Yehofa Chachakamuchisya Pandaŵi Jakusimana ni Yakusawusya

1-2. (a) Ana mwayiŵelele yindu mu ndaŵi jetu jino yikulandana chamtuli ni mwayaŵelele yindu kwa Ayuda ŵaŵawujile ku Yelusalemu? (b) Asale mwakata yindu yakusawusya yiŵasimene nayo Ayuda. (Alole libokosi lyakuti, “Muyaŵelele Yindu mu Ndaŵi ja Hagai, Sakaliya Soni Esala.”)

ANA ndaŵi sine akusadandawulaga ni yampaka yitendekwe msogolo? Komboleka masengo gamalile soni akudandawula mwampaka apatile yakusosechela ya pa liŵasa lyawo. Kombolekasoni mpaka akoleje woga ligongo lyaganisya kuti umi wa ŵandu ŵa mwiŵasa mwawo mpaka uŵe pangosi. Mpaka akolejesoni woga naga ŵakulamulila ngakupikangana, ŵane akwalagasya ligongo lya chikulupi chawo kapena akwasisya pa masengo gakulalichila. Ana akusimana ni yakusawusya mpela yeleyi? Naga yili myoyo mpaka yakamuchisye mnope kumanyilila yaŵatesile Yehofa pakwakamuchisya Ayisalayeli ŵaŵasimanaga ni yakusawusya mpela yeleyi.

² Ayuda ŵaŵatyochele ku ukapolo ku Babulo kuwujila ku Yelusalemu, ŵasosekwaga chikulupi chakulimba kuti akombole kutama m’chilambo chele nganachimanyililaga chenene. Yaliji myoyo ligongo jemanjaji ŵalesile ku Babulo yindu yosope yiŵayidalilaga paumi wawo. Mkanipapite ndaŵi jelewu jemanjaji ali akopochele ku Yelusalemu ŵatandite kusimana ni yakusawusya mpela kusoŵa kwa mbiya, kwasisya, soni ungapikangana wa ŵandu ŵakulamulila. Mwamti ŵane mwajemanjaji yasawusyaga kuti alipelecheje mnope pa masengo gakutaŵasoni nyumba ja Mlungu. Myoyo cha m’ma 520 B.C.E., Yehofa ŵalamwile ŵakulochesya ŵaŵili Hagai ni Sakaliya kuti akalimbikasye Ayuda kutandilasoni kamula masengo gaŵakamulaga pandanda. (Hag. 1:1; Sak. 1:1) Mpela mwachituyiwonele munganiji, yaŵatesile ŵakulochesyaŵa pakwalimbikasya Ayuda yakwete yakuyichisya yambone. Nambope pali papitile yaka chiŵandika 50, Ayuda ŵala ŵatandite kuwujila munyuma mwamti ŵasosekwagasoni kwalimbikasya. Myoyo, Esala juŵamanyililaga chenene masengo gakopela Chilamusi, jwanyakwiche ku Babulo kwawula ku Yelusalemu kukwalimbikasya ŵandu ŵa Mlungu kuti aŵicheje pamalo gandanda kumtumichila Mlungu.—Esa. 7:​1, 6.

3. Ana chitukambilane yiwusyo yapi? (Misyungu 22:19)

³ Yakulochesya ya Hagai ni Sakaliya yakamuchisye ŵandu ŵa Mlungu kalakala kuti apitilisye kumdalila Yehofa pandaŵi jiŵasimanaga ni yakusawusya. Mwakulandana ni jemanjaji yakulochesyayi mpaka yitukamuchisyesoni m’weji masiku agano kumdalila mnope Yehofa pandaŵi jatukusimana ni yakusawusya. (Aŵalanje Misyungu 22:19.) Pachitukambilaneje yaŵamsalile Mlungu Hagai soni Sakaliya soni kulola chisyasyo cha Esala tupate kwanga kwa yiwusyo yakuyichisyayi: Ana yakusawusya yaŵasimanaga nayo yakwayaga chamtuli? Ligongo chichi tukusosekwa kupitilisya kumtumichila Mlungu atamose kuti tukusimana ni yakusawusya? Soni ana mpaka tumkulupilile uli Mlungu pandaŵi jatukusimana ni yakusawusya?

