YA PAUMI YILI YANGAPANGANICHIKA

“Jemanja ya malaŵi ngamkuyimanyilila.”—YAKOBO 4:14.

Atamose mundu aŵe jwambone mpaka awe mwangajembecheya. Yeleyitu ni yatuyiweni mu ndaŵi ja ulwele wa COVID-19. Ŵandu ŵajinji ŵaŵakamuchisyaga ŵakulwala ulwelewu ŵawile. Aganichisye yayamtendechele jwamkongwe jwine jwa ku China. Babagwe ŵawile pangosi ja galimoto. Jwalakwe jwatite, “Ngangusapikanichisya kuti ligongo chichi baba ŵangu ŵawile. Ŵaliji mundu jwambone, jwakulinandiya, jwachilungamo soni ŵalimbichilaga masengo. Mu galimotomo mwapali ŵandu ŵajinji nambo ŵagambile kuwa baba ŵangupe.”

Naga kuŵa mundu jwambone nganikuŵa kwakwanila kuti mundu akole sogolo jambone, ana ni tukusosekwa kutenda chichi? Kuti tumanyilile yakutenda, tukusosekwa kupata kwanga kwa yiwusyo yatukusakola. Nambo ana kwanga kwa yiwusyoyi mpaka tukupate kwapi?