ANA YAKUSAWUSYA YAŴASIMANAGA NAYO AYUDA YAKWAYIYE CHAMTULI?

4-5. Ana ni yindu yapi yayatengwisye Ayuda pa masengo gakutaŵa nyumba ja Mlungu?

⁴ Ayuda paŵawujile ku Yelusalemu ŵakwete masengo gejinji gakuti atende. Mwachitema jemanjaji ŵatandite kutaŵa malo gakupelechela mbopesi kwa Yehofa nambosoni ŵatandite kutaŵa nyumba ja Mlungu. (Esa. 3:​1-3, 10) Nambo mkanipapite ndaŵi kulipeleka kwawo kwatandite kunandipa. Yaliji myoyo ligongo lyakuti kupwatika pa masengo gakutaŵa nyumba ja Mlungu, jemanjaji ŵasosekwagasoni kukamula masengo gakutaŵa nyumba syawo, kulima migunda nambosoni kusosasosa yakusosekwa ya m’maŵasa gawo. (Esa. 2:​68, 70) Konjechesya pelepa achimmagongo ŵawo ŵasisyaga mwamti ŵalinganyisye yakulekasya masengo gakutaŵasoni nyumba ja Mlungu.—Esa. 4:​1-5.

⁵ Ayuda ŵaŵawusile ku ukapolo ŵala ŵatandite kulagasoni ligongo lyakusoŵa kwa mbiya soni ungapikangana wa ŵandu ŵakulamulila. Pandaŵiji Ayudaŵa ŵaliji pasi pa ulamusi wa Apelesi. Myoyo, panyuma pakuti Sayilasi mwenye jwa Apelesi awile mu 530 B.C.E., mwenye juŵajinjile m’malo mwakwe jwalinganyisye yakwajimuchila Aiguputo. Mwenyeju pajwajawulaga ku Iguputo, asilikali ŵakwe ŵaŵendaga Ayisalayeli kuti ŵapeje yakulya, mesi soni malo gakutama. Yeleyi yatendekasisye kuti Ayisalayeliŵa alajeje mnope. Myoyo, pajwatandite kulamulila Daliyasi Jwandanda, mu ulamusi wa Apelesi mwapalipe yakusawusya yejinji ligongo mwapali ngondo soni ŵandu ŵakwimuchila. Ngatukukayichila kuti yakusawusya yeleyi yatendekasisye Ayuda ŵajinji kudandawula pakwamba yampaka atende pakugasamalila maŵasa gawo. Myoyo ligongo lya yakusawusya yaŵasimanaga nayo, Ayuda ŵane ŵayiwonaga kuti jelejo nganijiŵa ndaŵi jambone jakutaŵasoni nyumba ja Yehofa.—Hag. 1:2.

6. Mwakamulana ni Sakaliya 4:​6, 7, ana ni yakusawusya yine yapi yiŵasimene nayo Ayuda? Ana Sakaliya jwasimichisye ya chichi?

⁶ Aŵalanje Sakaliya 4:​6, 7. Konjechesya pa yakusawusya mpela kusoŵa kwa mbiya soni ungapikangana wa ŵandu ŵakulamulila, Ayuda ŵasosekwaga kuti apilile ni kulagasidwa. Mu 522 B.C.E., achimmagongoŵa ŵakombwele kwalekasya Ayuda kutaŵasoni nyumba ja Mlungu. Nambo Sakaliya ŵasimichisye Ayuda kuti Yehofa chakamulichisye masengo machili gakwe ga msimu weswela kuti atyosye yakusawusya yiliyose. Mwamti mu 520 B.C.E., Mwenye Daliyasi, jwatyosisye lilamusi lyakulekasya kutaŵa nyumba ja Yehofa soni jwayikene pakwakamuchisya Ayuda mwakwapa mbiya soni ŵandu ŵakwakamuchisya masengogo.—Esa. 6:​1, 6-10.

7. Ana Yehofa ŵapele upile chamtuli Ayuda ŵaŵawujile ku Yelusalemu paŵaŵikaga masengo gakutaŵa nyumba ja Mlungu pa malo gandanda?

⁷ Kupitila mwa Hagai soni Sakaliya Yehofa ŵasalile ŵandu ŵakwe kuti chachakamuchisya naga akuŵika pandanda masengo gakutaŵasoni nyumba jakwe. (Hag. 1:​8, 13, 14; Sak. 1:​3, 16) Ligongo lya maloŵe gakulimbikasya ga ŵakulochesyaŵa, Ayuda ŵatandilesoni kutaŵa nyumba ja Mlungu mu 520 B.C.E. mwamti ŵamalisisye masengo gakutaŵa nyumbaji mkanipamale yaka 5. Ligongo lyakuti Ayuda ŵaŵisile pandanda masengo gakutaŵasoni nyumba ja Mlungu atamose kuti ŵasimanaga ni yakusawusya, Yehofa ŵakamuchisye jemanjaji mwakwapa yakusosechela yawo ya paumi nambosoni ŵaŵele nawo pa unasi wambone. Yakuyichisya yakwe jemanjaji ŵamtumichilaga jwalakwe mwakusangalala.—Esa. 6:​14-16, 22.

APITILISYE KUTENDA YAKUSASAKA MLUNGU

8. Ana maloŵe ga pa Hagai 2:4 mpaka gatukamuchisye chamtuli kuganichisya chakulinga cha Mlungu?

⁸ Ligongo lyakuti yakusawusya yekulungwa yikuŵandichila mnope, tukusosekwa kulipeleka mnope pa masengo gakulalichila. (Maliko 13:10) Nambope, mpaka yiŵe yakusawusya kujigala nawo mbali pa masengo gakulalichila naga agalekasisye kapena tukulaga mnope pa kapate ka yindu ya paumi. Ana ni chichi champaka chitukamuchisye kuti tuŵicheje yindu ya Uchimwene pa malo gandanda? Tukusosekwa kusimichisya kuti Yehofa ali ni m’weji. Jwalakwe chachitukamuchisya naga tukuŵika yindu ya Uchimwene pa malo gandanda paumi wetu. Myoyo ngatukusosekwa kutenda woga.—Aŵalanje Hagai 2:4.

9-10. Ana liŵasa line lyalosisye chamtuli kugakulupilila maloŵe ga Yesu gakusimanikwa pa Mateyu 6:33?

⁹ Aganichisye ya chisyasyo cha liŵasa lya M’bale ni Mlongo Olegb ŵali apayiniya. Panyuma pakwawula kukukamuchisya ku mpingo wine jemanjaji masengo gawo gasokonechele ligongo lya kajende ka chipanje m’chilambo chawo. Atamose kuti jemanjaji nganapata masengo chiŵandika chaka, nambope ŵayiwonaga kuti Yehofa akwakamuchisya, soni ndaŵi sine abale ni alongo ŵakamuchisyaga. Ana chichi chachakamuchisye jemanjaji paŵasimanaga ni yakusawusyayi? Oleg jwele pandanda jwalagasikaga nganisyo jwasasile kuti, “Kukola yakutenda yejinji pa masengo gakulalichila kwatukamuchisye kuganichisya mnope yindu yakusosekwa paumi.” Jemanjaji ŵapitilisye kulipeleka pa masengo gakulalichila kwineku ali mkusosasosa masengo.

¹⁰ Lisiku line paŵatyochelaga kukulalichila ŵapochele majumbo gaŵili ga yindu kutyochela kwa mjawo. Mjawoju jwajesile lutando lwa makilomita 160 kukwapa yinduyi. Oleg jwatite, “Palisiku lyeleli twayiweni kuti Yehofa soni abale ni alongo ŵatulosisye chinonyelo chekulungwa. Tuli ŵakusimichisya kuti Yehofa nganaŵa ŵaliŵalile ŵakutumichila ŵakwe, mwangasamala kandu ni yakusawusya yakusimana nayo.”—Mat. 6:33.

11. Ana tujembecheyeje chichi naga tukusatenda yakusasaka Mlungu?

¹¹ Yehofa akusasaka kuti tulipelecheje mnope pa masengo gakwakamuchisya ŵandu kupata umi wangamala. Mpela mwatuŵechetele mundime 7, Hagai jwalimbikasisye ŵandu ŵa Yehofa kuti atande masengo gakutaŵasoni nyumba ja Mlungu. Yehofa ŵasalile jemanjaji kuti ‘chiŵape upile’ naga akutenda yeleyi. (Hag. 2:​18, 19) M’wejisoni tukusosekwa kuŵa ŵakusimichisya kuti Yehofa mpaka atupe upile naga tukuŵika masengo gakulalichila pa malo gandanda.

YATUKUSOSEKWA KUTENDA KUTI TUMKULUPILILEJE MNOPE YEHOFA

12. Ligongo chichi Esala soni Ayuda ŵaŵatyokaga ku ukapolo ŵasosekwaga chikulupi chakulimba?

¹² M’chaka cha 468 B.C.E., Esala jwajesile ni gulu jaŵili ja Ayuda kutyochela ku Babulo kwawula ku Yelusalemu. Kuti ulendowu ukomboleche, Esala soni ŵandu ŵaŵawujilagawo ŵasosekwaga kukola chikulupi chakulimba mnope. Jemanjaji ŵasosekwaga kwenda mu msewu wakogoya ali anyakwile golide soni silifa jwamjinji juŵapeleche mwenye kuti akataŵile nyumba ja Mlungu. Yeleyi yikaŵisile umi wawo pangosi ligongo lya ŵandu ŵawiyi. (Esa. 7:​12-16; 8:31) Konjechesya pelepa jemanjaji ŵayikopochelesoni kuti ku Yelusalemu galijisoni malo gakogoya. Yaliji myoyo ligongo lyakuti lutenje lwaliji luli lugumwiche soni kwatamaga ŵandu ŵamnono. Ana mpaka tulijiganye chichi kutyochela kwa Esala pangani jakulimbisya chikulupi chetu pa Yehofa?

13. Ana Esala jwalosisye chamtuli kumdalila Yehofa? (Alole maloŵe gamwiŵanda.)

¹³ Esala ŵayiweni yaŵatite Yehofa pakwakamuchisya ŵandu ŵakwe mu ndaŵi jakusawusya. Mkanichiyiche chaka cha 484 B.C.E., Mwenye Ahasuwelo pajwalamwile kuti Ayuda wosope ŵaŵatamaga mu ulamusi wa Pelesiya awulajidwe, Esala jwaliji ali mkutama ku Babulo. (Est. 3:​7, 13-15) Pandaŵi jeleji umi wa Esala waliji pangosi. Ligongo lya lilamusi lya mwenyeli, Ayuda “ku ma upande gosope” ŵalisile soni kuleka kulya kwineku ali mkupopela kwa Yehofa kuti ŵakamuchisye. (Est. 4:3) Aganichisye mwaŵapikanile Esala soni Ayuda paŵayiweni kuti chiwembuchi chagalawuchile achimsyene ŵaŵalinganyisyewo. (Est. 9:​1, 2) Yaŵasimene nayo Esala mundaŵi jakusawusyaji yamkamuchisye jwalakwe kukosechela yakulingwa yayaliji yakuti chasimane nayo kusogolo. Yamkamuchisyesoni kuti amkulupilileje mnope Yehofa kuti mpaka ŵachenjele ŵandu ŵakwe.c

14. Ana Mlongo jwine jwalijiganyisye chichi paŵayiweni kuti Yehofa ŵamsamalile mu ndaŵi jakusawusya?

¹⁴ Patuyiweni kuti Yehofa atusamalile pandaŵi jakusawusya tukusaŵasoni ŵakusimichisya mnope kuti jwalakwe chachitusamalila. Aganichisye chisyasyo cha Mlongo Anastasia jwakusatama kungopokolyuŵa kwa Europe. Jwalakwe jwalesile masengo gakwe ni chakulinga chakuti aŵambale kwinjilila nawo yandale. Jwalakwe jwatite, “Keleka kaliji kandanda paumi wangu kutama ndili jwangali mbiya. Nambo napopesile kwa Yehofa mwamti nayiweni yaŵatite pakungamuchisya mwachinonyelo. Myoyo ndaŵi jine pachinjilepela kupata masengo, ngasinjogopa. Naga Atati ŵangu ŵakwinani angamuchisye lelo nikuti chachingamuchisyasoni malaŵi.”

15. Ana ni chichi chachamkamuchisye Esala kupitilisya kumdalila Yehofa? (Esala 7:​27, 28)

¹⁵ Esala ŵayiweni yaŵatite Yehofa pakumkamuchisya paumi wakwe. Esala paŵaganichisyaga ndaŵi jele Yehofa ŵaŵele ali mkukamuchisya yamlimbikasisye jwalakwe kumkulupilila mnope Yehofa. Jwalakwe jwaŵechete maloŵe gakuti, “AMBUJE Mlungu jwangu ŵangamuchisye une.” (Aŵalanje Esala 7:​27, 28.) Esala jwasasile maloŵe gakulandana ni gelega kwa ma ulendo 6 m’buku ja m’Baibulo jakumanyika ni lina lyakwe.—Esa. 7:​6, 9; 8:​18, 22, 31.

16. Ana ni muyakutendekwa yapi yampaka yitukamuchisye kumanyilila kuti Yehofa akutukamuchisya? (Alole chiwulili.)

¹⁶ Yehofa mpaka atukamuchisyesoni patukusimana ni yakusawusya. Mwachisyasyo, patukwaŵenda abwana ŵetu kuti atukunde kwawula ku msongano wachigawo kapena kuti atunandiyile ndaŵi jakamulila masengo kuti tutendeje nawo misongano ja mpingo, yikusapeleka upile wakulola chikamuchisyo cha Yehofa. Mpaka tusimonje ni yakuyichisya yakwe. Mwamti mpaka tumdalileje mnope Yehofa.

17. Ana Esala jwalosisye chamtuli kulinandiya pandaŵi jaŵasimanaga ni yakusawusya? (Alole chiwulili chapachikuto.)

¹⁷ Esala mwakulinandiya jwapopesile kwa Yehofa kuti amkamuchisye. Ndaŵi jilijose Esala pajwalagasikaga nganisyo mwakulinandiya jwapopelaga kwa Yehofa kuti amkamuchisye. (Esa. 8:​21-23; 9:​3-5) Ligongo lyakuti Esala jwamdalilaga Yehofa ŵandu ŵane ŵaliji ŵakusachilila kumkamuchisya soni kusyasya chikulupi chakwe. (Esa. 10:​1-4) M’wejisoni patukulagasika nganisyo ni mwampaka tupatile yakusosechela ya paumi kapena chiteteyo cha ŵandu ŵamwiŵasa mwetu, tukusosekwa kupopelaga kwa Yehofa.

18. Ana chichi champaka chitukamuchisye kuti tumdalileje mnope Yehofa?

¹⁸ Naga tukuŵenda chikamuchisyo kwa Yehofa mwakulinandiya soni kupochela chikamuchisyo chakutupa abale ni alongo ŵetu, chikulupi chetu pa Yehofa mpaka chikule. Erika jwakwete ŵanache ŵatatu ndaŵi syosope pasimene ni yakusawusya ŵamdalilaga Yehofa. Mwachisyasyo, jwalakwe jwapilile chiwa cha ŵamkwakwe soni mwanache jwakwe jwaŵawile mkanapagwe. Yeleyi yatendekwe mwakutotoganya. Pa yosopeyi jwalakwe jwasasile kuti, “Nganiwuŵa ukombwele kumanyilila mkanipaŵe yampaka atende Yehofa pakukukamuchisya. Chikamuchisyo mpaka chiyiche mmatala gakusimonjesya. Nayiweni kuti Yehofa aŵele ali mkwanga mapopelo gangu kupitila mu yakutenda soni yakuŵecheta ya achimjangu. Naga ngwasalila achimjangu yindu yayikundendechela paumi wangu, jemanjaji mpaka angamuchisye mwangasawusya.”

APITILISYE KUMKULUPILILA YEHOFA MPAKA KUMBESI

19-20. Ana tukulijiganya chichi kwa Ayuda ŵaŵalepele kuwujila ku Yelusalemu?

¹⁹ Mpaka tulijiganyesoni yindu yakusosekwa mnope kutyochela kwa Ayuda ŵaŵalepele kuwujila ku Yelusalemu. Ŵane mwajemanjaji ŵalepele kuwujila ku Yelusalemu ligongo lya uchekulu, kulwalalwala kapena ukulu wa udindo wakusamalila maŵasa gawo. Atamose kuti yaliji myoyo, ni mtima wosope jemanjaji ŵakamuchisye achimjawo ŵaŵawujilaga ku Yelusalemu mwakwapa yindu yakusosechela pa masengo gakutaŵa nyumba ja Mlungu. (Esa. 1:​5, 6) Yikuwoneka kuti chikopochele ku Yelusalemu gulu jandanda ja Ayuda, achimjawo ŵaŵasigele ku Babulo ŵapitilisye kutumisya yakupeleka ku Yelusalemu kwa yaka chiŵandika 19.—Sak. 6:10.

²⁰ Atamose mpaka tulipikaneje kuti nganituŵa tukombwele kutenda yejinji pakumtumichila Mlungu, nambope mpaka tuŵe ŵakusimichisya kuti Yehofa akusayamichila mnope yindu yatukusakombola kutenda pakumtumichila. Ana tukumanyilila chamtuli yeleyi? Mundaŵi ja Sakaliya, Yehofa jwamŵendile jwakulochesya jwakwe kupanganya chisoti kutyochela ku golide soni silifa juŵatumisye Ayuda ŵaŵasigalile ku ukapolo ku Babulo. (Sak. 6:11) “Chisoti cha umwenye” chelechi chakamulaga masengo mpela “chikumbukumbu” kapena chakwakumbusya koloŵa kwawo makono. (Sak. 6:14) Myoyo tuli ŵakusimichisya kuti Yehofa nganaŵa aliŵalile kulipeleka kwetu patukumtumichila mundaŵi jakusawusya.—Aheb. 6:10.

21. Ana ni chichi chachichitukamuchisya kumdalila Yehofa mwangasamala kandu ni yakusawusya yatuchisimana nayo kusogoloku?

²¹ Ngatukukayichila kuti chitupitilisye kusimana ni yakusawusya m’masiku gakumalisya gano, soni mwine yindu mpaka yisakale mnope kusogoloku. (2 Tim. 3:​1, 13) Nambope ngatukusosekwa kutenda woga ni yindu yeleyi. Chatukusosekwa kukumbuchila chili maloŵe gaŵaŵechete Yehofa kwa ŵandu ŵakwe mundaŵi ja Hagai gakuti, “Pakuti une ndili ni jemanja . . . Myoyo mkatenda woga.” (Hag. 2:​4, 5) M’wejisoni mpaka tuŵe ŵakusimichisya kuti Yehofa chachiŵa ni m’weji naga tukutenda chakulinga chakwe. Patukukamulichisya masengo yindu yatulijiganyisye kutyochela kwa jwakulochesya Hagai nambosoni Sakaliya soni chisyasyo cha Esala, tuchipitilisyape kumdalila Yehofa atamose chitusimaneje ni yindu yakusawusya kusogoloku.